ខេត្តមណ្ឌលគិរី ៖ ស្នងការខេត្តមណ្ឌលគិរី បានឲ្យដឹងថា សមត្ថកិច្ចបានប្រើពេល២០ថ្ងៃគត់ ក្នុងការបំបែកសំណុំរឿងឃាតកម្មដែលបានកើតឡើងអំឡុងពេលចូលឆ្នាំខ្មែរនៅស្រុកកែវសីមា ហើយព្រឹកថ្ងៃទី១២ ម្សិលមិញនេះ ជនសង្ស័យត្រូវបានកម្លាំងនគបាលនាំខ្លួនទៅធ្វើត្រាប់ឡើងវិញនៅកន្លែងកើតហេតុ ស្ថិតនៅក្មូម ឃុំស្រែឈូក ស្រុកកែវសីមា ខេត្តមណ្ឌលគិរី។
លោកស្នងការបានបន្តទៀតថា ភ្លាមៗក្រោយពេលកើតហេតុ សមត្ថកិច្ចមិនទាន់ឃាត់ជនសង្ស័យនោះ គ្រាន់តែកំណត់មុខសញ្ញាជាក់លាក់ ។ បន្ទាប់មកកម្លាំងជំនាញបានឃាត់ខ្លួនមនុស្សចំនួន៣នាក់ពីរបទលាក់ទុកអាវុធខុសច្បាប់។ ក្រោយពីស្រាវជ្រាវយ៉ាងយកចិត្តទុកដាក់ ទើបឈានដល់ឃាត់ខ្លួនជនសង្ស័យដែលជាខ្មាន់កាំភ្លើងតែម្ដង ។
ខ្មាន់កាំភ្លើងដែលធ្វើការបាញ់ប្រហារលើជនរងគ្រោះខាងលើនោះមានឈ្មោះ ណន ម៉ៅ ភេទប្រុស អាយុ៣៩ឆ្នាំ មានទីលំនៅភូមិក្មូម ឃុំស្រែឈូក ស្រុកកែវសីមា ។ ក្រោយពេលសមត្ថកិច្ចសួរចម្លើយ ជនសង្ស័យបានសារភាពទាំងអស់ ហើយមូលហេតុដែលជនសង្ស័យឈានដល់ការបាញ់ប្រហាលើជនរងគ្រោះ ដោយសាររឿងទំនាស់ព្រំដី និងបានចោទជនរងគ្រោះថា ចេះអំពើអាបធ្មប់។
គួររំលឹកដែរថា ករណីអំពើឃាតកម្មដ៏ព្រៃផ្សៃមួយ បានកើតឡើងនៅម៉ោង៨និង៥១នាទីយប់ ថ្ងៃទី១៤ ខែមេសា ឆ្នាំ២០១៩ នៅចំណុចរយ៉ង ភូមិក្មូម ឃុំស្រែឈូក ស្រុកកែវសីមា ខេត្ដមណ្ឌលគីរី។ ជនល្មើសបានបាញ់ប្រហារទៅលើជនរងគ្រោះម្នាក់ បណ្តាលឲ្យស្លាប់ភ្លាមៗនៅនឹងកន្លែងតែម្តង។
បើតាមរបាយការណ៍លោក កុយ ចំរើន នាយប៉ុស្តិ៍ស្រែឈូក បានឲ្យដឹងថា ជនរងគ្រោះ មានឈ្មោះ ប្យុច ផុស អាយុ៣៩ឆ្នាំ មុខរបរកសិករ មានប្រពន្ធឈ្មោះ ស្រោញ ចែវ មានកូនចំនួន៧នាក់ ក្នុងស្រី៦នាក់ មានទីលំនៅកន្លែងកើតហេតុខាងលើ។
ហើយមុនពេលកើតហេតុ ជនរងគ្រោះត្រឡប់មកពីព្រៃវិញជាធម្មតាដូចសព្វមួយដង បន្ទាប់មកជនរងគ្រោះបានទៅចូលរួមកម្មវិធីសែនព្រេនបុណ្យចូលឆ្នាំថ្មី រួចផឹកស្រាបៀអស់៣កំប៉ុងជាមួយអ្នកភូមិ រួចក៏ត្រឡប់មកផ្ទះវិញ និងបានដេកមើលទូរស័ព្ទជាមួយកូន ស្រាប់តែមានជនមិនស្គាល់មុខមកបាញ់ពីក្រោមផ្ទះត្រូវចំពោះចំនួន២គ្រាប់ ធ្វើឱ្យជនរងគ្រោះបានស្លាប់ភ្លាមៗនៅលើផ្ទះតែម្តង៕
គួររំលឹកទៀតថា ៖ តក់ស្លុត! ខណៈកំពុងលេងទូរស័ព្ទជាមួយកូនៗ ស្រាប់តែសំឡេងឪពុកស្រែកទៅកូនថា «គេបាញ់ពុកហើយ»
ចែករំលែកព័តមាននេះ