ខេត្តមណ្ឌលគិរី ៖ បើតាមសេចក្តីរាយការន៍បានឱ្យដឹងថា បុរសជនជាតិព្នងម្នាក់បានស្លាប់ភ្លាមៗនៅលើផ្ទះ ក្រោយរងនូវការបាញ់ប្រហារពីខ្មាន់កាំភ្លើង កាលពីម៉ោង៨យប់ ថ្ងៃទី១៤ មេសា ២០១៩ ស្ថិតក្នុងភូមិខ្អួម ឃុំស្រែឈូក ស្រុកកែវសីមា ខេត្តមណ្ឌលគិរី ។
សេចក្តីរាយការណ៏បានឲ្យដឹងថា ជនរងគ្រោះជាជនជាតិព្នងឈ្មោះ ប្យុច ផុស ភេទប្រុស អាយុ៣៩ឆ្នាំ មុខរបរកសិករ មានប្រពន្ធឈ្មោះ ស្រោញ ចែវ មានកូនក្នុងបន្ទុកចំនួន៧នាក់ ក្នុងនោះស្រី៦នាក់ រស់នៅភូមិ-ឃុំកើតហេតុខាងលើ។
ប្រភពពីកន្លែងកើតហេតុបានបញ្ជាក់ថា មុនពេលកើតហេតុ ជនរងគ្រោះបានត្រឡប់មកពីបណ្តើរឆ្កៃរកសត្វក្នុងព្រៃវិញនៅម៉ោងប្រមាណ៦និង៣២នាទីល្ងាច ថ្ងៃទី១៤ មេសា ដោយចាប់បានសត្វត្រគួត៤ក្បាល និងកូនជ្រូកព្រៃ១ក្បាល លុះដល់ម៉ោង៧និង១០នាទីយប់ជនរងគ្រោះក៏ទៅចូលរួមកម្មវិធី សែនព្រេនបុណ្យចូលឆ្នាំថ្មី រួចផឹកស្រាបៀរអស់៣កំប៉ុង ក៏ត្រឡប់ទៅផ្ទះរបស់គាត់វិញ។
ប្រភពដដែលបន្តថា នៅពេលមកដល់លើផ្ទះ ជនរងគ្រោះបានដេកលេងទូរស័ព្ទជាមួយកូនៗនៅលើផ្ទះ រំពេចនោះស្រាប់តែមានជនមិនស្គាល់មុខលបបាញ់ពីក្រោមផ្ទះ ចំពោះជនរងគ្រោះចំនួន២គ្រាប់ ។ ភ្លាមៗជនរងគ្រោះបានស្រែកប្រាប់ទៅកូនថា គេបាញ់ពុកហើយ ហើយក៏ស្លាប់តែម្តង។
លុះមកដល់នៅថ្ងៃទី១៥ មេសា អភិបាលខេត្តមណ្ឌលគិរីលោកស្វាយ សំអ៊ាង បានដាក់វិធានការដល់កងកម្លាំងមានសមត្ថកិច្ចត្រូវតែស៊ើបអង្កេត និងចាប់ខ្លួនជនដៃដល់មកផ្តន្ទាទោសឲ្យខានតែបាន។ នៅថ្ងៃដដែលនេះ លោក ស្វាយ សំអ៊ាង បានដឹកនាំកងកម្លាំងទាំង៣ប្រភេទរួមនឹងក្រុមសម្ព័ន្ធយុវជនស្រលាញ់សន្តិភាព ចុះសួរសុខទុក្ខ និងផ្តល់អំណោយដល់គ្រួសារជនរងគ្រោះ។ លោកអភិបាលខេត្តបានសម្តែងក្តីសោកស្តាយចំពោះឃាតកម្មមួយនេះយ៉ាងខ្លាំង ព្រមទាំងបានជួយជ្រោមជ្រែងថវិកាមួយចំនួនដល់ការធ្វើបុណ្យសពជនរងគ្រោះផងដែរ។
លោកអភិបាលខេត្តបានឧបត្ថមថវិកាចំនួន២លានរៀល ព្រមទាំងគ្រឿងឧបភោគ និងបរិភោគជូនគ្រួសាររងគ្រោះ ចំណែកលោកនួន សារ៉ន អភិបាលស្រុកកែវសីមា បានផ្តល់ថវិកា៣៥ម៉ឺនរៀល និងលោក ប៉ៃ លិន មេបញ្ជាការអាវុធហត្ថស្រុកកែវសីមា ចំនួន២០ម៉ឺនរៀលបន្ថែមផងដែរ៕
ចែករំលែកព័តមាននេះ