ឆេះឡានមួយគ្រឿងក្នុងយានដ្ឋានជួសជុល ផ្អើលទាំងកណ្ដាលអធ្រាត្រ
- បាត់ដំបង
ខេត្តបាត់ដំបង ៖ ទំនងអាចបណ្ដាលមកពីការ «ឆ្លងចរន្តអគ្គិសនី» ទើបបង្កជាអគ្គិភ័យឆាបឆេះរថយន្តមួយគ្រឿងអស់គ្មានសល់ បង្កឲ្យមានការភ្ញាក់ផ្អើល នៅវេលាម៉ោងជាង១២រំលងអធ្រាត្រ ឈានចូលថ្ងៃទី០៦ មិថុនា នៅក្នុងយានដ្ឋានជួសជុលរថយន្តមួយកន្លែង នៅភូមិវត្តគរ សង្កាត់វត្តគរ ក្រុងបាត់ដំបង តែមិនបង្កគ្រោះថ្នាក់ដល់មនុស្សទេ ។
តាមរយៈរបាយការណ៍មន្ត្រីជំនាញបានឲ្យដឹងថា រថយន្តនោះត្រូវអគ្គិភ័យឆាបឆេះនៅក្នុងយានដ្ឋាន «រ៉ាន សារ៉ា» ដែលមានទីតាំងនៅចំណុចខាងលើ ។ រថយន្តនោះម៉ាក TOYOTA ពាក់ស្លាកលេខ បាត់ដំបង 2C-9136 ជារថយន្តដែលភ្ញៀវយកទៅជួសជុល ។ នេះបើតាមការសួរនាំរបស់សមត្ថកិច្ច ។
ម្ចាស់យានដ្ឋានបានដាក់ការសង្ស័យជំហានដំបូងថា អគ្គិភ័យនោះ អាច «ឆ្លងចរន្ត» ទើបបង្កជាអគ្គិភ័យឆេះរថយន្តនោះឡើងហ្មត់ ។ នេះបើតាមសមត្ថកិច្ចបានស្រង់សម្ដីម្ចាស់យានដ្ឋាននោះ ។
អគ្គិភ័យបានលេបត្របាក់យករថយន្តនោះស្ទើរអស់ទាំងស្រុង សល់តែគ្រោងឆ្អឹងដែក មុនពេលរថយន្តពន្លត់អគ្គិយរបស់សមត្ថកិច្ចចុះទៅដល់ ។ គេមិនទាន់ដឹងថា តើម្ចាស់យានដ្ឋានត្រូវទទូលខុសត្រូវបែបណា ចំពោះរថយន្តភ្ញៀវដែលយកទៅជួសជុល ហើយត្រូវអគ្គិភ័យឆេះខូចខាតអស់នៅក្នុងយានដ្ឋានរបស់ខ្លួន ។
គេមិនទាន់ទទួលបានការបំភ្លឺបែបណាពីម្ចាស់យានដ្ឋាននៅឡើយទេ មកទល់ពេលនេះ ពាក់ព័ន្ធនឹងរថយន្តអតិថិជនយកទៅជួសជុលហើយត្រូវភ្លើងឆេះ។ ប៉ុន្តែយ៉ាងណា ពេលនេះ មន្ត្រីជំនាញកំពុងសួរនាំអំពីគ្រោះមហន្តរាយនេះនៅឡើយទេ ដើម្បីស្វែងរកការពិត ដែលនាំឲ្យមានអគ្គិភ័យឆេះរថយន្តក្នុងយានដ្ឋានជួសជុល៕
ចែករំលែកព័តមាននេះ