ខេត្តមណ្ឌលគិរី៖ នាព្រឹកថ្ងៃទី៣០ ខែកញ្ញា ឆ្នាំ២០២៥ កូនចៅខ្មែរជាជនជាតិដើមភាគតិច ព្នង ដែលរស់នៅក្នុងក្រុងសែនមនោរម្យ ខេត្តមណ្ឌលគិរី បានរួមគ្នាប្រារព្ធពិធីសែនព្រេនបែបប្រពៃណីដ៏មានអត្ថន័យជ្រាលជ្រៅមួយ នៅទីសក្ការៈ…
ខេត្តមណ្ឌលគិរី៖ នាព្រឹកថ្ងៃទី៣០ ខែកញ្ញា ឆ្នាំ២០២៥ កូនចៅខ្មែរជាជនជាតិដើមភាគតិច ព្នង ដែលរស់នៅក្នុងក្រុងសែនមនោរម្យ ខេត្តមណ្ឌលគិរី បានរួមគ្នាប្រារព្ធពិធីសែនព្រេនបែបប្រពៃណីដ៏មានអត្ថន័យជ្រាលជ្រៅមួយ នៅទីសក្ការៈ ភ្នំដោះក្រមុំ។ ពិធីនេះធ្វើឡើងក្រោមការចូលរួមពី ឯកឧត្តម ណយ ស្រូន ទីប្រឹក្សា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ព្រមទាំងបងប្អូនជនជាតិដើមភាគតិចព្នងជាច្រើនរូប។
លោក ណយ ច័ន្ទតារា ដែលជាយុវជនជនជាតិដើមភាគតិចព្នងម្នាក់ បានថ្លែងថា ពិធីសែនព្រេននេះ ត្រូវបានរៀបចំឡើងយ៉ាងគគ្រឹកគគ្រេងតាម ទំនៀមទម្លាប់ពីដូនតា ដូចជាការថ្វាយ គ្រឿងសក្ការៈបូជា ផ្សេងៗ រួមមាន៖ ក្របី ជ្រូក មាន់ បាយ ស្រាពាង ។ ជាមួយគ្នានោះ ក៏មានការ វាយគង វាយឃ្មោះ ប្រតន្ត្រីស័ក្តិសិទ្ធិ ដើម្បីអញ្ជើញវត្ថុស័ក្តិសិទ្ធិទាំងអស់ក្នុងប្រទេសកម្ពុជាឲ្យយាងមកទទួលដឹងឮ និងប្រសិទ្ធពរជ័យ។
លោក តារា បន្តថា គោលបំណងដ៏សំខាន់នៃពិធីនេះ គឺដើម្បី បួងសួងសុំសេចក្តីសុខ សេចក្តីចម្រើន និងសូមឲ្យ វត្ថុស័ក្តិសិទ្ធិ ជួយ តាមថែរក្សា ការពារ ដល់ វីរៈកងទ័ពជួរមុខ របស់យើងទាំងអស់គ្នា ដែលបាននិងកំពុងបំពេញភារកិច្ចយ៉ាងអង់អាចក្លាហានក្នុងការ ការពារជាតិ មាតុភូមិកម្ពុជា។ លើសពីនេះ បងប្អូនជនជាតិដើមភាគតិចព្នង ក៏បាន ឧទ្ទិសកុសល ផលបុណ្យនេះជូនដល់ វិញ្ញាណក្ខន្ធវីរៈកងទ័ពកម្ពុជា គ្រប់រូបដែលបាន ពលីដើម្បីឯករាជ្យ និងបូរណភាពទឹកដី។
សកម្មភាពដ៏គួរឲ្យគោរពនេះបានបង្ហាញពី ស្មារតីសាមគ្គីភាព និង មនសិការស្នេហាជាតិ ដ៏ខ្ពង់ខ្ពស់របស់បងប្អូនជនជាតិដើមភាគតិចព្នង ចំពោះវីរភាពនិងការលះបង់របស់កងទ័ពជាតិ ដែលជាអ្នកការពារសុខសន្តិភាពរបស់ប្រជាជនទូទៅ។
ពិធីនេះមិនត្រឹមតែជាការថែរក្សា អត្តសញ្ញាណវប្បធម៌ ប៉ុណ្ណោះទេ ប៉ុន្តែវាក៏ជា ការលើកទឹកចិត្ត ដ៏ធំធេង និងជា កម្លាំងចិត្ត ដ៏ថ្លៃថ្លាសម្រាប់យុទ្ធជនទាំងអស់នៅទូទាំងប្រទេសផងដែរ៕
ចែករំលែកព័តមាននេះ