រាជធានីភ្នំពេញ ៖ ប៉ុន្មានឆ្នាំចុងក្រោយវិស័យសំណង់និងអចលនទ្រព្យក្នុងប្រទេសកម្ពុជាមានសន្ទុះរីកចម្រើនខ្លាំងក្លា ហើយការរីកចម្រើននៃវិស័យមួយនេះត្រូវបានស្ថាប័នហិរញ្ញវត្ថុជាតិនិងអន្តរជាតិបង្ហាញការវិនិយោគផ្ទាល់មកពីបរទេស មួយភាគធំផ្តោតលើវិស័យសំណង់និងអចលទ្រព្យ ក្នុងនោះមកពីប្រទេសចិនច្រើនជាងគេ ។
អ្នកជំនាញខាងអចនទ្រព្យបានលើកឡើងថាតម្លៃអចលទ្រព្យហាក់ខ្ពស់ដោយសារតែលំហូរចូលនៃវិនិយោគិនចិន ជាពិសេសតម្លៃដីធ្លីនៅខេត្តព្រះសីហនុ តែម្តងដែលវិនិយោគិនចិនហ៊ានទិញក្នុងតម្លៃខ្ពស់។ ងាកទៅរបាយការណ៍ធនាគារពិភពលោកចេញផ្សាយកាលពីថ្មីៗនេះបានបង្ហាញឲ្យដឹងថាវិនិយោគផ្ទាល់ពីបរទេសត្រូវបានប៉ាន់ស្មានថាបានឡើងដល់ ១៣,៤ភាគរយ នៃផលិតផលក្នុងស្រុកសរុប (ផ.ស.ស) នៅក្នុងឆ្នាំ២០១៨។ ទាំងកំណើននៃការនាំចេញ និងទាំងកំណើននៃការវិនិយោគផ្ទាល់ពីបរទេស បានរួមចំណែកដល់ការកើនឡើងនៃទុនបម្រុងអន្តរជាតិ របស់ប្រទេស ដែលនៅក្នុងឆ្នាំ២០១៨ មានទំហំរហូតដល់ទៅ ១០,១ប៊ីលានដុល្លារអាមេរិក ឬប្រហែលនឹង៦ខែនៃតម្លៃនៃការនាំចូល។
របាយការណ៍ដដែលបានបញ្ជាក់ថា «ជាងពាក់កណ្តាលនៃការហូរចូលទុនពីក្រៅ មានប្រភពមកពីប្រទេសចិន ហើយត្រូវបានតម្រង់ទិសទៅធ្វើការវិនិយោគលើវិស័យសំណង់
(ហេដ្ឋារចនាសម្ព័ន្ធ និងសំណង់អគារពាណិជ្ជកម្មនិងលំនៅឋាន) វិស័យទេសចរណ៍ និង មួយផ្នែកតូច ទៅលើវិស័យផលិតកម្ម និងកសិកម្ម។ ខេត្តព្រះសីហនុដែលនៅជាប់ឆ្នេរសមុទ្រ នៅតែបន្តជាចំណុចក្តៅមួយនៃកំណើនគម្រោងសាងសង់ តាមរយៈការវិនិយោគហិរញ្ញវត្ថុផ្ទាល់មួយភាគធំលើសលុប ពីប្រទេសចិន»។
ដោយឡែកបើយោងតាមរបាយការណ៍របស់ធនាគារជាតិនៃកម្ពុជាស្តីពីស្ថានភាពស្ថិរភាពហិរញ្ញវត្ថុប្រចាំឆ្នាំ២០១៨បង្ហាញថា ការវិនិយោគផ្ទាល់បរទេសនៅបន្តមានភាពរឹងមាំ ដោយមានលំហូរចូលទៅក្នុងវិស័យហិរញ្ញវត្ថុ បន្ទាប់ពីមានការបង្កើនដើមទុនចុះបញ្ជីអប្បបរមា រួមជាមួយនឹងលំហូរចូលទៅកាន់វិស័យកម្មន្តសាលនិងសំណង់។ លំហូរវិនិយោគផ្ទាល់បរទេសសរុប ប្រមាណជាង ៤០% មានប្រភពមកពីប្រទេសចិន។ ស្របពេលស្ថាប័នហិរញ្ញវត្ថុជាតិនអន្តរជាតិវាយតម្លៃថាការវិនិយោគផ្ទាល់ពីមកពីប្រទេសចិនហើយផ្តោតទៅលើវិស័យសំណង់និងអចលនទ្រព្យ គេសង្កេតឃើញថាខេត្តព្រះសីហនុបានកំពុងក្លាយជាគោដៅវិនិយោគដ៏សំខាន់ប្រកបដោយសក្តានុពលទៅលើវិស័យសំណង់និងអចលនទ្រព្យ ធ្វើឱ្យតម្លៃដីធ្លីកើនឡើងទ្វេដងប្រើប្រៀបទៅនិងតំបន់ផ្សេងទៀតនៅកម្ពុជា។
លោក វ៉ា វីរៈ នាយកក្រុមហ៊ុន Century 21 Fortuna Investment ធ្លាប់ប្រាប់ឱ្យដឹងថាតម្លៃដីធ្លីនៅក្រុងព្រះសីហនុ កន្លងមកនៅតំបន់មាត់សមុទ្រ ក្បែផ្លូវធំៗមួយម៉ែត្រការ៉េថ្លែអាចដល់៤.០០០ដុល្លារអាមេរិក។លោកបន្តថា «ដីធ្លីនៅតំបន់ក្រុងព្រះសីហនុ ក្រៅពីជនជាតិចិន គ្មានជនជាតិណាផ្សេងទៀតហ៊ានទិញក្នុងតម្លៃថ្លៃនិងមានទំហំដីធំនោះទេ ដោយសារសម័យនេះអ្នកដែលសំបូរលុយច្រើនមានតែជនជាតិចិន ព្រោះកំណើនសេដ្ឋកិច្ចចិនរយៈពេលជាង៣០ឆ្នាំកន្លងមកនេះមានកំណើនខ្ពស់។ដូចនេះជនជាតិចិន ក្រុមហ៊ុន និងវិនិយោគិនចិនភាគច្រើនមានលុយច្រើន។លើសពីនេះតំបន់ព្រះសីហនុ ជាតំបន់មួយល្អស្ថិតនៅលើគម្រោងផ្លូវសូត្ររបស់ចិន(ផ្លូវ១ខ្សែក្រវាត់១) ដែលចិនចាត់ទុកជាតំបន់យុទ្ធសាស្ត្រ»។
បើតាមសៀវភៅរបាយករណ៍ធនាគារជាតិនៃកម្ពុជា ការវិនិយោគផ្ទាល់ពីបរទេសនិងឥណទានចំពោះ វិស័យសំណង់បានបន្តកើនឡើងស្របតាមកំណើននៃការផ្គត់ផ្គង់។ ការផ្គត់ផ្គង់អចលនទ្រព្យនៅក្នុងចំណែកទីផ្សារភាគច្រើនរំពឹងថាកើនឡើង ដោយសារការផ្គត់ផ្គង់ពីគម្រោងដែលបានពន្យារពេល ព្រមទាំងពីគម្រោងដែលបានគ្រោងទុក។ ដូច្នេះ ការធ្លាក់ចុះនៃតម្រូវការក្នុងស្រុកនិងក្រៅស្រុកអាចបណ្តាលឱ្យមានការផ្គត់ផ្គង់លើសតម្រូវការ។ ដើម្បីកាត់បន្ថយភាពងាយរងគ្រោះក្នុងវិស័យអចលនទ្រព្យ គោលនយោបាយម៉ាក្រូប្រុងប្រយ័ត្នមួយចំនួនត្រូវបានបន្តពិភាក្សាទាំងលើផ្នែកផ្គត់ផ្គង់និងតម្រូវការនៃវិស័យនេះ ហើយជាមួយគ្នានេះ ការពង្រឹងកិច្ចសហការរវាងអាជ្ញាធរពាក់ព័ន្ធពិតជាមានសារៈសំខាន់ ក្នុងការកាត់បន្ថយហានិភ័យក្នុងវិស័យនេះ។ ការកើនឡើងនៃហានិភ័យឥណទានទៅកាន់វិស័យសំណង់និងអចលនទ្រព្យ ទាមទារឱ្យមានគោលនយោបាយម៉ាក្រូប្រុងប្រយ័ត្នមួយចំនួនក្នុងការទប់ស្កាត់ហានិភ័យដែលបណ្តាលមកពីផ្នែកផ្គត់ផ្គង់។ ជាក់ស្តែង គោល-នយោបាយដែលត្រូវបានប្រើប្រាស់យ៉ាងទូលំទូលាយនៅប្រទេសដទៃ មានដូចជាការដាក់កំហិតទៅលើដើមទុនតាមវិស័យរបស់គ្រឹះស្ថានហិរញ្ញវត្ថុ និងការកំណត់ទំងន់ហានិភ័យមានលក្ខណៈខ្ពស់សម្រាប់ឥណទានទៅកាន់វិស័យសំណង់និងវិស័យដែលទាក់ទងនឹងអចលនទ្រព្យជាដើម៕
ចែករំលែកព័តមាននេះ