ទីក្រុងកៀវ៖ ថ្មីៗនេះ អ៊ុយក្រែនទើបតែទទួលបានខែលការពារដែនអាកាសម៉ាកផេទ្រាត (Patriot)ដែលផលិតនៅអាមេរិកដើម្បីទប់ទល់នឹងការវាយលុកកាន់តែខ្លាំងឡើងៗពីរុស្ស៊ី។ ថ្វីដ្បិតខែលការពារនេះផលិតនៅអាមេរិកប៉ុន្តែផ្ដល់ដោយប្រទេសដទៃដោយមានការយល់ព្រមពីអាមេរិក។ នេះបើតាមការបញ្ជាក់របស់លោកហ្សេឡិនស្គី។ កាលពីយប់មិញ រុស្ស៊ីបន្តវាយប្រហារដោយដ្រូន និងមីស៊ីលដូចសព្វមួយដងស្លាប់បុរសម្នាក់ និងរបួសមនុស្ស៥នាក់ដែលជាសមាជិកគ្រួសាររបស់គាត់។
ប្រព័ន្ធការពារដែនអាកាសម៉ាកផេទ្រាតជាអាវុធដ៏មានប្រសិទ្ធភាពសម្រាប់ទល់នឹងគ្រាប់មីស៊ីលរបស់រុស្ស៊ី។ ហ្សេឡិនស្គីបានស្នើសុំមីស៊ីលនេះជាយូរមកហើយដើម្បីពង្រឹងខ្សែការពារ។ ប៉ុន្តែការផលិតប្រព័ន្ធនេះត្រូវការពេលយូរ។ ម៉្លោះហើយទម្រាំបានផ្ដល់ឱ្យម្ដងៗប្រើពេលយូរ ហើយផ្ដល់ម្ដងៗក៏មិនបានច្រើនប៉ុន្មានដែរ។ លើកនេះផ្ដល់ឱ្យ២គ្រឿង។ អាមេរិក និងប្រទេសដែលមានមីស៊ីលនេះនៅក្នុងដៃមិនអាចបញ្ចេញឱ្យអស់ពីក្នុងឃ្លាំងបានទេព្រោះគេត្រូវការទុកប្រើប្រាស់សម្រាប់ខ្លួនគេដែរ។
លោកហ្សេឡិនស្គីថ្លែងថាប្រព័ន្ធការពារដែនអាកាសម៉ាកផេទ្រាតមកដល់អ៊ុយក្រែនហើយ ហើយកំពុងដាក់ឱ្យដំណើរការ។ លោកថាអ៊ុយក្រែនត្រូវការប្រព័ន្ធនេះថែមទៀតដើម្បីការពារហេដ្ឋារចនាសម្ព័ន្ធសំខាន់ៗ និងទីក្រុងតូចធំនានានៅទូទាំងប្រទេស។ លោកសូមអរគុណអធិការបតីអាល្លឺម៉ង់ លោកហ្វ្រីតរីចម៊ែក (Friedrich Merz) ដែលបានផ្ដល់ខែលការពារនេះ។
កាលពីបីខែមុន អាល្លឺម៉ង់ប្រកាសថាខ្លួននឹងផ្ដល់ខែលការពារនេះចំនួន២គ្រឿងទៅឱ្យអ៊ុយក្រែន។ អាល្លឺម៉ង់សម្រេចចិត្តបែបនេះបន្ទាប់ពីទទួលបានការធានាពីអាមេរិកថាអាល្លឺម៉ង់អាចផ្ដល់ប្រព័ន្ធការពារនេះទៅឱ្យអ៊ុយក្រែនបាន។ អាមេរិកសន្យាថាមិនយូរទេ ខ្លួននឹងផ្ដល់ប្រព័ន្ធនេះទៅឱ្យអាល្លឺម៉ង់ដើម្បីដាក់បំពេញឃ្លាំងអាវុធរបស់ពួកគេឡើងវិញ។
អង្គការណាតូកំពុងជួយសម្រួលនៅក្នុងបញ្ហានេះដើម្បីធ្វើយ៉ាងណាផ្ដល់អាវុធធុនធ្ងន់ឱ្យបានទៀងទាត់សម្រាប់អ៊ុយក្រែន។ ក្រុមសម្ព័ន្ធមិត្តនៅអឺរ៉ុប និងកាណាដាកំពុងទិញអាវុធពីអាមេរិកច្រើនៗព្រោះអាមេរិកមានអាវុធច្រើនស្រាប់នៅក្នុងឃ្លាំង ដូច្នេះអាចលក់មួយចំណែកទៅឱ្យប្រទេសដទៃ។ ចំណែកអាមេរិកខ្លួនឯងចាប់តាំងពីលោកត្រាំឡើងកាន់អំណាច លោកពុំដែលអនុម័តផ្ដល់អាវុធទៅឱ្យអ៊ុយក្រែនទេ។ អាវុធដែលអាមេរិកផ្ដល់ឱ្យកន្លងមកគឺជាកិច្ចព្រមព្រៀងដែលបន្សល់ទុកតាំងពីជំនាន់លោកបៃដិន។
ក្រឡេកទៅមើលស្ថានការណ៍សឹកនៅអ៊ុយក្រែនវិញម្ដង រុស្ស៊ីបាញ់មីស៊ីល១២គ្រាប់ និងបញ្ជូនដ្រូន១៣៨គ្រឿងទៅវាយប្រហារអ៊ុយក្រែនកាលពីយប់មិញ និងព្រឹកមិញ។ នៅតំបន់ស៊ូមី (Sumy) ដ្រូនរបស់រុស្ស៊ីវាយប្រហារផ្ទះមួយខ្នងបណ្ដាលឱ្យស្លាប់បុរសម្នាក់ និងរបួស៥នាក់។ ពួកគេជាមនុស្សនៅក្នុងគ្រួសារតែមួយ។ នៅតំបន់ស៊ូមីដដែល ស្ត្រី២នាក់រងរបួសដោយសារការវាយប្រហារដាច់ដោយឡែកមួយទៀត។
នៅឌីនីប្រូ (Dnipro) គ្រាប់មីស៊ីលរបស់រុស្ស៊ីវាយប្រហារចំហាងលក់ទំនិញមួយកន្លែងបណ្ដាលឱ្យរបួសបុរសម្នាក់។ ចំណែកនៅតំបន់មីកូឡាយ (Mykolaiv) ដ្រូនរបស់រុស្ស៊ីវាយប្រហារទីតាំងផលិតថាមពល។ ទន្ទឹមនឹងនោះ អ៊ុយក្រែនក៏បង្កើនការវាយប្រហារទៅលើវិស័យប្រេងរបស់រុស្ស៊ីផងដែរ។ អ៊ុយក្រែនវាយប្រហាររោងចក្រចម្រាញ់ប្រេងរបស់រុស្ស៊ីនៅរ៉ូស្តូស (Rostov) កាលពីយប់មិញបណ្ដាលឱ្យមានភ្លើងឆេះយ៉ាងសន្ធោសន្ធៅ។ នេះបើយោងតាមអគ្គសេនាធិការដ្ឋាននៃកងទ័ពអ៊ុយក្រែន។ លោកហ្សេឡិនស្គីអះអាងថាការវាយប្រហាររបស់អ៊ុយក្រែនបានកាត់បន្ថយបរិមាណផលិតកម្មប្រេងរបស់រុស្ស៊ី២០%។ នេះបើយោងតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ