រាជធានីភ្នំពេញ ៖ ឪពុកនិងកូនស្រី​តូច​ បានស្លាប់ទាំង២នាក់ភ្លាមៗនៅកន្លែងកើតហេតុយ៉ាងអាណោចអាធ័ម ចំណែកកូនស្រីអាយុ៣ឆ្នាំម្នាក់ទៀតខ្ទាតចេញក្រៅ រងរបួសស្រាល ខណៈជនរងគ្រោះ​​ជិះម៉ូតូ១គ្រឿងចេញពីយកកូនៗនៅផ្ទះម្តាយ លុះត្រឡប់ទៅផ្ទះវិញ ត្រូវបានរថយន្តបែន​ដឹក​ដី១គ្រឿង​បើកថយក្រោយ ដើម្បីចាក់ដីតាមចិញ្ចើមផ្លូវ ក៏កិន បណ្តាលឱ្យ​ស្លាប់និងរបួសតែម្តង ។

ហេតុការណ៍ខាងលើនេះ​ បង្កការភ្ញាក់ផ្អើលកាលពីវេលាម៉ោង ៦និង១០នាទីយប់ថ្ងៃទី ៨ ខែធ្នូឆ្នាំ២០២៥ តាមបណ្តោយផ្លូវបេតុងលេខ៤២ ត្រង់ចំណុចក្បែរស្ពានបឹងក្រចាប់ ភូមិទួល សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។

ជនរងគ្រោះ​ទាំង៣នាក់ខាងលើរួមមាន ១-ឈ្មោះ ហ៊ីម ស៊ីថា អាយុ៤៤ឆ្នាំ មុខរបរកម្មករោងចក្រ ជាអ្នកបើកបរម៉ូតូ និង​ត្រូវជាឪពុក បានស្លាប់ ២-ឈ្មោះ ស៊ីថា ស្រីលក្ខ័ ភេទស្រី អាយុ៥ឆ្នាំ ត្រូវជាកូន បានស្លាប់ ​និង៣-ឈ្មោះ ស៊ីថា ស្រីលីន ភេទស្រី អាយុ ៣ឆ្នាំ ត្រូវជាកូន រងរបួសស្រាល ។ ជនរងគ្រោះ​ទាំង៣នាក់ត្រូវជាឪពុកនិងកូន មានទីលំនៅភូមិត្នោតខ្ពស់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។ ជនរងគ្រោះទាំង៣នាក់​ជិះម៉ូតូ១គ្រឿងម៉ាកហុងដា គុបជ្រុង ពណ៍ទឹកប៊ិច ពាក់ស្លាកលេខភ្នំពេញ1F-1969។

ដោយឡែក រថយន្តបែនដឹកដី១គ្រឿងខាងលើ ម៉ាកនី​ស្សាន់​ ពណ៌ស្លែ ពាក់ស្លាកលេខ ចង្កូតស្តាំ KDL-1879 បើកបរដោយបុរសម្នាក់ មិនស្គាល់អត្តសញ្ញាណ បានរត់គេចខ្លួនបាត់ ។​

ប្រភពព័ត៌មានបានអោយដឹងថា ឪពុកនិងម្តាយទាំងពីរនាក់ប្តីប្រពន្ធ ជារៀងរាល់ថ្ងៃ នៅពេលព្រឹក មុនពេលចេញទៅធ្វើការងាររោងចក្រ បុរសជា​ឪពុកតែងតែជិះម៉ូតូ១គ្រឿងដឹកកូនស្រីទាំង២នាក់​យកទៅផ្ញើរនឹងម្តាយបង្កើតអោយជួយមើលថែនៅឯភូមិឧសភា សង្កាត់ ពន្សាំង ខណ្ឌព្រែកព្នៅ ។ រហូតដល់ល្ងាច ចេញពីធ្វើការងាររោងចក្រវិញ តែងតែទៅឌុបកូនស្រីទាំងពីរនាក់នោះត្រឡប់មកផ្ទះវិញ។

ប្រភពបានអោយដឹងទៀតថា នៅល្ងាចថ្ងៃកើតហេតុ បុរសជាឪពុក ខណៈពេលចេញពីធ្វើការវិញបានជិះម៉ូតូ១គ្រឿងទៅយកកូនស្រី​ទាំងពីរនាក់នៅផ្ទះម្តាយបង្កើត រួចត្រឡប់ទៅ​ផ្ទះវិញដោយធ្វើដំណើរតាមបណ្តោយផ្លូវបេតុងលេខ៤២ ក្នុងទិសដៅពីជើងទៅត្បូង ដោយ​កូនស្រីបងជិះខាងក្រោយ រីឯកូនស្រីប្អូនជិះខាងមុខ ខណៈពេលទៅដល់ត្រង់ចំណុចកើតហេតុ ក៏មានរថយន្តបែនដឹកដី១​គ្រឿង​ធ្វើដំណើតាមបណ្តោយផ្លូវបេតុងលេខ៤២ក្នុងទិសដៅពីជើងទៅត្បូងបានឈប់ ហើយបើក រីយ៉ែថយក្រោយ ដើម្បីចាក់ដីតាមចិញ្ចើមផ្លូវក្បែរគល់ស្ពាន ដើម្បីពង្រីកស្ពានបឹងក្រចាប់ ។

តាមប្រភពព័ត៌មានបានបន្តទៀត​ថា ដោយរថយន្តរ៉ីយ៉ែថយក្រោយ ក្នុងទិសដៅពីត្បូងទៅជើងបញ្រ្ចាសទិសដៅ ហើយគ្មានអ្នកស៊ីញ៉ូនិងមើលផ្លូវពីក្រោយក៏បានបុកនិងកិនម៉ូតូជនរងគ្រោះបណ្តាលអោយបុរសជាឪពុកនិងកូនស្រីច្បងស្លាប់ទាំង២នាក់​ភ្លាមៗនៅនឹងកើតហេតុយ៉ាងអាណោចអាធ័ម ចំណែកឯកូនស្រីប្អូនដែលអង្គុយខាងមុខខ្ទាតចេញទៅចិញ្ចើមផ្លូវរងរបួសស្រាល ។ បន្ទាប់មករថយន្តបង្កបានបើករថយន្តទៅមុខជាង២០ម៉ែត្រឈប់រថយន្តចុះរត់គេចខ្លួនបាត់ស្រមោល។

ក្រោយកើតហេតុ សមត្ថកិច្ចមូលដ្ឋានសហការជាមួយនឹងមន្ត្រីជំនាញចរាចរណ៍ចុះមកដល់ធ្វើការវាស់វែងយករថយន្តនិងម៉ូតូទាំងពីរគ្រឿងទៅរក្សាទុកជាបណ្ដោះអាសន្ននៅការិយាល័យចរាចរណផ្លូវគោករាជធានីភ្នំពេញរង់ចាំការដោះស្រាយគ្នានៅពេលក្រោយ ។ ចំណែកសពជនរងគ្រោះទាំង២នាក់ឪពុកនិងកូន ត្រូវបានសមត្ថកិច្ច​ប្រគល់ទៅអោយក្រុមគ្រួសារដឹកយកទៅធ្វើបុណ្យតាមប្រពៃណី ៕