ប្រទេសយេម៉ែន ៖ អ.ស.ប អះអាងដោយប្រុងប្រយ័ត្នកាលពីថ្ងៃទី១១ឧសភា ពីការចាប់ផ្ដើមដកថយរបស់ពួកឧទ្ទាមហ៊ូធីយេម៉ែន ចេញពីកំពង់ផែ៣នាភាគខាងលិចប្រទេសដែលកំពុងមានសង្គ្រាមនោះ។
ការប្រកាសពីការដកថយគួរឲ្យភ្ញាក់ផ្អើលនោះ នាំឲ្យពួកអ្នកទទួលខុសត្រូវរបស់រដ្ឋាភិបាលយេម៉ែនមានការសង្ស័យ តែនោះជាកម្មវត្ថុនៃកិច្ចព្រមព្រៀងមួយ ក្នុងឱកាសនៃការចរចាដែលបានធ្វើ កាលពីខែធ្នូកន្លងទៅក្រោមការជួយជ្រោមជ្រែងរបស់អ.ស.ប នៅប្រទេសស៊ុយអែត។ លោកFARHAN HAQអ្នកនាំពាក្យម្នាក់របស់អ.ស.ប អះអាងនាថ្ងៃទី១១ឧសភាថា ប្រតិបត្តិការដកថយនោះបានចាប់ផ្ដើម តែលោកមិនបញ្ជាក់ពីភាពលម្អិតឡើយ។
ប្រមុខពួកឧទ្ទាមលោកMOHAMMED ALI AL HOUTHI បានថ្លែងពីចេតនារបស់ពួកបះបោរ ដកថយចាប់ពីថ្ងៃទី១១ឧសភាទៅ ចេញពីកំពុងផែធំHODEIDA កំពង់ផែ SALIF និងកំពង់ផែRAS ISSA នៅជាប់សមុទ្រក្រហម តែមេដឹកនាំម្នាក់របស់រដ្ឋាភិបាលយេម៉ែនបានចាត់ទុកថា នោះជាឧបាយកលបោកបញ្ឆោតថ្មីរបស់ពួកឧទ្ទាមហ៊ូធី។
ទោះបីយ៉ាងណាសាក្សីម្នាក់និយាយថា បានឃើញក្បួនរថយន្តមួយរបស់អ.ស.ប បើកចូលនិងបើកចេញវិញពីកំពង់ផែSALIF ចំណែកឯប្រភពជិតដិតនឹងពួកហ៊ូធីអះអាងថា ពួកឧទ្ទាមបានចាប់ដកថយចេញពីកំពង់ផែ៣ ហើយបណ្ដាកងឆ្មាំឆ្នេរសមុទ្របានមកប្ដូរវេទ រួចក៏គ្មានការបញ្ជាក់អ្វីថែមទៀតដែរ។
នៅកំពង់ផែSALIFអ្នកយកព័ត៌មានម្នាក់របស់AFPកត់សម្គាល់ឃើញ ការចាកចេញ្របស់កងកម្លាំងពួកឧទ្ទាម និងការមកដល់របស់មនុស្សប្រមាណជា១៥០នាក់ ដែលស្លៀកពាក់ឯកសណ្ឋានកងឆ្មាំឆ្នេរសមុទ្រ។ ចលនាទាំងនេះត្រូវបានតាមដានពិនិត្យ ដោយបណ្ដាសមាជិកនៃបេសកកម្មអ.ស.ប។
ប្រកាសជាច្រើនលើកដោយអ.ស.ប ពិសេសកាលពីខែកុម្ភៈនិងខែមេសា ការដកថយរបស់កងកម្លាំងដែលច្បាំងគ្នា មានការយឺតយ៉ាវក្នុងការអនុវត្តនៅតំបន់កំពង់ផែ HODEIDA ដែលនាំឲ្យសហគមន៍អន្តរជាតិមានការព្រួយបារម្ភ។ ប្រភពមួយរបស់អ.ស.បនិយាយថា គេសង្ឃឹមដែលអ.ស.បអាចធ្វើរបាយការណ៍មួយ ជូនក្រុមប្រឹក្សាសន្តិសុខពីចលនាពិតប្រាកដនៅលើទីលាន។
ប្រសិនបើមានការដកថយនោះពិតប្រាកដរបស់ពួកឧទ្ទាម នោះកិច្ចព្រមព្រៀងដកកងកម្លាំងយោធា ចេញពីកំពង់ផែHODEIDA នឹងជាភ័ព្វវាសនាមួយមកទល់ពេលនេះ ដែលអាចនាំឲ្យមានសន្តិភាពនៅយេម៉ែន ដែលនៅទីនោះជម្លោះដ៏បង្ហូរឈាមបានបន្ត ចាប់តាំងពីជាង៤ឆ្នាំមកហើយ៕
ចែករំលែកព័តមាននេះ