ទីក្រុងឡុង៖ នាយករដ្ឋមន្ត្រីអង់គ្លេស លោកខៀស្តាមើ (Keir Starmer) បានបង្ហាញការប្រមើលមើលរបស់លោកដែលស្ដាប់ទៅគួរឱ្យព្រួយបារម្ភចំពោះសន្តិសុខពិភពលោក។ ម៉្យាងទៀត វាក៏ជាសារដាស់តឿនផងដែរថាក្រុមសម្ព័ន្ធមិត្តលោកខាងលិចត្រូវតែបង្កើនខ្ទង់ចំណាយលើវិស័យការពារជាតិដើម្បីឆ្លើយតបទៅនឹងការគំរាមកំហែងពីសំណាក់ប្រទេសរុស្ស៊ី។ កាលពីជាងបួនឆ្នាំមុន រុស្ស៊ីឈ្លានពានអ៊ុយក្រែន។ ទៅថ្ងៃមុខ ប្រទេសនៅអឺរ៉ុបដទៃទៀតអាចនឹងជួបវាសនាបែបនេះជាមិនខាន។
លោកខៀស្តាមើព្រមានថារុស្ស៊ីអាចនឹងវាយប្រហាររដ្ឋជាសមាជិកអង្គការណាតូនៅក្នុងអំឡុងពេលបួនឆ្នាំខាងមុខ។ លោកថ្លែងដូច្នេះដោយយោងទៅលើការវាយតម្លៃពីសំណាក់ក្រុមស៊ើបការណ៍សម្ងាត់របស់បស្ចិមប្រទេស។ លោកបញ្ចេញសារនយោបាយនេះចំពេលដែលលោកសន្យាថារដ្ឋាភិបាលនឹងផ្សព្វផ្សាយនូវផែនការវិនិយោគលើវិស័យការពារជាតិមុនពេលមានកិច្ចប្រជុំកំពូលរបស់អង្គការណាតូនាខែកក្កដាខាងមុខនេះ។
លោកថ្លែងបន្តទៀតថានេះជាការវាយតម្លៃដែលធ្វើឡើងដោយក្រុមស៊ើបការណ៍សម្ងាត់របស់យើង និងការវាយតម្លៃរបស់ប្រទេសដទៃទៀតនៅក្នុងអង្គការណាតូដែលថាការវាយប្រហារពីសំណាក់ប្រទេសរុស្ស៊ីទៅលើរដ្ឋជាសមាជិកអង្គការណាតូអាចនឹងកើតមានឡើងនៅឆ្នាំ២០៣០។ ដូច្នេះឃើញថាពេលវេលាពិតជាឆាប់រហ័សណាស់។ នេះជាចំណុចអាទិភាពដែលយើងត្រូវតែយកចិត្តទុកដាក់។ លោកថ្លែងដូច្នេះនៅពេលចុះទៅពិនិត្យមើលរោងចក្រផលិតដ្រូននៅប្រទេសអង់គ្លេសភាគនិរតី។
ពាក្យសម្ដីរបស់លោកខៀស្តាមើត្រង់ចំណុចនេះក៏ហាក់ដូចជាស្របនឹងការយល់ឃើញរបស់ថ្នាក់ដឹកនាំអឺរ៉ុប និងអគ្គលេខាធិការអង្គការណាតូផងដែរ។ អគ្គលេខារូបនេះធ្លាប់ព្រមានកាលពីខែធ្នូថារុស្ស៊ីទំនងជាត្រៀមខ្លួនរួចរាល់ដើម្បីប្រើប្រាស់កម្លាំងប្រឆាំងនឹងណាតូនៅក្នុងរង្វង់៥ឆ្នាំខាងមុខ។ លោកស្តាមើសន្យាថានឹងបង្កើនខ្ទង់ចំណាយលើវិស័យការពារជាតិឱ្យបានដល់២,៥%នៃជីឌីភីប្រចាំឆ្នាំចាប់ពីឆ្នាំ២០២៧តទៅ ហើយនឹងបង្កើនដល់៣%នៃជីឌីភីប្រសិនបើឈ្នះឆ្នោតអាណត្តិថ្មី៕ ប្រភព៖ Euro News
ចែករំលែកព័តមាននេះ