ពុទ្ធោអើយ! បុកចូលក្រោមកុងតឺន័រអូសជាច្រើនរយម៉ែត្រ ផ្អើលពលរដ្ឋដេញតាមឃាត់

ថ្ងៃទី ១៤ ខែ ឧសភា ឆ្នាំ ២០១៩
ម៉ោង ០៩:៥៥
យឹម ឈឿន

រាជធានីភ្នំពេញ ៖ យុវជន២ជិះម៉ូតូមួយគ្រឿងក្នុងល្បឿនលឿនមិនបានមើលរថយន្តកុងតឺន័របើកឆ្លងផ្លូវស្រាប់តែម៉ូតូជាន់ហ្វាំងមិនជាប់ក៏បុកចូលក្រោមរថយន្តកុងតឺន័រ ហើយរថយន្តកុងតឺន័របានបន្ថែមល្បឿនអូសម៉ូតូដែលជាប់ក្រោមរថយន្តជាច្រើនរយម៉ែត្រ សំណាងល្អរថយន្តកុងតឺន័រមិនបានកិនមនុស្សនោះទេ តែបណ្តាលឲ្យរងរបួសធ្ងន់ម្នាក់ និងស្រាលម្នាក់ ។

ហេតុការណ៍ខាងលើនេះបង្កឲ្យមានការភ្ញាក់ផ្អើលកាលពីវេលាម៉ោង៩យប់ថ្ងៃទី១៣ ខែឧសភា ឆ្នាំ២០១៩ នៅតាមបណ្ដោយផ្លូវមហាវិថីឈ្នះឈ្នះ ហៅផ្លូវទំនប់កប់ស្រូវ ដែលស្ថិតនៅ ភូមិសំរោង សង្កាត់ សំរោងក្រោម ខណ្ឌពោធិ៍សែនជ័យ ។

ជនរងគ្រោះទាំង២នាក់មិនបានប្រាប់ឈ្មោះនោះទេ គ្រាន់តែដឹងថា ពួកគាត់ទាំងពីរនាក់ជិះម៉ូតូមួយគ្រឿងម៉ាកវ៉េវ ពណ៌ខ្មៅ ពាក់ស្លាកលេខ បាត់ដំបង ១B-៥០០០ បើកបរក្នុងទិសដៅពីជើងទៅត្បូង បានរងរបួសធ្ងន់ម្នាក់ និងស្រាលម្នាក់។ ចំណែករថយន្តកុងតឺន័រ ម៉ាកហ៊ីណូ ពណ៌សលាយលឿង ពាក់ស្លាកលេខ ភ្នំពេញ ៣C-៦៦២៤ បើកបរចេញពីផែស្ងួត ដេប៉ូតេងឡាយថ្មី បើកបរឆ្លងផ្លូវក្នុងទិសដៅពីលិចទៅកើត ហើយបត់ឆ្វេង ។

តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញជនរងគ្រោះទាំង២នាក់ជិះម៉ូតូមួយគ្រឿងម៉ាក ធ្វើដំណើរក្នុងទិសដៅពីជើងទៅត្បូងក្នុងល្បឿនយ៉ាងលឿន លុះមកដល់ចំណុចកើតហេតុ ស្របពេលមានរថយន្តកុងតឺន័រមួយគ្រឿងបើកចេញពីផែស្ងួតដេប៉ូតេងឡាយក្នុងទិសដៅពីលិចទៅកើតឆ្លងផ្លូវហើយបត់ឆ្វេង ធ្វើឲ្យម៉ូតូជនរងគ្រោះជាន់ហ្វ្រាំងមិនជាប់ក៏បានបុកចូលក្រោមរថយន្តកុងតឺន័រ ហើយត្រូវរថយន្តកុងតឺន័រអូសជាច្រើនរយម៉ែត្រ ចំណែកអ្នកជិះម៉ូតូទាំង២នាក់ខ្ទាតចេញពីរថយន្តកុងតឺន័រ បណ្តាលឱ្យអ្នកបើកម៉ូតូរងរបួសធ្ងន់ រីឯអ្នករួមដំណើរម្នាក់បានរងរបួសស្រាល ។

តាមប្រភពព័ត៌មានដដែលបានបន្តទៀតថា ខណៈពេលភ្លាមៗនោះ ដោយសារតែរថយន្តកុងតឺន័របន្ថែមល្បឿនអូសម៉ូតូជាច្រើនរយម៉ែត្រ ត្រូវបានប្រជាពលរដ្ឋនាំគ្នាជិះម៉ូតូដេញតាមពីក្រោយ ហើយឃាត់រថយន្តកុងតឺន័របានភ្លាមៗផងដែរ តែអ្នកបើកបររថយន្តកុងតឺន័របានចុះពីលើរថយន្តកុងតឺន័រហើយរត់គេចខ្លួនបាត់ស្រមោល ។ ចំណែកជនរងគ្រោះទាំង២នាក់ខាងលើត្រូវបានរថយន្តសាមុយរបស់គ្លីនិកឯកជនបានដឹកជនរងគ្រោះយកទៅសង្គ្រោះភ្លាមៗផងដែរ។

ក្រោយពេលកើតហេតុ មន្ត្រីជំនាញចរាចរណ៍ខណ្ឌពោធិ៍សែនជ័យបានចុះមកធ្វើការវាស់វែងទាំងនឹកស្មានមិនដល់សោះ ព្រោះឃើញរថយន្តកុងតឺន័រខាងលើបើកអូសម៉ូតូជាច្រើនរយម៉ែត្រយ៉ាងនេះ ហើយជំនាញចរាចរណ៍ខណ្ឌពោធិ៍សែនជ័យខាងលើបានធ្វើការវាស់វែងនិងយករថយន្តព្រមទាំងម៉ូតូរងគ្រោះ ទៅរក្សាទុកដើម្បីរង់ចាំការដោះស្រាយនៅពេលក្រោយ ៕