ខេត្តកំពង់ឆ្នាំង ៖ បឹងធំគឺជាបឹងមួយដែលមានផ្ទៃទឹកធំល្វឹងល្វើយនៅខែវស្សា លាតសន្ធឹងពីចំណុចទំនប់បារាំង ស្ថិតក្នុងភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង រហូតទៅដល់ទួលអំពិល ស្ថិតក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ចំណែកឯម្ខាងបឹងជាប់ដងទន្លេវិញគឺជាប់នឹងភូមិកំពង់អុស ឃុំពាមឆ្កោក ស្រុកជលគិរី ។ បឹងមួយនេះ មានវិសាលភាពធំធេងណាស់ និងពុំដែលរីងស្ងួតឡើយនាពេលកន្លងមក ប៉ុន្តែឆ្នាំនេះបឹងដែលមានផ្ទៃទឹកធំល្វឹងល្វើយ ប្រែជារីងស្ងួតគោកស្ទើរអស់ទាំងស្រុង ។
ផ្តើមចេញពីបញ្ហានេះ ធ្វើឲ្យប្រជាពលរដ្ឋខ្លះចោទលើកត្តាធម្មជាតិក្តៅហួតហែង ប៉ុន្តែអ្នកមានដីស្រែចម្ការ ជុំវិញបឹងខាងលើនេះ បានចោទថាមកពីមានការបង្ហូរទឹកចេញតាមទំនប់បារាំង បណ្តាលខូចខាតដំណាំរបស់ពួកគាត់មានដូចជាស្រូវប្រាំង និងឈូកជាដើម ។
ទាក់ទងនឹងបញ្ហានេះ លោក ដោក ប៊ុនថុន ប្រធានមន្ទីរធនធានទឹកនិងឧតុនិយមខេត្តមានប្រសាសន៍ថា
ការដែលបណ្ដាលឱ្យបឹងធំរីងស្ងួតហួតទឹកអស់ មិនមែនមកពីកត្តាធម្មជាតិទេ គឺមកពីខាងមន្ទីរជំនាញរបស់លោកជាអ្នកបង្ហូរទឹកចេញ ។
លោកបានពន្យល់ថា មូលហេតុគឺដោយសារបឹងធំនេះចេះតែគោករាក់ពីមួយឆ្នាំទៅមួយឆ្នាំ ទើបមន្ទីរជំនាញរបស់លោកធ្វើសំណើសុំទៅក្រសួងធនធានទឹក ដើម្បីស្ដារបឹងនេះឲ្យទឹកមានជម្រៅជ្រៅឡើងវិញ ។ ជាមួយគ្នានេះ រដ្ឋក៏គ្មានធនធានឯណានឹងអាចស្ដារបឹងនេះបានដែរ ទើបសហគមន៍រកដៃគូមកជួយស្ដារបឹងធំនេះវិញ ដោយចំណេញទាំងរដ្ឋ ចំណេញទាំងសហគមន៍ដៃគូដែលជាអ្នកចង់បានអាចម៍ដី ។
និយាយជារួម ដើម្បីស្ដារបឹងធំនេះបាន លុះត្រាតែមានដៃគូពីវិស័យឯកជនស្ដារយកអាចម៍ដី យកទៅចាក់ទីតាំងណាមួយដែលគេត្រូវការ ។ បញ្ហានេះ មិនមែនជារឿងត្រូវលាក់លៀមនោះទេ ត្រូវធ្វើជាចំហ ហើយនៅពេលដ៏ខ្លីខាងមុខនេះ លោកនឹងលើកផ្ទាំងប៉ាណូបង្ហាញពីគម្រោងការស្តារបឹងធំនេះ ។
លោកប្រធានមន្ទីរនបានបញ្ជាក់ទៀតថា បើតាមគម្រោងរបស់លោកអភិបាលខេត្តបានឲ្យដឹងថា កំពុងវាស់វែងគ្រោងប្លង់លើទីតាំងអាងបឹងធំនេះ ដោយកំណត់ទីតាំងឲ្យបានច្បាស់លាស់ ព្រោះថាបច្ចុប្បន្នកំពុងតែមានការទន្ទ្រានយកដីជុំវិញបឹងពីសំណាក់ប្រជាពលរដ្ឋដែលចេះតែរំកិលបោះព្រំយកដីចូលទៅក្នុងអាងបឹងធំយ៉ាងអនាធិបតេយ្យផងដែរ ។
ទោះជាយ៉ាងនេះក្តី មានប្រជាពលរដ្ឋដែលមានស្រែប្រាំង និងចម្ការឈូកនៅជុំវិញបឹងបានត្អូញត្អែរថា មកដល់ពេលនេះដំណាំពួកគាត់បានងាប់ខូចអស់ទៅហើយ ដោយសារតែការបង្ហូរទឹកចេញ ពិសេសប្រជាពលរដ្ឋនៅភូមិកំពង់អុស ។ មកដល់ពេលនេះ គេមិនទាន់ដឹងថា តើការស្តារបាតបឹងខាងលើអាចទៅដោយរលូន ឬយ៉ាងណានោះទេ ព្រោះមិនទាន់ចេញរូបរាងផងមានលេចឮបញ្ហាខ្លះៗជាបណ្តើរៗទៅហើយ ។
ម្យ៉ាងវិញទៀត ប្រជាពលរដ្ឋមានដីស្រែចម្ការជុំវិញបឹងធំនេះ ខ្លះបានកាន់កាប់និងអាស្រ័យផលតាំងពីសម័យឆ្នាំ១៩៧៩មកម្លេ៉ះ ។
ចែករំលែកព័តមាននេះ