រាជធានីភ្នំពេញ ៖ កម្លាំងគណៈបញ្ជាការឯកភាពរដ្ឋបាលខណ្ឌច្បារអំពៅ នៅថ្ងៃទី០៥ ខែមិថុនា ឆ្នាំ២០២៦នេះ បានចុះត្រួតពិនិត្យរដ្ឋបាល និងបង្ក្រាបទីតាំងមួយកន្លែង ដែលមានការសង្ស័យថា មានជនបរទេសស្នាក់នៅ និងលួចលាក់ប្រព្រឹត្តបទល្មើសតាមប្រព័ន្ធបច្ចេកវិទ្យា (Online Scams) ។
ប្រតិបត្តិការនេះ ដឹកនាំផ្ទាល់ដោយ លោក ម៉ូវ ម៉ានិត អភិបាល នៃគណៈអភិបាលខណ្ឌច្បារអំពៅ ដោយមានការសម្របសម្រួលនីតិវិធីច្បាប់ពីសំណាក់ លោក វ៉ិត មឃៈ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។ ដោយចុះឆែកឆេរនៅទីតាំងផ្ទះលេខ៩១ ផ្លូវ P-10D ស្ថិតក្នុងភូមិក្តីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ។
យោងតាមរបាយការណ៍របស់អាជ្ញាធរខណ្ឌច្បារអំពៅ បានឱ្យដឹងថា នៅក្នុងប្រតិបត្តិការចុះត្រួតពិនិត្យជាក់ស្តែង កម្លាំងសមត្ថកិច្ចចម្រុះបានរកឃើញជនបរទេសជា ជនជាតិវៀតណាមសរុបចំនួន ២៥នាក់ (ក្នុងនោះមានស្ត្រីចំនួន ០៣នាក់) កំពុងស្នាក់នៅទីតាំងខាងលើ ។
កម្លាំងសមត្ថកិច្ចក៏បានធ្វើការរឹបអូស និងដកហូតវត្ថុតាង រួមមាន ៖
-លិខិតឆ្លងដែនចំនួន ០៦ក្បាល
-សម្ភារៈ និងឧបករណ៍បម្រើឱ្យការប្រព្រឹត្តបទល្មើសតាមប្រព័ន្ធបច្ចេកវិទ្យាមួយចំនួនទៀត។
បច្ចុប្បន្ន ជនបរទេសទាំង ២៥នាក់ រួមទាំងវត្ថុតាងដែលដកហូតបាន ត្រូវបានសមត្ថកិច្ចបញ្ជូនទៅកាន់អធិការដ្ឋាននគរបាលខណ្ឌ ដើម្បីធ្វើការសាកសួរស្រាវជ្រាវបន្ត និងកសាងសំណុំរឿងចាត់ការតាមនីតិវិធីច្បាប់ ៕
ចែករំលែកព័តមាននេះ