វិសាខា លត់កំពង់ចាមចាស់ដៃលើទឹកដីរបស់ខ្លួនជាមួយលទ្ធផលស្ទើរមិនគួរឱ្យជឿ

ថ្ងៃទី ០៦ ខែ ឧសភា ឆ្នាំ ២០១៩

ម៉ោង ១៥:២៦

រាជធានីភ្នំពេញ ៖ ក្រុមបាល់ទាត់វិសាខា បានលត់ក្រុមខេត្តកំពង់ចាមយ៉ាងចាស់ដៃលើទឹកដីរបស់ខ្លួនជាមួយលទ្ធផល១៤-០ស្ទើរមិនគួរឱ្យជឿនៅក្នុងព្រឹត្តិការណ៍បាល់ទាត់ពានរង្វាន់មិត្តហ្វូនខេមបូឌានលីគឆ្នាំ២០១៩កាលពីល្ងាចថ្ងៃទី៤ ឧសភា ។ អ្វីដែលគេចាប់អារម្មណ៍ខ្លាំងនោះគឺកីឡាករ កែវ សុខផេង ដែលជាខ្សែប្រយុទ្ធរបស់ក្រុមវិសាខា មានឱកាសស៊ុតបាល់បញ្ចូលទីគូប្រកួតបានរហូតដល់ទៅ៧គ្រាប់ឯណោះគឺនៅនាទីទី៣,១២,២៣,៣០,៤៥,៦៩ និងនាទីទី៧១ ។

ចំណែក៧គ្រាប់ទៀតរកបានដោយកីឡាករ SKraparas Evangelosចំនួន២គ្រាប់នៅនាទី៤៤និង៤៦, កីឡាករNikolov Luben Gueorguien រកបាន១គ្រាប់នៅនាទីទី៥៨, កីឡាករស៊ិន សុផាណាត់ រកបាន២គ្រាប់នៅនាទីទី៨០និ៨៤, កីឡាករPak Song Cholរកបាន១គ្រាប់នៅនាទីទី៨៣ និងកីឡាករសុខ សុវណ្ណរកបាន១គ្រាប់នៅនាទីទី៨៩ ។ ក្រុមវិសាខាប្រកួតបាន៦លើក ឈ្នះ៤ ស្មើ១ និងចាញ់១មាន១៣ពិន្ទុ ក្នុងពេលក្រុមខេត្តកំពង់ចាមស្គាល់ឈ្នះតែ១លើកគត់។

នៅថ្ងៃដដែលក្រុមសូទីឡូអង្គរបានត្រឹមស្មើ១-១ជាមួយក្រុមក្រសួងការពារជាតិនៅលើទីលានខេត្តសៀមរាប ។ សរុបការប្រកួតទាំង៦លើកមកនេះ ក្រុមសូទីឡូអង្គរទទួលលទ្ធផលស្មើ២លើក និងចាញ់៤លើក ខណៈក្រុមក្រសួងការពារជាតិប្រកួតបាន៦លើកដូចគ្នាឈ្នះ៣ ស្មើ២ ចាញ់១ មាន១១ពិន្ទុ។

មួយប្រកួតទៀត ក្រុមអគ្គស្នងការដ្ឋាននគរបាលជាតិ បានចាញ់ក្រុមគីរីវង់សុខសែនជ័យ២-៣ នៅលើទីលានអគ្គិសនីកម្ពុជា ។ ក្រុមអគ្គស្នងការដ្ឋាននគរបាលជាតិប្រកួតបាន៦លើកដ ឈ្នះ១ ស្មើ១ ចាញ់់៤ មាន៤ពិន្ទុ ។ ចំណែកក្រុមគីរីវង់សុខសែនជ័យប្រកួតបាន៦លើកដូចគ្នា ឈ្នះ២ ចាញ់៤ មាន៦ពិន្ទុ ៕