ខេត្តមណ្ឌលគិរី ៖ ស្នងការនគរបាលខេត្តបានឲ្យដឹងថា សមត្ថកិច្ចបានប្រើពេល២០ថ្ងៃគត់ក្នុងការបំបែកសំណុំរឿងឃាតកម្ម ដែលបានកើតឡើងកាលពីអំឡុងពេលចូលឆ្នាំថ្មីកន្លងទៅនៅស្រុកកែវសីមា ហើយនៅព្រឹកថ្ងៃទី១២ ខែឧសភា ជនសង្ស័យត្រូវបានកម្លាំងនគរបាលនាំខ្លួនទៅធ្វើត្រាប់ឡើងវិញនៅកន្លែងកើតហេតុ ស្ថិតក្នុងភូមិក្មូម ឃុំស្រែឈូក ស្រុកកែវសីមា ។ លោកស្នងការបានឱ្យដឹងថា ក្រោយពេលកើតហេតុភ្លាម សមត្ថកិច្ចមិនទាន់ឃាត់ខ្លួនជនសង្ស័យទេ គ្រាន់តែកំណត់មុខសញ្ញាជាក់លាក់ ។
បន្ទាប់មក សមត្ថកិច្ចបានឃាត់ខ្លួនមនុស្ស៣នាក់ពីបទលាក់ទុកអាវុធខុសច្បាប់។ លុះក្រោយពីស្រាវជ្រាវយ៉ាងយកចិត្តទុកដាក់ ទើបឈានដល់ឃាត់ខ្លួនជនសង្ស័យដែលជាខ្មាន់កាំភ្លើងតែម្ដង ។ ខ្មាន់កាំភ្លើងដែលបាញ់ប្រហារជនរងគ្រោះឈ្មោះ ណន ម៉ៅ ភេទប្រុស អាយុ៣៩ឆ្នាំ ជនជាតិព្នង មានទីលំនៅក្នុងភូមិក្មូម
ឃុំស្រែឈូក ស្រុកកែវសីមា ។ នៅពេលសមត្ថកិច្ចសាកសួរជនសង្ស័យបានសារភាពថា មូលហេតុដែលខ្លួន
ឈានដល់ការបាញ់ប្រហារជនរងគ្រោះព្រោះតែរឿងទំនាស់ព្រំដី និងបានចោទជនរងគ្រោះថា ចេះអំពើអាបធ្មប់ទៀតផង ។
គួររំឭកថា ករណីអំពើឃាតកម្មដ៏ព្រៃផ្សៃនេះបានកើតឡើងកាលវេលាម៉ោង៨និង៥១នាទីយប់ថ្ងៃទី១៤ ខែមេសា ឆ្នាំ២០១៩ នៅចំណុចរយ៉ង ភូមិក្មូម ឃុំស្រែឈូក ។ ជនល្មើសបានបាញ់ប្រហារពីក្រោមផ្ទះ គឺឈរបាញ់ផ្ជុចពីក្រោមរនាបផ្ទះខ្ពស់ ខណៈជនរងគ្រោះកំពុងដេកមើលទូរស័ព្ទលើផ្ទះ បណ្តាលឲ្យស្លាប់ភ្លាមនៅលើផ្ទះរបស់ខ្លួន ។ តាមរបាយការណ៍របស់លោក កុយ ចំរើន នាយប៉ុស្តិ៍ស្រែឈូក ឲ្យដឹងថា ជនរងគ្រោះ ឈ្មោះ ប្យុច ផុស អាយុ៣៩ឆ្នាំ ជនជាតិព្នង ជាកសិករ មានប្រពន្ធឈ្មោះ ស្រោញ ចែវ និងមានកូនចំនួន៧នាក់(ស្រី៦នាក់) ។
មុនពេលកើតហេតុ ជនរងគ្រោះខណៈត្រឡប់មកពីព្រៃវិញ ក៏បានទៅចូលរួមក្នុងពិធីសែនព្រេនបុណ្យចូលឆ្នាំថ្មី រួចផឹកស្រាបៀរអស់៣កំប៉ុង ជាមួយអ្នកភូមិ ។ នៅពេលត្រឡប់មកដល់ផ្ទះវិញបានដេកមើលទូរស័ព្ទជាមួយកូន ស្រាប់តែមានឃាតករកំណាចមកបាញ់ពីក្រោមផ្ទះត្រូវពោះចំនួន២គ្រាប់ បណ្តាលឲ្យស្លាប់ភ្លាមនៅលើផ្ទះ ៕
ចែករំលែកព័តមាននេះ