ទីក្រុងម៉ូស្គូ៖ ប្រធានាធិបតីរុស្ស៊ី លោកពូទីន បានឆ្លើយតបទៅនឹងសំណួររបស់អ្នកសារព័ត៌មានរបៀបជាការរអៀសខ្លួន។ សំណួរនោះសួរថាតើលោកពូទីននឹងបន្តកាន់អំណាចរហូតដល់ឆ្នាំ២០៣៦ឬយ៉ាងណា? លោកពូទីនឆ្លើយតបថាវាជាការឆាប់រហ័សពេកហើយដែលលោកត្រូវគិតទៅដល់ចំណុចនេះ។ លោកពូទីនដែលសព្វថ្ងៃនេះមានវ័យ៧៣ឆ្នាំនៅតែបន្តកាន់អំណាចចាប់តាំងពីឆ្នាំ១៩៩៩ដោយឆ្លាស់មុខតំណែងគ្នា។ ម្ដងលោកកាន់តំណែងជានាយករដ្ឋមន្ត្រី និងម្ដងលោកកាន់តំណែងជាប្រធានាធិបតី។ ប៉ុន្តែអំណាចពិតប្រាកដនៅតែស្ថិតនៅក្នុងដៃរបស់លោកជានិច្ច។
ចំពោះសំណួរខាងលើនេះ លោកពូទីនថ្លែងថាមានតែព្រះជាម្ចាស់ទេទើបត្រាស់ដឹងថាតើលោកនឹងបន្តកាន់អំណាចដល់ឆ្នាំ២០៣៦ ឬយ៉ាងណា។ មានតែព្រះអង្គទេទើបត្រាស់ដឹងថាតើលោកមានសុខភាពល្អគ្រប់គ្រាន់ដើម្បីបន្តកាន់អំណាចរហូតដល់ពេលនោះ។ លោកថ្លែងបន្តទៀតថាមានតែព្រះទេទើបត្រាស់ដឹងថាទាំងលោក ទាំងអ្នកឯទៀតដែលនៅទីនេះអាចបន្តជីវិតរស់នៅរហូតដល់ថ្ងៃស្អែក ឬថ្ងៃខានស្អែក និងត្រាស់ដឹងថាតើយើងអាចដោះស្រាយបញ្ហាប្រឈមរបស់យើង ត្រាស់ដឹងថាតើយើងអាចសម្រេចគោលដៅរបស់យើងដែលបានដាក់ចេញដែរឬទេ។
លោកពូទីនថ្លែងថារដ្ឋធម្មនុញ្ញអនុញ្ញាតឱ្យលោកឈរឈ្មោះជាបេក្ខជនប្រធានាធិបតីម្ដងទៀតនៅឆ្នាំ២០៣០ ហើយអាចបន្តកាន់អំណាចរហូតដល់ឆ្នាំ២០៣៦ប្រសិនបើលោកជាប់ឆ្នោតនៅពេលនោះ។ លោកថ្លែងបន្តទៀតថាមែនទែនទៅ រដ្ឋធម្មនុញ្ញអនុញ្ញាតឱ្យលោកឈរឈ្មោះនៅឆ្នាំ២០៣០។ ប៉ុន្តែលោកយល់ថាមិនគួរទាន់នឹកនានៅពេលនេះទេ។ ជម្រាបជូនតាមត្រង់ទៅ វាហាក់ដូចជាប្រញាប់ពេក (បើនិយាយអំពីបញ្ហានេះ)។ លោកថាសូម្បីតែគិតក៏លោកមិនដែលគិតទាល់តែសោះអំពីបញ្ហានេះ។ លោកនិយាយនេះដោយស្មោះអស់ពីចិត្ត៕ ប្រភព៖ Reuters
ចែករំលែកព័តមាននេះ