ខេត្តតាកែវ ៖ ជនសង្ស័យម្នាក់ដែលជាអ្នកចែកចាយ និងប្រើប្រាស់គ្រឿងញៀន ហើយបានបាញ់តដៃជាមួយកំលាំងនគរបាល ពេលចុះបង្ក្រាបនោះត្រូវបានកំលាំងជំនាញការិយាល័យប្រឆាំងការជួញដូគ្រឿងញៀនខេត្តបានបញ្ជូនទៅកាន់សាលាដំបូងខេត្តដើម្បីចាត់ការទៅតាមច្បាប់ហើយកាលពីល្ងាចថ្ងៃទី៥ ឧសភា ២០១៩ នេះ។ គួររំលឹកផងដែរថា…
ខេត្តតាកែវ ៖ ជនសង្ស័យម្នាក់ដែលជាអ្នកចែកចាយ និងប្រើប្រាស់គ្រឿងញៀន ហើយបានបាញ់តដៃជាមួយកំលាំងនគរបាល ពេលចុះបង្ក្រាបនោះត្រូវបានកំលាំងជំនាញការិយាល័យប្រឆាំងការជួញដូគ្រឿងញៀនខេត្តបានបញ្ជូនទៅកាន់សាលាដំបូងខេត្តដើម្បីចាត់ការទៅតាមច្បាប់ហើយកាលពីល្ងាចថ្ងៃទី៥ ឧសភា ២០១៩ នេះ។
គួររំលឹកផងដែរថា កាលពីថ្ងៃទី៤ ខែឧសភា ឆ្នាំ២០១៩ កន្លងទៅនេះ លោក ឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានចុះដឹកនាំបញ្ជាដោយផ្ទាល់កម្លាំងស្នងការដ្ឋាននគរបាលខេត្ត និងកម្លាំងអធិការដ្ឋាននគរបាលស្រុកបាទី សហការជាមួយកំលាំងអន្តរាគមន៍ពិសេស នៃអគ្គស្នងការដ្ឋាននគរបាលជាតិ ដឹកនាំដោយ លោកឧត្តមសេនីយ៍ឯក ចាន់ ស៊ីថា អគ្គស្នងការរងនគរបាលជាតិ ទទួលផែនអង្គភាពអន្តរាគមន៍ពិសេស ក្រោមការណែនាំបញ្ជាផ្ទាល់ពីសំណាក់លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងមានការសម្របសំរួលពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ ចុះបង្ក្រាបមុខសញ្ញាជួញដូរដោយខុសច្បាប់នូវសារធាតុញៀន និងកាន់កាប់អាវុធដោយគ្មានការអនុញ្ញាតនៅចំណុចភូមិក្រាំងក្រចាង ឃុំពារាម ស្រុកបាទី ខេត្តតាកែវ។
លោកឧត្តមសេនីយ៍ទោសុខ សំណាង ស្នងការនគរបាលខេត្តបានមានប្រសាសន៍ថា ករណីនេះនៅពេលកម្លាំងជំនាញបានចុះបង្ក្រាបជនសង្ស័យមានគ្នា៣នាក់ហើយ ក្នុងនោះមាន១នាក់កាន់អាវុធខ្លីបានផ្តើមបាញ់សំដៅមកលើប៉ូលិសចំនួន៣គ្រាប់ រួចរត់ទៅសំងំក្នុងផ្ទះប្រជាជន កម្លាំងជំនាញបានព្យាយាមប្រើប្រាស់គ្រប់មធ្យោបាយអស់រយៈពេលចាប់ពីម៉ោង១១និង៣០នាទីរហូតដល់វេលាម៉ោង៣និង៥នាទីថ្ងៃដដែល ទើបឃាត់ខ្លួនជនសង្ស័យបានម្នាក់ឈ្មោះ យឹម វន្នី ភេទ ប្រុស អាយុ២២ឆ្នាំ មុខរបរកម្មករមកពីប្រទេសថៃ ស្រុកកំណើតក្នុងភូមិដូង ឃុំដូង ស្រុកបាទី ខេត្តតាកែវ ។
ជនសង្ស័យដែលឃាត់ខ្លួនបានខាងលើនេះជាមុខសញ្ញាចាស់ ធ្លាប់ជាប់ពន្ធនាគារព្រៃសអស់រយៈពេល២ឆ្នាំ៦ខែ កាលពីអំឡុងឆ្នាំ២០១៦ ពាក់ព័ន្ធករណីគ្រឿងញៀន។
ក្នុងកិច្ចប្រតិបត្តិការបង្ក្រាបខាងលើនេះពុំមានរងរបួសដល់មនុស្សណាម្នាក់ទេ និងដកហូតវត្ថុតាងបានរួមមាន ថ្នាំញៀនចំនួន៦កញ្ចប់ អាវុធខ្លី១ដើមម៉ាក RETAY G19C លេខ180901278 មានគ្រាប់ចំនួន៥គ្រាប់ ម៉ូតូមួយគ្រឿងម៉ាកហុងដា ធុនC១២៥ ស៊េរី២០១៨ ពណ៌ខ្មៅ ពាក់ស្លាកលេខ ភ្នំពេញ ១HH-៩០៦៩ ដាវសាំម៉ូរ៉ៃ២ដើម ទូរស័ព្ទ៤គ្រឿង និងស្នាប់ដៃ១។
ក្រោយពេលចុះបង្ក្រាប អង្គភាពអន្តរាគមន៍ពិសេសបានប្រគល់ជនសង្ស័យជូនស្នងការដ្ឋាននគរបាលខេត្តតាកែវ បច្ចុប្បន្នកម្លាំងជំនាញការិយាល័យប្រឆាំងគ្រឿងញៀនកំពុងកសាងសំណុំរឿងបញ្ជូនមកសាលាដំបូងខេត្តដើម្បីចាត់ការតាមច្បាប់ ៕
ចែករំលែកព័តមាននេះ