ខេត្តកណ្តាល ៖ គួរឱ្យរន្ធត់ណាស់ ជិះម៉ូតូមួយគ្រឿងឌុបគ្នា២នាក់ប្តីប្រពន្ធ រួមទាំងកូនម្នាក់ទៀត ត្រូវរថយន្តកិនអូសជាច្រើនម៉ែត្រ ខ្ទេចខ្លួនស្លាប់ទាំង២នាក់ប្តីប្រពន្ធ នៅសល់តែកូនស្រីអាយុ៣ឆ្នាំ នៅមានជីវិត តែរងរបួសធ្ងន់…
ខេត្តកណ្តាល ៖ គួរឱ្យរន្ធត់ណាស់ ជិះម៉ូតូមួយគ្រឿងឌុបគ្នា២នាក់ប្តីប្រពន្ធ រួមទាំងកូនម្នាក់ទៀត ត្រូវរថយន្តកិនអូសជាច្រើនម៉ែត្រ ខ្ទេចខ្លួនស្លាប់ទាំង២នាក់ប្តីប្រពន្ធ នៅសល់តែកូនស្រីអាយុ៣ឆ្នាំ នៅមានជីវិត តែរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ ។
ហេតុការណ៍នេះបានកើតឡើងកាលពីវេលាម៉ោង ៦និង២០នាទីព្រឹកថ្ងៃទី២៦ ខែកុម្ភៈ ឆ្នាំ២០២៦ នៅចំណុចលើផ្លូវបេតុង9NG ស្ថិតក្នុងភូមិព្រែកលួង សង្កាត់ ព្រែកលួង ក្រុង អរិយក្សត្រ ខេត្តកណ្តាល។
សមត្ថកិច្ចនគរបាលចរាចរណ៍ខេត្តកណ្តាលបានឲ្យដឹងថា គ្រោះថ្នាក់ចរាចរណ៍នេះ កើតឡើងរវាង រថយន្ត០១គ្រឿងម៉ាក DONGFENG ពណ៌ ស ពាក់ផ្លាកលេខភ្នំពេញ3D-2986 បើកបរដោយឈ្មោះ មឿន សេងលី ភេទ ប្រុស អាយុ ២០ ឆ្នាំ មានទីលំនៅភូមិ ទន្លេបិទលើ ឃុំ ទន្លេ ស្រុកត្បូងឃ្មុំ ខេត្តកំពុងចាម (រត់គេចខ្លួន) បើកបរពីកើតទៅលិច ពេលបើកមកដល់ចំណុចកើតហេតុ ក៏បានបុកពីក្រោយអូសប្រហែល៣០ម៉ែត្រ ជាមួយម៉ូតូ១គ្រឿងម៉ាក Honda Dream C125 ពណ៌ខ្មៅ ពាក់ផ្លាកលេខ កណ្តាល1AD-0916 ដែលកំពុងបើកបរស្របទិសគ្នា ដោយឈ្មោះ រុំ វ័ន ភេទ ប្រុស អាយុ ៣២ឆ្នាំ ជនជាតិ ខ្មែរ មានទីលំនៅ ភូមិ ព្រៃចាស់ ឃុំ វិហារសួគ៍ស្រុក ខ្សាច់កណ្ដាល ខេត្ត កណ្តាល (ស្លាប់នៅកន្លែងកើតហេតុ)និង អ្នករួមដំណើរ២នាក់ ៖
១-ឈ្មោះ តូច ល័ង ភេទ ស្រី អាយុ ២៨ ឆ្នាំ (ស្លាប់នៅកន្លែងកើតហេតុ)
២-ឈ្មោះ វ័ន ស្រីលក្ខ ភេទ ស្រី អាយុ ៣ឆ្នាំ(របួសធ្ងន់)អ្នកទាំងពីរមានទីលំនៅភូមិឃុំជាមួយគ្នា។
ភ្លាមៗសមត្ថកិច្ចជំនាញចរាចរណ៍បានចុះមកធ្វើការវាស់វែង ដល់ទីតាំងកើតហេតុ និងបានសន្និដ្ឋានថា បណ្តាលមកពី អ្នកបើកបររថយន្តបើកបរខ្វះការប្រុងប្រយត្ន័មិនបានមើលឧបសគ្គខាងមុខ ។ បន្ទាប់ពិកើតហេតុ អ្នកបើកបររថយន្តរត់គេចបាត់ និងបានបញ្ជូនក្មេងស្រីដែលរបួសធ្ងន់ទៅសង្គ្រោះបន្ទាន់នៅមន្ទីរពេទ្យ ។
ដោយឡែកម៉ូតូនិងរថយន្តត្រូវបានសមត្ថកិច្ចធ្វើការវាស់វែង យកទៅរក្សាទុកបណ្តោះអាសន្ននៅប៉ុស្តិ៍នគរបាលរដ្ឋបាលសង្កាត់ព្រែកលួងដើម្បីបន្តចាត់ការតាមនិតីវិធីច្បាប់ និងប្រគល់សពទៅឲ្យសាច់ញាតិធ្វើបុណ្យតាមប្រពៃណី ៕
ចែករំលែកព័តមាននេះ