ខេត្តកំពង់ធំ ៖ បុរសជាស្មៀនឃុំម្នាក់បានស្លាប់នៅនឹងកន្លែងកើតហេតុ ក្នុងហេតុការណ៍គ្រោះថ្នាក់ចរាចរណ៍រវាងម៉ូតូបុកជាមួយគោយន្តកន្ត្រៃកាលពីវេលាម៉ោង៧នាទីយប់ថ្ងៃទី៥ ខែឧសភា ឆ្នាំ២០១៩ នៅលើកំណាត់ផ្លូវជាតិលេខ៦ ចន្លោះគីឡូម៉ែត្រលេខ១១៣-១១៤ ភូមិថ្នល់ជាតិ ឃុំបារាយណ៍ ស្រុកបារាយណ៍ ខេត្តកំពង់ធំ ។
តាមប្រភពពីសមត្ថកិច្ចបានប្រាប់ឱ្យដឹងថា ភាគីខាងម៉ូតូមួយគ្រឿងម៉ាកហុងដាឌ្រីម ធុនC125 ពណ៌ខ្មៅ ពាក់ស្លាកលេខ កំពង់ធំ ១I-៥៥៣៦ បើកបរដោយឈ្មោះ សេង ធួក ភេទប្រុស អាយុ៤៣ឆ្នាំ មុខរបរស្មៀនឃុំបារាយណ៍ រស់នៅភូមិបុស្សល្វា ឃុំស្រឡៅ ស្រុកបារាយណ៍ ខេត្តកំពង់ធំ បានស្លាប់នៅកន្លែងកើតហេតុ ។ ចំណែកអ្នកបើកបរគោយន្តមិនស្គាល់អត្តសញ្ញាណបានបើកគេចខ្លួនបាត់ ។
តាមប្រភពដដែលបានបន្តថា មុនពេលកើតហេតុ គេឃើញជនរងគ្រោះបើកបរម៉ូតូមួយគ្រឿងក្នុងល្បឿនលឿនធ្វើដំណើរក្នុងទិសដៅពីជើងទៅត្បូង លុះមកដល់ចំណុចកើតហេតុបានបុកពីក្រោយគោយន្តកន្ត្រៃដែលគ្មានភ្លើងបំភ្លឺក្រោយកំពុងធ្វើដំណើរស្របទិសគ្នា បណ្តាលឲ្យអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ បន្ទាប់ពីកើតហេតុអ្នកបើកបរគោយន្តបានបើកគេចបាត់។
ក្រោយពេលកើតហេតុ សមត្ថកិច្ចបានយកម៉ូតូទៅរក្សាទុកនៅអធិការដ្ឋាននគរបាលស្រុកបារាយណ៍ និងប្រគល់សពជនរងគ្រោះជូនក្រុមគ្រួសារដើម្បីយកទៅធ្វើបុណ្យតាមប្រពៃណី ។ ចំណែកអ្នកបើកបរគោយន្តដែលរត់គេចខ្លួនត្រូវបានសមត្ថកិច្ចជំនាញកំពុងស្រាវជ្រាវតាមចាប់ខ្លួន ដើម្បីយកមកចាត់ការតាមនីតិវិធី ៕
ចែករំលែកព័តមាននេះ