ទីក្រុងម៉ូស្គូ៖ លោកពូទីនបានប្រកាសច្រានចោលការបោះដៃរបស់លោកហ្សេឡិនស្គីដែលផ្ញើលិខិតចំហជូនលោក និងស្នើសុំជួបទល់មុខគ្នាដើម្បីចរចាបញ្ចប់សង្គ្រាម។ ហ្សេឡិនស្គីថ្លែងថាមើលទៅរំពឹងលើអាមេរិកដើម្បីដោះស្រាយបញ្ហាអ៊ុយក្រែនប្រហែលជាមិនងាយទេព្រោះអាមេរិកខ្លួនឯងក៏កំពុងជាប់ដៃនៅក្នុងសង្គ្រាមអ៊ីរ៉ង់ផងដែរ។ លោកពូទីនធ្វើហាក់ដូចជាមិនចាប់អារម្មណ៍នឹងការបោះដៃរបស់លោកហ្សេឡិនស្គី។ លោកថាសម្រាប់ពេលនេះ លោកគ្មានហេតុផលអ្វីត្រូវជួបមុខគ្នាទេ។ លោកបាននិយាយសើចចម្អកចំពោះការស្នើសុំជួបមុខគ្នាផ្ទាល់ដើម្បីចរចាឱ្យមានបទឈប់បាញ់។ លោកយល់ថាការសរសេររៀបរាប់នៅក្នុងលិខិតចំហនោះហាក់ដូចជាមិនចេញពីដួងចិត្តស្មោះទាល់តែសោះ។
លោកពូទីនចោទជាសំណួរថាតើនេះជាវិធីបង្កើតលក្ខខណ្ឌដើម្បីជួបទល់មុខគ្នា? ឬក៏ជាវិធីមិនចង់ជួបមុខគ្នា? លោកសួរ និងឆ្លើយដោយខ្លួនឯងថាប្រហែលជាមិនចង់ជួបមុខគ្នាច្រើនជាង។ លោកថែមទាំងចាត់ទុកភាសាដែលសរសេររៀបរាប់នៅក្នុងលិខិតចំហនោះមានចរិតខ្វះការគួរសមថែមទៀតផង។ យោងតាមទូរទស្សន៍ប៊ីប៊ីស៊ី លោកពូទីនចង់សង្កត់ធ្ងន់អំពីជំហររបស់លោកថាប្រសិនបើមានការផ្អាកសង្គ្រាមតែបន្តិច អ៊ុយក្រែននឹងឆក់យកឱកាសនេះដើម្បីពង្រឹងកម្លាំងរបស់ខ្លួន។ ចំណែករុស្ស៊ីបានត្រឹមដាក់លក្ខខណ្ឌ ប៉ុន្តែគេមិនគោរព។ លោកថ្លែងថាការជួបទល់មុខគ្នាអាចធ្វើទៅបានលុះត្រាតែមានការជួបគ្នាកម្រិតអ្នកជំនាញ និងចេញជាដំណោះស្រាយជាមុនសិន។
លោកយល់ថាគោលបំណងតែមួយគត់នៃការស្នើសុំជួបគ្នានេះគឺដើម្បីឱ្យកងទ័ពរុស្ស៊ីទច់មួយកន្លែងសិន កុំបន្តទៅមុខទៀត។ ប៉ុន្តែបើចង់ធ្វើដូច្នេះលុះត្រាតែមានកិច្ចព្រមព្រៀង។ លោកថាកិច្ចព្រមព្រៀងនោះត្រូវតែប្រាកដប្រជា មិនមែនកិច្ចព្រមព្រៀងផ្អាកបាញ់គ្នាត្រឹមតែ៦ខែ ឬ៣ខែនោះទេ ប៉ុន្តែត្រូវតែជាកិច្ចព្រមព្រៀងរយៈពេលវែង។ យើងអាចសន្និដ្ឋានទុកជាមុនថាសកម្មភាពយោធាអាចនឹងបិទបញ្ចប់នៅថ្ងៃណាមួយជាមិនខាន។ គ្មានអ្វីត្រូវសង្ស័យសោះឡើយ ប្រតិបត្តិការសឹកនឹងបិទបញ្ចប់ភ្លាមនៅពេលយើងសម្រេចគោលដៅដែលយើងបានដាក់ចេញ។
លោកហ្សេឡិនស្គីបានចាត់ទុកចម្លើយតបពីសំណាក់លោកពូទីនចំពោះលិខិតចំហនោះមានលក្ខណៈកម្សោយ។ លោកបង្ហោះសារនៅលើបណ្ដាញសង្គមថាជាថ្មីម្ដងទៀត រុស្ស៊ីបង្ហាញជំហររបស់ខ្លួនថាចង់ធ្វើសង្គ្រាមជាបន្តទៀត។ ហ្សេឡិនស្គីយល់ថាប្រទេសជាច្រើននៅក្នុងពិភពលោកខកចិត្តមិនតិចទេនឹងការឆ្លើយតបនោះ។ គាត់ (លោកពូទីន) មិនចង់ផ្លាស់ប្ដូរបន្តិចណាសោះ។ គាត់មិនព្រមទទួលស្គាល់ការពិតថាសង្គ្រាមនេះធ្វើឡើងដើម្បីតែតម្រូវចិត្តរបស់គាត់ និងពួកអ្នកដែលរកលុយបានដោយសារទង្វើរបស់គាត់។ ជាថ្មីម្ដងទៀត ហ្សេឡិនស្គីអំពាវនាវឱ្យសហគមន៍អន្តរជាតិដាក់សម្ពាធសេដ្ឋកិច្ចបន្ថែមទៀតទៅលើប្រទេសរុស្ស៊ី ៕ ប្រភព៖ The Hill
ចែករំលែកព័តមាននេះ