ខេត្ដព្រៃវែង ៖ កាលពីព្រឹកថ្ងៃទី៣០ ធ្នូ ភ្នាក់ងារសារព័ត៌មានកោះសន្ដិភាពបាននាំយក អំណោយរបស់ សប្បុរសជន ទៅឧបត្ថម្ភជូនដល់ដៃស្ដ្រីឈ្មោះតក់ លៀប អាយុ២៩ឆ្នាំ រស់នៅភូមិចាក់ខ្លាញ់ ឃុំពាមរក៍ ស្រុកពាមរក៍ ដែលត្រូវប្ដីឈ្មោះខាត់ ធី វាយធ្វើបាបទាំងផ្លូវកាយ និងផ្លូវចិត្ដស្ទើរបាត់បង់ស្មារតីម្ដងៗ ។
តាមសំដីលោកមេភូមិក៏ដូចជាប្រជាពលរដ្ឋ រស់នៅក្បែរខាងបានឱ្យដឹងថា ស្ដ្រីរងគ្រោះត្រូវប្ដីវាយធ្វើបាបតាំង ពីមានផ្ទៃពោះរហូតដល់ឆ្លងទន្លេបាន៩ថ្ងៃ ស្ទើរឡប់សតិ។ រហូតមានពេលខ្លះប្ដីអគតិរូបនោះ បានយកទារក ជាកូនដែលទើបនឹងកើតទៅប្លុងចោលនៅបឹងកំបោ្លក ហើយត្រូវសមត្ថកិច្ចទៅយកទារកនោះមកប្រគល់ ឱ្យ វិញក៏មាន ។
ក្នុងការប្រគល់អំណោយជូនដល់ស្ដ្រីរងគ្រោះនេះ មានការចូលរួមពីលោក ណាវ ឌុល ជាអនុប្រធានភូមិ និងលោកតាសំ ជាគណៈកម្មការវត្ដចាក់ខ្លាញ់ ព្រមទាំងបងប្អូនប្រជាពលរដ្ឋរស់នៅក្បែរខាងមួយចំនួនទៀត ផងដែរ ។
អំណោយដែលសប្បុរសជនបានផ្ដល់តាមរយៈកោះសន្ដិភាពមាន
១-លោកទ្រាវ ជីវ៉ា នាយកក្រុមហ៊ុនទេសចរណ៍ វើលដ៏ផប ឧបត្ថម្ភថវិកា ១០ម៉ឺនរៀល
២-លោកវង្ស ឆាយ ក្រុមហ៊ុន V-LAM ហាងជួសជុល រថយន្ដ និង AT&L ក្រុមហ៊ុនដឹកជញ្ជូនតាម សមុទ្រនៅក្រុងឡងប៊ិច ឧបត្ថម្ភថវិកា៥០ដុល្លារ
៣-បុគ្គលិកទាំងអស់របស់ក្រុម APL Logistics ឧបត្ថម្ភ៨៤.៦០០រៀល និង៧ដុល្លារ និងខោអាវសំរាប់ កុមារនិងម្ដាយជាច្រើនសំរាប់
៤-លោកយាយ អាំ លន់ នៅខេត្ដស្វាយរៀង ឧបត្ថម្ភ៥ដុល្លារ
៥-អ្នកស្រី ឈឹម សុខសុភាព ព្រមទាំងអ្នកស្រីមូល សុខលី ឧបត្ថម្ភថវិកា៥ម៉ឺនរៀល ។
ស្ដ្រីឈ្មោះ តក់ លៀប បានសំដែងនូវការត្រេកអរជាពន្លឹកពេលបានទទួលអំណោយដ៏ច្រើនក្នុងជីវិតរបស់គាត់ ។ លោកណាវ ឌុល ជាអនុប្រធានភូមិចាក់ខ្លាញ់ ព្រមទាំងលោកតាអាចារ្យវត្ដ ជួសមុខឱ្យស្ដ្រីរងគ្រោះសូម ថ្លែងអំណរគុណជាអនេកដល់សប្បុរសជនទាំងក្នុង និងក្រៅប្រទេស ក៏ដូចជាលោកឧកញ៉ាថុង អ៊ុយប៉ាង ដែលមានចិត្ដសប្បុរសធម៌បរិច្ចាគថវិកា ជួយដល់ស្ដ្រីរងគ្រោះនេះ និងសូមប្រសិទ្ធពរដល់លោកអ្នក សប្បុរសជនទាំងអស់ជួបតែសេចក្ដីសុខ និងសេចក្ដីចំរើន ព្រមទាំងពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។
ចែករំលែកព័តមាននេះ