ខេត្តស្ទឹងត្រែង ៖ បន្ទាប់ពីបម្រើសេវាអស់រយៈពេល១៩ឆ្នាំ(គិតត្រឹមឆ្នាំ២០០៦) វាបានទ្រុឌទ្រោមយ៉ាងខ្លាំង ទីបំផុត ស្ពានឈើក្បាលបេតុង ដ៏សំខាន់នៅភូមិអន្លង់ស្វាយ នឹងត្រូវរុះរើ និងចាប់ផ្តើមសាងសង់ថ្មីក្នុងពេលឆាប់ៗ បន្ទាប់ពីទឹកទន្លេស្រកចុះ…
ខេត្តស្ទឹងត្រែង ៖ បន្ទាប់ពីបម្រើសេវាអស់រយៈពេល១៩ឆ្នាំ(គិតត្រឹមឆ្នាំ២០០៦) វាបានទ្រុឌទ្រោមយ៉ាងខ្លាំង ទីបំផុត ស្ពានឈើក្បាលបេតុង ដ៏សំខាន់នៅភូមិអន្លង់ស្វាយ នឹងត្រូវរុះរើ និងចាប់ផ្តើមសាងសង់ថ្មីក្នុងពេលឆាប់ៗ បន្ទាប់ពីទឹកទន្លេស្រកចុះ នេះបើតាមផេកផ្លូវការរបស់រដ្ឋបាលស្រុកបុរីអូរស្វាយសែនជ័យ បង្ហោះនារសៀលថ្ងៃទី៣ វិច្ឆិកា ២០២៥ ។
បើសម្លឹងមើលទៅស្ថានភាពស្ពានចាស់ មិនត្រឹមតែជាឧបសគ្គដល់ការធ្វើដំណើរប្រចាំថ្ងៃប៉ុណ្ណោះទេ ថែមទាំងអាចបង្កហានិភ័យដល់សុវត្ថិភាពអ្នកភូមិផងដែរ។ ដំណឹង នៃការសាងសង់ស្ពានថ្មី គឺជាពន្លឺនៃក្តីសង្ឃឹម ដែលនឹងនាំមក នូវផលប្រយោជន៍សង្គមជាច្រើន ។
លោកអភិបាលស្រុកបុរីអូរស្វាយសែនជ័យ ៖ ការគម្រោងសាងសង់ស្ពានថ្មីនេះឡើង គឺដើម្បីធានា នូវការធ្វើដំណើរប្រកបដោយសុវត្ថិភាព ទាំង
យប់ទាំងថ្ងៃ សម្រាប់សិស្សានុសិស្ស កសិករ និងអ្នកភូមិទាំងអស់។ មិនត្រឹមប៉ុណ្ណោះ វាអាចសម្រួលដល់ការដឹកជញ្ជូនកសិផលទៅកាន់ទីផ្សារបានលឿន និងទាន់ពេលវេលា កាត់បន្ថយការខាតបង់ និងបង្កើនប្រាក់ចំណូលគ្រួសារពលរដ្ឋក្នុងមូលដ្ឋាន។ ស្ពាននេះ ក៏ជាតំណរភ្ជាប់បេះដូងក្នុងសហគមន៍ធ្វើឱ្យទំនាក់ទំនងរវាងភូមិ និងភូមិ កាន់តែមានភាពងាយស្រួល ក្នុងការផ្លាស់ប្តូរទំនិញ វប្បធម៌ និងការអប់រំ ។
លោកបន្ថែមថា ស្ពានថ្មីមិនមែនគ្រាន់តែជាសំណង់ហេដ្ឋារចនាសម្ព័ន្ធប៉ុណ្ណោះទេ តែជាតំណាង នៃការអភិវឌ្ឍន៍រួម និងជាកូនសោដ៏សំខាន់ក្នុងការបើកទំព័រថ្មី នៃជីវភាពរស់នៅកាន់តែប្រសើរឡើងរបស់បងប្អូនប្រជាពលរដ្ឋនៅភូមិអន្លង់ស្វាយ ឃុំព្រះរំកិលទាំងមូល ។
ជាមួយគ្នានេះ ពលរដ្ឋក្នុងភូមិអន្លង់ស្វាយ ឃុំព្រះរំកិលក៏បានថ្លែងអំណរគុណចំពោះអាជ្ញាធរពាក់ព័ន្ធ និងគ្រប់ភាគីទាំងអស់ដែលបានយកចិត្តទុកដាក់ដោះស្រាយបញ្ហានេះ ជូនដល់ប្រជាពលរដ្ឋផងដែរ ៕
ចែករំលែកព័តមាននេះ