សាច់គោនៅប្រទេសកម្ពុជាដែលថ្លៃបំផុត គឺមួយគីឡូក្រាមមានតម្លៃប្រមាណជា៦ម៉ឺនរៀល ប៉ុណ្ណោះ ប៉ុន្តែសម្រាប់សាច់គោជប៉ុនវិញមួយគីឡូក្រាមមានតម្លៃដល់ទៅ៦០០ដុល្លារឡើងឯណោះ ។ ប្រភពសាច់គោដែលថ្លៃជាងគេនោះ គឺប្រភេទសាច់គោ Kobe និង Wagyu…
សាច់គោនៅប្រទេសកម្ពុជាដែលថ្លៃបំផុត គឺមួយគីឡូក្រាមមានតម្លៃប្រមាណជា៦ម៉ឺនរៀល ប៉ុណ្ណោះ ប៉ុន្តែសម្រាប់សាច់គោជប៉ុនវិញមួយគីឡូក្រាមមានតម្លៃដល់ទៅ៦០០ដុល្លារឡើងឯណោះ ។
ប្រភពសាច់គោដែលថ្លៃជាងគេនោះ គឺប្រភេទសាច់គោ Kobe និង Wagyu ហើយ វាមានតម្លៃថ្លៃដោយសារវា គឺជាប្រភេទសាច់ដែលមានរសជាតិ គុណភាព ស្តង់ដារ បទដ្ឋានអន្តរជាតិ ព្រមទាំងការចំណាយពេលថែរក្សា និងផ្គត់ផ្គង់ចំណីមើលថែគោនោះយ៉ាងដិតដល់ ។ អ្នកទទួលទានលំដាប់ៗបានអះអាងថា គុណភាពដ៏ប្លែករបស់ពពួកសាច់គោទាំងនេះបានកំណត់ថា វាមានរសជាតិ និងលក្ខណៈពិសេសខុសពីសាច់គោផ្សេងទៀតដោយផ្តល់នូវភាពសម្បូរបែបដែលជាបទពិសោធន៍ដ៏កម្រមួយដែលមានតែមនុស្សមួយចំនួនដែលមានសិទ្ធិទទួលបាន ។
ខាងក្រោមនេះជាប្រភេទសាច់គោទាំង៥ប្រភេទដែលមានតម្លៃថ្លៃជាងគេនៅក្នុងពិភពលោក ។
១. សាច់អាំង Kobe A5+ Wagyu៖
សាច់អាំង Kobe A5+ Wagyu មានតម្លៃថ្លៃជាងគេបំផុតក្នុងពិភពលោក ដោយនៅក្នុង បរិមាណត្រឹម១គីឡូក្រាមវាមានតម្លៃដល់ទៅ ៦០០ដុល្លារ ឬថ្លៃជាងនេះ ។ សាច់គោ Kobe គឺជាសាច់គោមួយប្រភេទក្នុងចំណោមប្រភេទជាច្រើននៃសាច់គោ Wagyu របស់ជប៉ុន ។ សាច់គោប្រភេទនេះបានមកពីពូជគោខ្មៅជប៉ុនដែលគេដឹងថា ពូជគោ Tajima ដែលចិញ្ចឹមនៅក្នុងខេត្ត Hyogo នៅប្រទេសជប៉ុន ។
ច្បាប់សម្រាប់ការចិញ្ចឹមគោទាំងនេះ គឺតឹងរ៉ឹងណាស់ ដែលកំណត់ដោយសមាគម ផ្សព្វ ផ្សាយទីផ្សារ និងចែកចាយសាច់គោ Kobe ។ នៅក្នុងមួយឆ្នាំៗមានតែគោពី ២០០០ ទៅ៣០០០ ក្បាលប៉ុណ្ណោះដែលអាចទទួលបានការបញ្ជាក់ថា ជាប្រភេទសាច់គោ A5 Kobe ពិតប្រាកដ ។
២. Olive Wagyu Steak៖ សាច់គោ Olive Wagyu
ជាប់ចំណាត់ថ្នាក់ទី២ ជាសាច់គោថ្លៃបំផុតមួយនៅពីក្រោយសាច់ Kobe ដ៏ល្បីល្បាញ ដោយមានតម្លៃប្រមាណជា៤០០ដុល្លារក្នុងមួយគីឡូក្រាម ។ ជាទូទៅសាច់គោ Olive Wagyu គឺបានមកពីការចិញ្ចឹមគោនៅលើកោះ Shodoshima ក្នុងខេត្ត Kagawa នៃប្រទេសជប៉ុន។
៣. សាច់គោ Wagyu ជប៉ុន
ប្រភេទសាច់គោ Wagyu ក៏ជាសាច់គោរបស់ជប៉ុនដែរ ហើយត្រូវបានគេស្គាល់ថា មាន សភាពទន់ និងរស់ជាតិដ៏អស្ចារ្យមួយបែបដោយមួយគីឡូក្រាមវាមានតម្លៃប្រមាណជា ៣០០ដុល្លារ ។ សាច់ Wagyu ថ្នាក់ខ្ពស់ទាំងអស់មានទំនោរមានតម្លៃថ្លៃជាងសាច់ដទៃទៀតនៅទូទាំងពិភពលោក ។
ប្រទេសជប៉ុនមានលក្ខណៈពិសេសបំផុតដែលគេទទួលស្គាល់លើការ ចិញ្ចឹមគោយកសាច់ ជាមួយនឹងស្តង់ដារតឹងរ៉ឹង និងផ្តោតខ្លាំងលើការកសាងម៉ាកយីហោ ។ នេះបណ្តាលឱ្យសាច់ គោមិនធម្មតាដែលមានតម្លៃខ្ពស់នៅទូទាំងពិភពលោក ។
៤. សាច់គោ Wagyu អូស្ត្រាលី
សាច់គោ Wagyu របស់អូស្ត្រាលីមិនស្ថិតក្នុងកម្រិតដូច Wagyu ដ៏ល្បីល្បាញ របស់ជប៉ុន នោះទេ ប៉ុន្តែវានៅតែជាជម្រើសដ៏ល្អដោយមួយគីឡូក្រាមមានតម្លៃប្រមាណជា២០០ដុល្លារ ។ សាច់គោ Wagyu អូស្ត្រាលី មានដើមកំណើតពីសត្វគោ Wagyu របស់ ជប៉ុនដែលត្រូវ បាននាំចូលមកអូស្ត្រាលី ។ សព្វថ្ងៃសាច់គោប្រភេទនេះមានពីរប្រភេទនៃពោល គឺពូជសុទ្ធ និងកូនកាត់ ។
៥. សាច់គោ Wagyu អាមេរិក
សាច់គោ Wagyu អាមេរិក គឺជាពូជកូនកាត់នៃពូជ Kuroge Washu ពោល គឺ គោ ជប៉ុនខ្មៅ និងពូជ Angus ដោយមួយគីឡូមានតម្លៃ១៥០ដុល្លារ ។ កុំច្រឡំ Wagyu អាមេរិកជាមួយ Wagyu ជប៉ុន ដោយប្រភេទសាច់ គឺមានគុណភាពខុសគ្នាយ៉ាងខ្លាំង ។ Wagyu របស់អាមេរិកមានពណ៌ផ្សេងគ្នា និងភាពទន់តិចជាង Wagyu លំដាប់ កំពូលរបស់ជប៉ុន ។ ទោះបីជាមានភាពខុសគ្នាទាំងនេះក៏ដោយ ក៏វានៅតែត្រូវបានចាត់ទុកថា ជាជម្រើសសាច់គោដ៏ប្រណិត និងមានតម្លៃថ្លៃមួយដែរ ៕
ចែករំលែកព័តមាននេះ