លៀស២១តោនដែលឈ្មួញបម្រុងនាំចេញទៅក្រៅប្រទេស ត្រូវអាវុធហត្ថបង្ក្រាបបានប្រគល់ទៅឲ្យមន្ត្រីជំនាញជលផល
- ព្រៃវែង
ខេត្តព្រៃវែង៖ កម្លាំងកងរាជអាវុធហត្ថស្រុកបាភ្នំ បានចាប់ឃាត់រថយន្តយីឌុបដ៏ធំមួយគ្រឿងដែលឈ្មួញកំពុងដើរប្រមូលទិញលៀសពីប្រជាពលរដ្ឋនៅក្នុងតំបន់បឹងខ្សាច់ស ដើម្បីដឹកចេញទៅក្រៅប្រទេស ។ ការបង្ក្រាបនេះ បានធ្វើឡើងកាលពីវេលាម៉ោង១០ និង៣០នាទីយប់ថ្ងៃទី១២ កញ្ញា នៅចំណុចមាត់បឹងខ្សាច់ស ស្ថិតក្នុងឃុំរក្សជ័យ ស្រុកបាភ្នំ ខេត្តព្រៃវែង ។
មន្ត្រីអាវុធហត្ថស្រុកបាភ្នំបានឲ្យដឹងថា នៅក្នុងរដូវបិទនេសាទនេះ ការនេសាទគ្រប់រូបភាពត្រូវបានហាមឃាត់ដោយច្បាប់ ប៉ុន្តែនៅចំណុចបឹងខ្សាច់ស ក្នុងឃុំរក្សជ័យ បែរជាមានឈ្មួញដើរបំផុសបំផុលឲ្យប្រជាពលរដ្ឋ នាំគ្នាអូសប្រមូលយកលៀសមកលក់ ហើយឈ្មួញនៅចាំទទួលទិញនាំចេញទៅប្រទេសវៀតណាមជារៀងរាល់ថ្ងៃ ។
ប្រភពដដែលនេះបានបន្តថា ដើម្បីការពារធនធានធម្មជាតិឲ្យនៅគង់វង្ស នៅវេលាម៉ោង១០និង៣០នាទីយប់ថ្ងៃទី១២ កញ្ញា កម្លាំងអាវុធហត្ថស្រុកបាភ្នំ សហការជាមួយកម្លាំងអាវុធហត្ថខេត្ត បានចុះទៅបង្ក្រាបក្រុមឈ្មួញ ដែលកំពុងប្រមូលទិញលៀសពីប្រជាពលរដ្ឋ នៅចំណុចមាត់បឹងខ្សាច់ស ដោយចាប់ឃាត់រថយន្តយីឌុបរបស់ឈ្មួញបានមួយគ្រឿង ដែលមានផ្ទុកលៀសនៅលើរថយន្តចំនួន២១តោន ហើយបាននាំយកទៅកាន់បញ្ជាការដ្ឋាន កងរាជអាវុធហត្ថខេត្តព្រៃវែង ដើម្បីចាត់ការបន្ត ។
ដោយឡែក មន្ត្រីជំនាញជលផលខេត្តព្រៃវែងបានអោយដឹងថា ក្រោយពីចាប់រថយន្តដឹកលៀសរបស់ឈ្មួញបានហើយ កម្លាំងអាវុធហត្ថខេត្តព្រៃវែង បានប្រគល់ទាំងរថយន្ត និងលៀសទាំងអស់ ឲ្យមកមន្ត្រីជំនាញជលផលខេត្តព្រៃវែង ហើយនៅព្រឹកថ្ងៃទី១៣ កញ្ញា មន្ត្រីជំនាញជលផលក៏បានយកលៀសទាំងអស់ ទៅចាក់ព្រលែងចូលបឹងធម្មជាតិវិញ នៅចំណុចទួលអស់លោក ក្នុងក្រុងព្រៃវែង ចំនួន១០តោន និងចាក់លែងនៅចំណុចបឹងស្នេហ៍ ក្នុងស្រុកបាភ្នំចំនួន១១តោន ចំណែករថយន្តដឹកលៀស ត្រូវបានមន្ត្រីជំនាញជលផលរក្សាទុក ដើម្បីចាត់ការបន្តទៅតាមនីតិវិធី ។
ចែករំលែកព័តមាននេះ