រាជធានីភ្នំពេញ ៖ គ្រោះថ្នាក់ចរាចរណ៍រវាងរថយន្តម៉ាកឡិចស៊ីសមួយគ្រឿងបុកជាមួយម៉ូតូមួយគ្រឿងជិះគ្នា៣នាក់ក្នុងទិសដៅបញ្ច្រាសគ្នា បណ្តាលឱ្យបុរសម្នាក់ស្លាប់នៅពេលបញ្ជូនទៅកាន់មន្ទីរពេទ្យ និង២នាក់ទៀត បានរងរបួសធ្ងន់ ។
គ្រោះថ្នាក់ចរាចរណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង ប្រមាណ១និង៣០នាទីរសៀលថ្ងៃទី១២ ខែឧសភា ឆ្នាំ២០១៩ ស្ថិតនៅទល់មុខមជ្ឈមណ្ឌលសកម្មភាពកំចាត់មីនកម្ពុជា តាមផ្លូវឌួងងៀប ក្នុងភូមិទ្រង់មាន់ សង្កាត់អូបែកក្អម ខណ្ឌសែនសុខ។
ភាគីខាងរថយន្តមួយគ្រឿងខាងលើម៉ាកឡីចស៊ីស RX330 ពណ៌ស ពាក់ស្លាកលេខ ភ្នំពេញ ២AY-៨៨៥៥ បើកបរដោយឈ្មោះឈាង ប៊ុនសាន ភេទប្រុស អាយុ៥២ឆ្នាំ មានលំនៅផ្ទះលេខ១១១ ក្រុម៩ ភូមិប៉ោយស្វាយ ឃុំតាគ្រាម ស្រុកបាណន់ ខេត្តបាត់ដំបង ត្រូវបាននគរបាលឃាត់ខ្លួន ។
ចំណែកភាគីខាងជនរងគ្រោះម្នាក់ដែលបានស្លាប់ និងជនរងគ្រោះចំនួន២នាក់ផ្សេងទៀតដែលរងរបួសពុំត្រូវបានស្គាល់អត្តសញ្ញាណនោះទេ ។ ជនរងគ្រោះទាំង៣នាក់បានជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ កំពត ១B-៤០១៨ ។
តាមប្រភពព័ត៌មានបានអោយដឹងថា នៅមុនពេលកើតហេតុ គេឃើញរថយន្តម៉ាកឡិចស៊ីសបានធ្វើដំណើរតាមវិថីឌួងងៀប ក្នុងទិសដៅពីត្បូងទៅជើង លុះពេលធ្វើដំណើរមកដល់ចំណុចកើតហេតុ ក៏បានបើកជែង រថយន្តធំមួយគ្រឿង រួចក៏ជ្រុលទៅបុកម៉ូតូមួយគ្រឿងដែលជិះគ្នា៣នាក់ក្នុងទិសដៅបញ្ច្រាសគ្នា បណ្តាលអោយម៉ូតូដួល និងមនុស្សរងរបួសរណូករណែលទាំង៣នាក់តែម្តង។
តាមប្រភពព័ត៌មានបានបន្តថា ភ្លាមៗនោះ អ្នកបើកបរក៏បានចុះពីលើរថយន្តហើយនាំគ្នាសែងជនរងគ្រោះដាក់ខាង និងទាក់ទងហៅរថយន្តសង្គ្រោះមកដឹកបញ្ជូនទៅកាន់មន្ទីរពេទ្យព្រះកុសុមៈផងដែរ ហើយនគរបាលមូលដ្ឋានក៏បានចុះមកអន្តរាគមន៍ភ្លាមៗ និងបានឃាត់ខ្លួនអ្នកបើកបររថយន្តបញ្ជូនទៅកាន់ស្នាក់ការប៉ុស្តិ៍ ។
បន្ទាប់ពីបញ្ជូនទៅកាន់មន្ទីរពេទ្យ ដោយសារតែរបួសធ្ងន់ពេក បុរសម្នាក់បានស្លាប់បាត់បង់ជីវីត ចំណែកបុរស២នាក់ទៀតបានរងរបួសធ្ងន់កំពុងសង្គ្រោះ។
តាមប្រភពពីអ្នកបើកបររថយន្តបានអោយដឹងថា នៅមុនកើតហេតុ ពេលដែលគាត់ជែងមិនទាន់ផុតផង ស្រាប់តែម៉ូតូមួយគ្រឿងខាងលើបើកគេចជង្ហុក មកបុករថយន្តរបស់គាត់តែម្តង ។
បច្ចុប្បន្ន រថយន្តនិងម៉ូតូ ព្រមទាំងអ្នកបើកបររថយន្តត្រូវបាននគរបាលបញ្ជូនទៅកាន់ការិយាល័យ ដើម្បីចាត់ការតាមច្បាប់ ។ ចំណែកសពជនរងគ្រោះម្នាក់ត្រូវបាននគរបាលកំពុងស្រាវជ្រាវរកក្រុមគ្រួសារសាច់ញាតិដើម្បីមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ