ទីក្រុងអាប៊ូចា៖ អាជ្ញាធរប្រទេសនីហ្សេរីយ៉ាថ្លែងថាមនុស្សយ៉ាងតិច៤៩នាក់បានទទួលមរណភាពដោយសារស្រេកទឹកខះកខ្លាំងពេកនៅលើវាលខ្សាចសាហារ៉ាដ៏សែនដាច់ស្រយាលស្ថិតនៅប្រទេសនីហ្សេភាគខាងជើង។ បញ្ហានេះកើតឡើងដោយសារតែរថយន្តដែលពួកគេបាននោះខូចនៅតាមផ្លូវធ្វើដំណើរ។ ហេតុនេះពួកគេត្រូវគាំងដំណើរនៅមួយកន្លែងអស់រយៈពេលជាច្រើនថ្ងៃ។ ជនរងគ្រោះដែលបានស្លាប់ទាំងនោះស្ថិតនៅក្នុងចំណោមមនុស្សមួយក្រុមដែលវិលត្រឡប់ពីចូលរួមពិធីបុណ្យតាមសាសនាឥស្លាមដែលរៀបចំនៅប្រទេសនីហ្សេ។ ឡានក៏ខូច រីឯទឹកក៏ផឹកអស់ទៀត។ ដូចនេះមានតែសេចក្ដីស្លាប់មួយមុខគត់នៅលើវាលខ្សាច់ដ៏ធំជាងគេនៅក្នុងពិភពលោកមួយនេះ។
អាជ្ញាធរបានបង្ហោះសារនៅលើហ្វេសប៊ុកថាមនុស្ស៤៩នាក់បានស្លាប់ដោយសារការស្រេកទឹកនៅតំបន់ដាច់ស្រយាលចម្ងាយជាង៨០គីឡូម៉ែត្រភាគខាងលិចទីក្រុងអាសាម៉ាកា (Assamaka)។ ទីនេះជាតំបន់ឆ្លងកាត់ដ៏សំខាន់រវាងប្រទេសនីហ្សេ (Niger) និងអាល់ហ្សេរី ហើយក៏មានទីតាំងកៀកនឹងព្រំដែនប្រទេសម៉ាលីផងដែរ។ ដោយសារខ្វះខាតទឹកផឹកផង និងមិនអាចជួសជុលឡានផង ទោះបីមានកិច្ចខិតខំប្រឹងប្រែងពីតៃកុងឡាន, ព្រូឡាន និងអ្នកដំណើរស្រុះដៃគ្នាយ៉ាងណាក្ដី នៅទីបំផុតពួកគេត្រូវតែបង់សង្ខារគ្រប់ៗគ្នា។ នៅទីនោះ គ្មានលក្ខណៈអំណោយផលទាល់តែសោះ។ ម៉្យាងជាតំបន់ដាច់ស្រយាល, ម៉្យាងជាតំបន់ដែលអាកាសធាតុក្ដៅហួតហែងខ្លាំង និងម៉្យាងទៀតគ្មានអ្វីសម្រាប់ផ្គត់ផ្គង់ទាល់តែសោះ។ ដូចនេះ បើជាប់កុននៅទីនោះពិបាកនឹងរស់ណាស់។ គេបានបញ្ចុះសពជនរងគ្រោះទាំងនោះនៅក្នុងរណ្ដៅសាកសពរួម។
មនុស្ស២នាក់អាចរំដោះខ្លួនរួចផុតពីសេចក្ដីស្លាប់បន្ទាប់ពីពួកគេប្រថុយធ្វើដំណើរដោយជើងទទេចម្ងាយជាង៥០គីឡូម៉ែត្រ។ ពួកគេដើរកាន់តែឆ្ងាយក៏ទៅដល់ប្រភពទឹក១កន្លែង។ បន្ទាប់មក ពួកគេក៏បង្ហួសដំណើរទៅដល់ទីក្រុងអាសាម៉ាកា។ គឺនៅទីនោះហើយដែលពួកគេរាយការណ៍អំពីបញ្ហាដែលពួកគេបានឆ្លងកាត់ប្រាប់ទៅអាជ្ញាធរ។ គណៈប្រតិភូមួយក្រុមដែលត្រូវគេបញ្ជូនទៅពិនិត្យមើលកន្លែងកើតហេតុនោះបានស្រាវជ្រាវឃើញថាឡានមួយគ្រឿងនោះបើកបររយៈពេលច្រើនថ្ងៃពេកតាំងពីទីក្រុងតាល់ហាន់ដឹក (Talhandek) នៃប្រទេសម៉ាលីដែលស្ថិតនៅចម្ងាយ៣រយគីឡូម៉ែត្រពីព្រំដែនប្រទេសនីហ្សេរីយ៉ា។
រហូតមកដល់ពេលនេះ គេនៅតែមិនទាន់ដឹងថាតើមូលហេតុអ្វីទើបបានជាឡាននោះខូច ហើយក៏មិនដឹងថាតើអ្នកដំណើរបានរង់ចាំឡានក្រែងលោដំណើរការឡើងវិញនោះរយៈពេលប៉ុន្មានម៉ោង ឬប៉ុន្មានថ្ងៃនោះដែរ។ រាល់ការព្យាយាមរបស់តៃកុងឡាន ព្រូឡាន និងអ្នកដំណើរមិនបានជោគជ័យទេក្នុងការជួសជុលឡាននោះ។ ទិដ្ឋភាពនៅនឹងកន្លែងកើតហេតុគួរឱ្យរន្ធត់ណាស់។ សាកសពមនុស្សរាប់សិបនាក់ដេករដូករណែលពេញហ្នឹង។ តំបន់វាលខ្សាច់នេះត្រូវគេស្គាល់ថាជាកន្លែងដែលជនភៀសខ្លួន និងអ្នកចំណាកស្រុកយកធ្វើជាទីតាំងសំណាក់មួយសំណើសិនមុននឹងបន្តដំណើរពីបណ្ដាប្រទេសនៅទ្វីបអាហ្វ្រិកឆ្លងទៅទ្វីបអឺរ៉ុប។ មនុស្សជាច្រើនធ្លាប់ស្លាប់ដោយសារការស្រេកទឹក ឬការអត់អាហារនៅលើវាលខ្សាច់ដ៏ក្ដៅហួតហែងនេះមិនតិចនាក់ឡើយ៕ ប្រភព៖ Al Jazeera
ចែករំលែកព័តមាននេះ