រាជធានីភ្នំពេញ ៖ ប្ដីប្រពន្ធ១គូ ខណៈជិះម៉ូតូ១គ្រឿង ដឹកគ្នាទៅហូបការគេដល់ពាក់កណ្ដាលផ្លូវ ស្រាប់តែមានរថយន្តលាយបេតុង១គ្រឿង បើកបរក្នុងល្បឿនលឿន ជ្រុលទៅបុកពីក្រោយ រួចកិនស្ត្រីជាប្រពន្ធបណ្ដាលឲ្យបែកក្បាលធ្លាយខួរស្លាប់ភ្លាមៗនៅនឹងកន្លែង ចំណែកឯបុរសជាប្ដី…
រាជធានីភ្នំពេញ ៖ ប្ដីប្រពន្ធ១គូ ខណៈជិះម៉ូតូ១គ្រឿង ដឹកគ្នាទៅហូបការគេដល់ពាក់កណ្ដាលផ្លូវ ស្រាប់តែមានរថយន្តលាយបេតុង១គ្រឿង បើកបរក្នុងល្បឿនលឿន ជ្រុលទៅបុកពីក្រោយ រួចកិនស្ត្រីជាប្រពន្ធបណ្ដាលឲ្យបែកក្បាលធ្លាយខួរស្លាប់ភ្លាមៗនៅនឹងកន្លែង ចំណែកឯបុរសជាប្ដី និងម៉ូតូត្រូវរថយន្តអូសជាង៤០ម៉ែត្រ រងរបួសធ្ងន់ធ្ងរបំផុត ។
ឧប្បត្តិហេតុនេះ បានកើតឡើងកាលពីវេលាម៉ោង៤និង២០នាទីរសៀលថ្ងៃទី១៥ ខែធ្នូ ឆ្នាំ២០២៥ នៅតាមមហាវិថីឈ្នះឈ្នះ ស្ថិតនៅជិតផ្លូវរថភ្លើងខ្សែភ្នំពេញ-កំពត ក្នុងភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ស្ត្រីជាប្រពន្ធ ដែលស្លាប់ឈ្មោះ តំ ស្រីតែម អាយុជាងជិត៣០ឆ្នាំ មុខរបរកម្មការិនីរោងចក្រកាត់ដេរ យ៉ាកជីង កំបូល មានស្រុកកំណើតនៅស្រុកបរិបូរណ៍ ខេត្តកំពង់ឆ្នាំង។ ដោយឡែកបុរសជាប្ដីដែលរងរបួសធ្ងន់ឈ្មោះ សំ សុខម៉ៃ អាយុ៣១ឆ្នាំមុខរបរកម្មកររោងចក្រ កាត់ដេរ យ៉ាកជីង កំបូលជាមួយគ្នា មានស្រុកកំណើតនៅខេត្តកំពង់ធំ ពួកគាត់ទាំង២នាន់នេះមានកូន២នាក់ ក្នុងបន្ទុកគ្រួសារ ។
មិត្តភក្ដិជនរងគ្រោះ បាននិយាយថា នៅមុនពេលកើតហេតុ ជនរងគ្រោះទាំង២នាក់ ប្ដីប្រពន្ធ បានជិះម៉ូតូ ១គ្រឿង ម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ 1CE-1035 ឌុបគ្នាចេញពីខេត្តកំពង់ឆ្នាំង ទៅហូបការគេ ដោយធ្វើដំណើរតាមមហាវិថីឈ្នះ-ឈ្នះ ក្នុងទិសដៅពីជើងទៅត្បូង។ លុះពេលទៅដល់ត្រង់ចំណុចកើតហេតុ ស្រាប់តែមានរថយន្តលាយបេតុង ១គ្រឿង ម៉ាក HOWO ពណ៌ស ពាក់ស្លាកលេខព្រះសីហនុ 5A-0890 បើកបរស្របគ្នា ទៅដល់បុកពីក្រោយទាំងកំរោល ។
ប្រភពដដែល បានប្រាប់ឲ្យដឹងបន្តទៀតថា ខណៈនោះបណ្ដាលឲ្យធ្លាក់ស្ត្រីជាប្រពន្ធធ្លាក់ពីលើម៉ូតូ ហើយត្រូវរថយន្តកិនបែកក្បាលស្លាប់ភ្លាមៗនៅនឹងកន្លែង ចំណែកឯបុរសជាប្ដីបានគាបជាប់ជាមួយម៉ូតូត្រូវរថយន្តអូសជាង៤០ម៉ែត្រ រងរបួសខ្ទេចជើងធ្ងន់ធ្ងរ។ បន្ទាប់មករថយន្តបង្កបានឈប់ហើយអ្នកបើកបរបានចុះរត់គេចខ្លួនបាត់ ដោយសុវត្ថិភាព ហើយក្រោយពេលកើតហេតុ បុរសជាប្ដីដែលរងរបួស ត្រូវបានរថយន្តពេទ្យដឹកបញ្ជូនទៅសង្គ្រោះបន្ទាន់ភ្លាមៗ។ បន្ទាប់មកទៀត នគរបាលការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះវាស់វែង រួចនាំយករថយន្ត និងម៉ូតូទៅរក្សាទុកនៅរង់ចាំការដោះស្រាយនៅពេលក្រោយ ៕
ចែករំលែកព័តមាននេះ