ខេត្តកំពង់ស្ពឺ ៖ មនុស្សប្រុស~ស្រីចំនួន០២នាក់ មានជនបរទេសម្នាក់ផងនោះ បានរងរបួសធ្ងន់ធ្ងរហើយត្រូវបានរថយន្តសាមុយដឹកយកទៅសង្គ្រោះព្យាបាលនៅមន្ទីរពេទ្យរាជធានីភ្នំពេញ ខណៈដែលរថយន្តស៊េរីទំនើបម៉ាកអាលផាត(ALPHARD) បុកជាមួយរថយន្តធុនធំដឹកទំនិញពីក្រោយយ៉ាងពេញទំហឹងលើផ្លូវល្បឿនលឿនបង្កឱ្យមានការភ្ញាក់ផ្អើល កាលពីវេលាម៉ោង៩ និង២០នាទីយប់ថៃ្ងទី០២ ខែវិច្ឆិកា ឆ្នាំ២០២៥ នៅលើកំណាត់ផ្លូវល្បឿនលឿន នៅត្រង់ចំណុច PK92+100 ភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ។
តាមការបញ្ជាក់ពីកម្លាំងនគរបាលលើផ្លូវល្បឿនលឿន និងផ្នែកចរាចរណ៍ស្រុកភ្នំស្រួចឱ្យដឹងថា នៅមុនពេលកើតហេតុ មានរថយន្ត១គ្រឿង ម៉ាកALPHARD ពណ៌ខ្មៅ ពាក់ផ្លាកលេខភ្នំពេញ 2CF-9670 បើកបរដោយឈ្មោះ ឡន សំបុន ភេទប្រុស អាយុ២០ឆ្នាំ រស់នៅក្នុងភូមិអង្គ សង្កាត់ប្រទះឡាង ខណ្ឌកំបូល រាជធានីភ្នំពេញ និងអ្នករួមដំណើរម្នាក់ ឈ្មោះ SHIN JI IN ភេទស្រី អាយុ៣០ឆ្នាំ ជនជាតិកូរ៉េខាងត្បូងកាន់លិខិតឆ្លងដែនលេខ GK2233243 ស្នាក់នៅរាជធានីភ្នំពេញ បើកបរតាមបណ្តោយផ្លូវល្បឿនលឿនពីទិសខាងលិចទៅទិសខាងកើត(ព្រះសីហនុ-ភ្នំពេញ)។
លុះពេលធ្វើដំណើរមកដល់ចំណុចកើតហេតុខាងលើ បានបុកពីក្រោយជាមួយរថយន្តប្រភេទដឹកទំនិញធុនធំ០១គ្រឿង ម៉ាកFUSO ពណ៌.ស ពាក់ផ្លាកលេខភ្នំពេញ3C-2527 សណ្តោងសឺមីរ៉ឺម៉ក ពាក់ផ្លាកលេខព្រះសីហនុ 4A-2195 អ្នកបើកបរមិនស្គាល់អត្តសញ្ញាណ (បានរត់គេចខ្លួនចេញពីកន្លែងកើតហេតុ) ដែលកំពុងបើកបរស្របទិសគ្នាពេញទំហឹង បណ្ដាលឲ្យរងរបួសធ្ងន់មនុស្សទាំង០២នាក់ ដែលមានឈ្មោះឡន សំបុន និង SHIN JI IN ត្រូវបានកំលាំងមានសមត្ថកិច្ចនិងបានហៅរថយន្តសង្គ្រោះ មន្ទីរពេទ្យបង្អែកត្រពាំងក្រឡឹង ជួយអន្ដរាគមន៍បញ្ជូនទៅសង្គ្រោះនៅមន្ទីរពេទ្យកាល់ម៉ែតរាជធានីភ្នំពេញ ។
នគរបាលចរាចរណ៍ស្រុកភ្នំស្រួចបានបញ្ជាក់ថា ចំពោះវត្ថុតាងមធ្យោបាយរថយន្តទាំង០២គ្រឿង កំលាំងនគរបាលចរារចរណ៍នៃអធិការដ្ឋាននគរបាលស្រុកភ្នំស្រួចបានបញ្ជូនទៅរក្សាទុក និងរង់ចាំកសាងសំណុំរឿងចាត់ការបន្តតាមផ្លូវ៕
ចែករំលែកព័តមាននេះ