ទឹកថ្នាំខ្ពុរមាត់មានអត្ថប្រយោជន៍ច្រើនណាស់ក្នុងការថែរក្សាសុខភាពមាត់ធ្មេញ ដែលជួយឱ្យធ្មេញមានសុខភាពល្អ បំបាត់ក្លិនស្អុយក្នុងមាត់ និងជួយការពារអញ្ចាញធ្មេញជាដើម ។ ប៉ុន្តែទឹកថ្នាំខ្ពុរមាត់ក៏បានផ្តល់ផលវិបាកវិញដែរ បើសិនជាលោកអ្នកប្រើខុស ពោលគឺមិនប្រើទៅតាមការណែនាំរបស់អ្នកជំនាញ ។
លោកទន្តបណ្ឌិតញាណ ភិរម្យ ប្រធានក្រុមគ្រូពេទ្យ នៃមន្ទីរព្យាបាលធ្មេញបស្ចិមបានប្រាប់កោះសន្តិភាពឱ្យដឹងថា ទឹកថ្នាំខ្ពុរមាត់គឺជាសូល្យុងម្យ៉ាង ដែលមានលាយសារធាតុជាច្រើន រួមមានទាំងជាតិអាល់កុលផងដែរ ទៅតាមប្រភេទនៃទឹកថ្នាំខ្ពុរមាត់ ។ ចំពោះទឹកថ្នាំខ្ពុរមាត់ខ្លះមានជាតិអាល់កុលដល់ទៅ២៦,៦% ហើយទឹកខ្ពុរមួយចំនួនទៀតមានត្រឹមតែ១៨,៩ភាគរយ ឬ១៤,៥ភាគរយទៅតាមប្រភេទទឹកខ្ពុរ ប៉ុន្តែចំពោះទឹកខ្ពុរមាត់ខ្លះក៏មិនមានជាតិអាល់កុលដែរ ហើយទឹកខ្ពុរមាត់មានច្រើនប្រភេទទៅតាមក្លិន និងតាមតម្រូវការរបស់មនុស្ស ។ ពិតណាស់ទឹកថ្នាំខ្ពុរមាត់បានផ្តល់នូវអត្ថប្រយោជន៍ជាច្រើនដូចជា៖
-អាចសម្លាប់មេរោគដែលនៅជុំវិញជាលិកាធ្មេញ ។ ទឹកថ្នាំខ្ពុរមាត់អាចជួយការពារធ្មេញ និងជួយការពារអញ្ចាញធ្មេញឱ្យមានសុខភាព
ល្អ ។ ធ្មេញពុកដែលមានប្រហោងតូចៗ បើសិនទុកយូរទៅអាចក្លាយទៅជាប្រហោងធំរហូតធ្លាយដល់បណ្តូលធ្មេញ តែបើលោកអ្នកប្រើទឹកថ្នាំខ្ពុរមាត់ ការវិវឌ្ឍដែលធ្វើឱ្យធ្មេញខូចនោះ វាអាចទៅជាយឺតយ៉ាវ ឬនៅនឹង ព្រោះខណៈដែលអ្នកប្រើប្រាស់ទឹកខ្ពុរអាចធ្វើឱ្យមេរោគងាប់ជាបន្តបន្ទាប់បន្តិចម្តងៗ ដែលអាចធ្វើឱ្យធ្មេញមានសុខភាពល្អឡើងវិញបាន ។ ចំពោះជាលិកាខ្លះដូចជាអញ្ចាញធ្មេញមានពណ៌ស្រអាប់កាលណាប្រើទឹកថ្នាំខ្ពុរមាត់អាចធ្វើឱ្យជាលិកានៅជុំវិញប្រអប់មាត់មានសុខភាពល្អ និងធ្វើឱ្យមានក្លិនល្អថែមទៀតផង ។ ការប្រើប្រាស់ទឹកថ្នាំខ្ពុរមាត់ក៏អាចជួយឱ្យធ្មេញមិនមានបញ្ហាដូចជារង្គោះរង្គើនោះទេ ។ ស្ត្រីមានផ្ទៃពោះគួរថែធ្មេញឱ្យមានសុខភាពល្អ ព្រោះនៅពេលមានផ្ទៃពោះសុខភាពមាត់ធ្មេញជារឿងសំខាន់ណាស់សម្រាប់ស្ត្រីជាមាតា ។
ធម្មតាទឹកថ្នាំខ្ពុរមាត់បានផ្តល់នូវអត្ថប្រយោជន៍ជាច្រើន ប៉ុន្តែវាក៏បានផ្តល់នូវផលប៉ះពាល់យ៉ាងធ្ងន់ធ្ងរផងដែរ បើសិនជាលោកអ្នកជ្រើសរើសនូវប្រភេទទឹកខ្ពុរមិនល្អ ជាពិសេសមិនបានអនុវត្តទៅតាមការណែនាំរបស់អ្នកជំនាញនោះ ។ ផលប៉ះពាល់ទាំងនោះមានដូចជាទឹកខ្ពុរមាត់ ដែលមានអាល់កុលខ្ពស់អាចបង្កឱ្យកើតជំងឺមហារីក ក្រពេញទឹកមាត់ ដែលករណីនេះច្រើនកើតឡើងចំពោះអ្នកទទួលទានគ្រឿងស្រវឹង និងជក់បារីច្រើន ប៉ុន្តែមានតិចតួចណាស់ ។ ដូច្នេះដើម្បីប្រើប្រាស់ទឹកថ្នាំខ្ពុរមាត់ឱ្យបានត្រឹមត្រូវ មិនបង្កឱ្យកើតបញ្ហានេះ អ្នកត្រូវអនុវត្តទៅតាមការណែនាំរបស់អ្នកជំនាញដូចខាងក្រោម ៖
-លោកអ្នកត្រូវស្វែងយល់ថាទឹកខ្ពុរមានសារជាតិអ្វីខ្លះ? មានការទទួលស្គាល់ត្រឹមត្រូវដែរឬអត់ មានកាលបរិច្ឆេទដែរឬទេ និងមានកម្រិតជាតិអាល់កុលកម្រិតណា? ។ ចំពោះទឹកថ្នាំខ្ពុរមាត់ដែលមានជាតិអាល់កុលច្រើន លោកអ្នកមិនអាចខ្ពុរមាត់បានយូរនោះទេ ។ តើត្រូវប្រើទឹកថ្នាំខ្ពុរមាត់របៀបណា?
-សម្រាប់វិធីដែលល្អបំផុតនៅក្នុងការប្រើប្រាស់ទឹកថ្នាំខ្ពុរមាត់ ជាដំបូងលោកអ្នកត្រូវតែប្រើប្រាស់ទឹកបរិសុទ្ធសម្រាប់លាយជាមួយនឹងទឹកថ្នាំខ្ពុរមាត់ ដើម្បីខ្ពុរមាត់ទុកបានយូរ និងអាចការពារកុំឱ្យក្រហាយ ឬរលាកមាត់ខ្លាំងពេក ។ បើសិនជាលោកអ្នកខ្ពុរមាត់ដោយប្រើទឹកថ្នាំខ្ពុរមាត់ដែលមានជាតិអាល់កុលច្រើន ហើយប្រើតែវាសុទ្ធ លោកអ្នកត្រូវទុកក្នុងមាត់រយៈពេលពី១៥វិនាទីទៅ២០វិនាទីដោយត្រូវគ្រលែង ឱ្យសព្វកន្លែងនៃកោសិកាធ្មេញនៅក្នុងមាត់ ។ បើសិនជាទឹកថ្នាំដែលមានជាតិអាល់កុល លាយជាមួយទឹកបរិសុទ្ធ លោកអ្នកអាចបៀមទុកក្នុងមាត់បានពី៣នាទីទៅ៥នាទី ។
ដើម្បីការពារកុំឱ្យកើតបញ្ហានៅពេលប្រើប្រាស់ទឹកថ្នាំខ្ពុរមាត់ លោកអ្នកត្រូវជ្រើសរើសប្រភេទទឹកថ្នាំខ្ពុរមាត់ដែលមិនមានជាតិអាល់កុលច្រើនពេក ព្រោះជាតិអាល់កុលអាចធ្វើឱ្យក្រហាយមាត់ ហើមអញ្ចាញធ្មេញជាដើម ។ អំបិល ក៏អាចប្រើប្រាស់ជំនួសទឹកថ្នាំខ្ពុរមាត់បានដែរ ព្រោះអំបិលធ្វើឱ្យជាលិកាជុំវិញធ្មេញណែនហាប់ល្អ ហើយមិនធ្វើឱ្យមានឈាមនៅតាមអញ្ចាញធ្មេញថែមទៀតផង ។ ដោយគ្រាន់តែយកអំបិលដាក់លាយជាមួយទឹកក្តៅឧណ្ហៗឱ្យប្រៃល្មម ហើយខ្ពុរត្រឹមតែ២នាទីទៅ៥នាទីបានហើយ ។
គួរចងចាំថា មុននឹងជ្រើសរើសទឹកថ្នាំខ្ពុរមាត់ មកប្រើប្រាស់ លោកអ្នកគួរយល់ដឹងអំពីទឹកថ្នាំខ្ពុរមាត់ឱ្យបានច្រើន ជាពិសេសមិនត្រូវជ្រើសរើសទឹកថ្នាំខ្ពុរមាត់ណាដែលមានជាតិអាល់កុលច្រើនពេកនោះទេ ។ គប្បីយល់ថាការទទួលទានគ្រឿងស្រវឹង និងបារីច្រើន ស្របពេលកំពុងប្រើប្រាស់ទឹកថ្នាំខ្ពុរមាត់ដែលមានជាតិអាល់កុលច្រើនផងដែរនោះ ជាកត្តាមួយដែលអាចធ្វើឱ្យលោកអ្នកកើតជំងឺមហារីក្រពេញទឹកមាត់ ។ ប្រការល្អគួរចៀសវាង ឬថាបើមិនអាចខានបានគួរបន្ថយចំពោះការទទួលទានគ្រឿងស្រវឹង និងពិសាបារី ៕
ចែករំលែកព័តមាននេះ