រាជធានីភ្នំពេញ ៖ ក្មេងស្រីម្នាក់បានស្លាប់ភ្លាមៗនៅនឹងកន្លែង រីឯមិត្តភក្ដិស្រីម្នាក់ទៀតរងរបួសស្រាល ខណៈពួកនាងជិះម៉ូតូ១គ្រឿងឌុបគ្នាវ៉ាជែងខាងឆ្វេងរថយន្តទ្រុងឃ្លុបដឹកអីវាន់១គ្រឿងនៅត្រង់ចំណុចរង្វង់មូលដែលមានផ្លូវកោង ។ ពេលនោះវ៉ារថយន្តអត់ផុត ក៏ទាក់ដៃចង្កូតជាមួយរថយន្តខាងលើនោះ បណ្ដាលឲ្យដួលខ្ទាតចូលក្រោមកង់ ក៏ត្រូវរថយន្តនេះកិនបែកក្បាលម្នាក់ម្នាក់តែម្ដង បន្ទាប់មករថយន្តបានបើកហូសទៅមុខចំងាយប្រមាណជាង៣០ម៉ែត្រទើបឈប់ រួចអ្នកបើកបរបានចុះរត់បាត់ដោយសុវត្ថិភាព ។
គ្រោះថ្នាក់ចរាចរណ៍នោះបានកើតឡើងកាលពីវេលាម៉ោង១និង២៥នាទីរសៀលថ្ងៃទី០៥ ខែធ្នូ ឆ្នាំ២០២៥ នៅត្រង់ចំណុចរង្វង់មូលគល់ស្ពានអាកាសមហាវិថីសុី ជីនពីង ត្រើយខាងត្បូង ស្ថិតនៅក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានប្រាប់ឲ្យដឹងថា ក្មេងស្រីរងគ្រោះឈ្មោះ ស៊ឹម សាណាក់ឡាលីន អាយុ១៣ឆ្នាំ ជាសិស្សរៀននៅសាលាឯកជនមួយ មានទីលំនៅភូមិព្រៃស្ពឺ សង្កាត់ចោមចៅទី២ ខណ្ឌពោធិ៍សែនជ័យ ។ ចំណែកមិត្តភក្ដិស្រីម្នាក់ទៀតដែលរួមដំណើរជាមួយហើយរងរបួសស្រាលឈ្មោះចរត្តនា រូស្ស រូហ្សា អាយុ១២ឆ្នាំ ជាសិស្សរៀននៅសាលាជាមួយគ្នា មានទីលំនៅភូមិទួលកី សង្កាត់ភ្លើងឆេះរទេះ ខណ្ឌកំបូល ។
សមត្ថកិច្ចបានប្រាប់ឲ្យដឹងបន្តទៀតថា នៅមុនពេលកើតហេតុ ក្មេងស្រីរងគ្រោះទាំង២នាក់បានជិះម៉ូតូ១គ្រឿងម៉ាហុងដាប៊ីត ពណ៍ស ពាក់ស្លាកលេខភ្នំពេញ1LH-7131 (ម៉ូតូរបស់ក្មេងស្រីឈ្មោះចរត្តនា រូស្សរូហ្សា ) ចេញពីសាលាឯកជនមួយកន្លែង ស្ថិតនៅតាមផ្លូវជាតិលេខ ភូមិព្រៃព្រីងត្បូង១ សង្កាត់ទី២ ខណ្ឌពោធិ៍សែនជ័យ ។ ដោយបានឌុបគ្នាធ្វើដំណើរក្នុងទិសដៅពីជើងទៅត្បូង ហើយក្មេងស្រីឈ្មោះ ស៊ឹម សាណាក់ឡាលីន (អ្នកស្លាប់)គឺជាអ្នកបើកបរម៉ូតូ ខណៈនោះក៏ពុំដឹងថាពួកនាងជិះពីទីណានោះទេ ទើបមិននៅរៀន បែរជានាំគ្នាជិះម៉ូតូចេញពីសាលាបែបនេះ ។
សមត្ថកិច្ចបានបញ្ជាក់ប្រាប់បន្តទៀតថា លុះពេលទៅដល់ត្រង់ចំណុចកើតហេតុបានជែងខាងឆ្វេងរថយន្តឃ្លុបដឹកទំនិះ១គ្រឿង ម៉ាកហុីយ៉ាន់ដាយពណ៍ស ពាក់ស្លាកលេខ ភ្នំពេញ23E-8563 ដែលកំពុងបើកស្របគ្នាត្រង់ចំណុចរង្វង់មូលគល់ស្ពានអាកាសមហាវិថីសុី ជីនពីង ។
ខណៈនោះវ៉ាអត់ផុតក៏ទាក់ដៃចង្កូតជាមួយរថយន្តខាងលើ បណ្ដាលឲ្យដួលខ្ទាតចូលក្រោមកង់រថយន្តនោះកិនបែកក្បាលស្លាប់ក្មេងស្រីអ្នកបើកម៉ូតូភ្លាមៗ ចំណែកមិត្តភក្ដិដែលជាម្ចាស់ម៉ូតូរងរបួសស្រាល ហើយរថយន្ត បានបើកហូសទៅមុខចំងាយប្រមាណជាង៣០ម៉ែត្រទើបឈប់ រួចអ្នកបើកបរបសនចុះរត់បាត់ ។
បន្ទាប់ពីមានឧប្បត្តិហេតុកើតឡើង គេបានឃើញស្ត្រីម្នាក់ដែលត្រូវជាម្ដាយមីងក្មេងស្រីរងគ្រោះបានទៅដល់យំឱបសពក្មួយស្រី ដោយគាត់បាននិយាយថា នៅវេលាម៉ោង១រសៀលថ្ងៃកើតហេតុ គាត់បានដឹកជូនក្មួយស្រីរងគ្រោះចេញពីផ្ទះទៅដាក់នៅសាលាឯកជន ស្ថិតនៅតាមផ្លូវជាតិលេខ ភូមិព្រៃព្រីងត្បូង១ សង្កាត់ទី២ ខណ្ឌពោធិ៍សែនជ័យ ។ លុះពេលដាក់នៅសាលារួច ក៏ត្រឡប់ទៅផ្ទះវិញ ក្រោយមកមិនបានដឹងថាក្មួយជិះម៉ូតូជាមួយមិត្តភក្ដិចេញពីសាលាទៅណានោះទេ ក៏ស្រាប់តែមានគ្រោះថ្នាក់ចរាចរណ៍រហូតដល់ស្លាប់បែបនេះទៅវិញ ។
ក្រោយពេលកើតហេតុនគរបាលការិយាល័យចរាចរផ្លូវគោកនៃស្នងការដ្ឋានរាជធានីភ្នំពេញ បានចុះទៅវាស់វែងនិងប្រគល់សាកសពឲ្យក្រុមគ្រួសារនាំយកទៅធ្វើបុណ្យតាមប្រពៃណី ព្រមទាំងនាំយកម៉ូតូនិងរថយន្តទៅរក្សាទុករង់ចាំដោះស្រាយពេលក្រោយ ៕
ចែករំលែកព័តមាននេះ