រាជធានីភ្នំពេញ ៖ បុរសជាជនអនាថា និងមានសតិមិនប្រក្រតីម្នាក់បានដើរទៅដេកនៅកណ្តាលផ្លូវ ចៃដន្យមានរថយន្តជាច្រើនគ្រឿងបើកបរក្នុងល្បឿនលឿនមើលមិនឃើញក៏បានកិនពីលើ បណ្តាលអោយជនរងគ្រោះរងរបួសបែកក្បាលហូរឈាមស្លាប់ពេលបញ្ជូនទៅសង្គ្រោះនៅមន្ទីរពេទ្យ ។
ហេតុការណ៍ខាងលើនេះដែរបានកើតឡើងកាលពីវេលាម៉ោង១រំលងអធ្រាត្រឈានចូលថ្ងៃទី១៥ ខែឧសភា ឆ្នាំ២០១៩ ត្រង់ចំណុចស្តុបចេនឡាន ផ្សារដើមគ ផ្លូវព្រះមុនីរ៉េត កែងនឹងផ្លូវម៉ៅសេងទុង សង្កាត់បឹងសាឡាង ខណ្ឌទួលគោក ។
បុរសរងគ្រោះដែលស្លាប់មិនត្រូវបានស្គាល់អត្តសញ្ញាណ ត្រូវបានប្រជាពលរដ្ឋអះអាងថា ជាជនអនាថានិងមានសតិប្រក្រតី ។
តាមប្រភពពីបងប្អូនប្រជាពលរដ្ឋដែលរស់នៅក្បែរកន្លែងកើតហេតុបានអោយដឹងថា ពួកគាត់តែងតែសង្កេតឃើញបុរសរងគ្រោះជាជនអនាថា និងមានសតិមិនប្រក្រតីខាងលើតែងតែដើរទៅមកៗនៅចំណុចស្តុបផ្សារដើមគរនេះ ហើយជួនកាលបុរសរងគ្រោះម្នាក់នោះតែងតែទៅអង្គុយ និងដេកកណ្កាលផ្លូវជាញឹកញាប់ ដោយឃើញបែបនេះ ពួកគាត់ក៏បានទៅដេញចេញ កុំអោយទៅដេក និងអង្គុយកណ្ដាលផ្លូវ ក្រែងមានគ្រោះថ្នាក់ជាយថាហេតុណាមួយកើតឡើងផងដែរ ។
តាមប្រភពដដែលបានបន្តទៀតថា លុះមកដល់វេលាយប់ថ្ងៃកើតហេតុ ជនរងគ្រោះខាងលើក៏បានដើរទៅអង្គុយនិងដេកនៅកណ្តាលផ្លូវត្រង់ចំណុចខាងលើ ស្របពេលនេះដែរ ក៏ឃើញមានរថយន្តស៊េរីទំនើបដែលធ្វើដំណើរឆ្លងកាត់ទីនោះមើលមិនឃើញ ក៍បានកិនលើបុរសរងគ្រោះ ជាបន្តបន្ទាប់ចំនួន៣គ្រឿង បណ្ដាលអោយជនរងគ្រោះរងរបួសបែកក្បាលហូរឈាមសន្លប់ស្តូកស្តឹងតែម្តង ។ ដោយឡែកនៅពេលដែលកិនមនុស្សរួចហើយ រថយន្តក៏បានបន្ថែមល្បឿនបើកគេចបាត់ស្រមោលអស់ ។
បន្ទាប់ពីកើតហេតុ ត្រូវបានសមត្ថកិច្ចទំនាក់ទំនងហៅរថយន្តសង្គ្រោះមកដឹកយកជនរងគ្រោះទៅសង្គ្រោះនៅមន្ទីរពេទ្យកាល់ម៉ែត្រ តែជាអកុសលពេលទៅដល់មន្ទីរពេទ្យ ជនរងគ្រោះស្លាប់បាត់ទៅហើយ ។
ក្រោយកើតហេតុ សពជនរងគ្រោះត្រូវបានសមត្ថកិច្ចចាត់ចែងយកទៅតម្កល់ទុកនៅវត្តទឹកថ្លាដើម្បីធ្វើការបូជា ៕
ចែករំលែកព័តមាននេះ