ចៅសង្កាត់កំពង់ស្វាយ ចុះប្រមូលសំរាមស្ទះមាត់លូ និងអំពាវនាវឱ្យពលរដ្ឋទុកដាក់សំរាមឱ្យបានត្រឹមត្រូវ
- បន្ទាយមានជ័យ
ខេត្តបន្ទាយមានជ័យ ៖ ចៅសង្កាត់កំពង់ស្វាយ និងមន្ត្រីចុះប្រមូលសំរាមចេញពីមាត់លូដែលកកស្ទះនៅពេលមានភ្លៀង និងអំពាវនាវដល់ប្រជាពលរដ្ឋចូលរួមទុកដាក់សំរាមអោយបានល្អ ។
ការចុះប្រមូលចេញពីមុខលូ បានធ្វើឡើងកាលពីថ្ងៃទី១៥ ខែកញ្ញា ឆ្នាំ២០២៦ នៅក្រុងសិរីសោភ័ណ។
លោក ស៊ឺ ហៀក ចៅសង្កាត់កំពង់ស្វាយ បានឱ្យដឹងថា នៅពេលមានភ្លៀងរយៈពេលប៉ុន្មានថ្ងៃនេះ គេសង្កេតឃើញតាមមាត់លូមានសំរាមបានស្ទះ ទឹកហូរមិនទាន់ បណ្តាលឱ្យមានការជន់លិចតាមផ្លូវ ហើយរូបលោក និងមន្ត្រីក្រុមប្រឹក្សាសង្កាត់បានចុះទៅកាយ និងប្រមូលសំរាមចេញ ដើម្បីអោយទឹកហូរលឿន កុំអោយមានទឹកដក់តាមផ្លូវ បណ្តាលឱ្យរងការខូចខាត ។
លោកបានអំពាវនាវដល់ប្រជាពលរដ្ឋត្រូវចូលរួមទុកដាក់សំរាមអោយបានល្អ កុំចោលពាសវាលពាសកាល នៅពេលមានភ្លៀង បើយើងមិនទុកដាក់អោយបានល្អទេ អាចហូរតាមទឹកទៅស្ទះមាត់លូ បង្កឱ្យមានទឹកដក់តាមជង្ហុកពេលរថយន្តឆ្លងកាត់បណ្តាលខូចផ្លូវ និងលិចប៉ះពាល់ដល់ប្រជាពលរដ្ឋក្នុងមូលដ្ឋាន។
ប្រជាពលរដ្ឋបានកោតសសើរចំពោះចៅសង្កាត់កំពង់ស្វាយ លោក ស៊ឺ ហៀក ដែលបានដឹកនាំមន្ត្រីដើរប្រមូលសំរាមចេញពីមាត់លូដែលស្ទះ ពេលខ្លៈលោកចុះធ្វើទាំងកំពុងភ្លៀងធ្លាក់ទទឹកខ្លួនជោក ។ លោកគឺជាចៅសង្កាត់គំរូដែលធ្វើការងារបម្រើប្រជាពលរដ្ឋដោយមិនបានគិតពីការនឿយហត់ ៕
ចែករំលែកព័តមាននេះ