ខេត្តក្រចេះ ៖ មន្ត្រីនៃមន្ទីរសុខាភិបាលបញ្ជាក់ប្រាប់ទៅ ប្រជាពលរដ្ឋកំពុងរស់នៅតំបន់ដាច់ស្រយាលដែលងាយនឹងរងគ្រោះដោយជម្ងឺគ្រុនចាញ់ថា ទិវាប្រយុទ្ធប្រឆាំងនិងជម្ងឺគ្រុនចាញ់ រៀបចំឡើងក្នុងគោលបំណងដើម្បីផ្សព្វផ្សាយពីវិធានការការពារជម្ងឺ និងជួយទប់ស្កាត់លុបបំបាត់ការចម្លង ។
ប្រធានមន្ទីរសុខាភិបាលលោក ឈ្នាង សុវត្ថា បានថ្លែងឲ្យដឹងទៀតថា ការប្រារព្ឋទិវាជម្ងឺ គ្រុមចាញ់នេះ គឺក្នុងគោលដៅលើកកម្ពស់សុខមាលភាពសង្គមនិងសំដៅរួមចំណែកដល់ ការថែរក្សាសុខភាពជូនដល់ប្រជាពលរដ្ឋទូទៅ ជាពិសេសប្រជាពលរដ្ឋដែលកំពុងតែរស់នៅ តំបន់ជនបទងាយនឹងរងគ្រោះ និងប្រជាពលរដ្ឋដែលប្រកបរបបរកស៊ីធ្វើស្រែចំការក្នុងព្រៃ។
ស្រុកសំបូរ ជាស្រុកមួយដែលមានអត្រាអ្នកកើតជម្ងឺគ្រុនចាញ់ច្រើនជាងគេក៏ព្រោះតែ ភូមិសាស្ត្រនៅតំបន់ស្រុកមួយនេះសម្បូរទៅដោយព្រៃ។ មួយវិញទៀត ប្រជាពលរដ្ឋមិនមានការយល់ដឹងច្រើន ពីវិធីបង្ការទប់ស្កាត់ និងនៅតែជឿទៅលើជំនឿអរូបិយព្យាបាលតាមវិធីបន់ស្រន់ ដោយមិនព្យាបាលតាមរយៈគ្រូពេទ្យ បណ្តែតបណ្តោយអ្នកជម្ងឺធ្លាក់ក្នុងសភាពធ្ងន់ធ្ងរ ទើបមានខ្លះអាចប្រឈមដល់អាយុជីវិត។
អាជ្ញាធរខេត្តក្រចេះ បានកំណត់យកស្រុកសំបូរមួយនេះជាស្រុកគោលដៅនិងរួមគ្នា ប្រារព្ឋទិវាប្រយុទ្ឋប្រឆាំងជម្ងឺគ្រុមចាញ់ ដែលបានធ្វើឡើងនៅ ថ្ងៃទី ២៥ មេសា ក្នុងឃុំអូរគ្រៀង ស្រុកសំបូរ ជាមួយនិងពលរដ្ឋចូលរួមជិត៤រយនាក់។ជាមួយគ្នានោះអាជ្ញាធរក៏បានចែកជូននូវ មុងជ្រលក់ថ្នាំមានប្រសិទ្ធភាពជូនដល់ពលរដ្ឋចំនួន១៦ម៉ឺនមុងនិងមុងអង្រឹងចំនួន៦០ម៉ឺនអង្រឹងផងដែរ។
បើតាមការឲ្យដឹងពីប្រធានមន្ទីរសុខាភិបាលគឺលោក ឈ្នាង សុវុត្ថា បានបង្ហាញតួលេខ ថា រយៈពេល៣ខែដើមឆ្នាំ២០១៨ករណីជម្ងឺគ្រុនចាញ់មានការថយចុះពី១៩៧០ករណីមកត្រឹម៣៨០ករណីនៅត្រីមាសទី១ឆ្នាំ២០១៩ ។
លោកលើកឡើងថា ការធ្លាក់ចុះនូវតួលេខនេះបានមកពីការយល់ដឹងពីការបង្ការទប់ ស្កាត់នូវប្រភេទជម្ងឺឆ្លងមួយនេះរបស់ប្រជាពលរដ្ឋដែលរស់នៅប្រចាំថ្ងៃ។
លោកបានអំពាវនាវឲ្យប្រជាពលរដ្ឋរស់នៅប្រកបដោយអនាម័យត្រូវមានបរិស្ថានល្អ រស់នៅស្អាត ហូបស្អាត។ និងការប្រើប្រាស់មុងជ្រលក់ថ្នាំ និងសម្រាកក្នុងមុងជាប្រចាំ។
លោកប្រធានមន្ទីរ បានណែនាំឲ្យពលរដ្ឋដែលប្រឈមនឹងសញ្ញាមិនស្រួលខ្លួនណាមួយត្រូវទៅពិគ្រោះជម្ងឺជាមួយអ្នកស្មគ្រ័ចិត្ត ដែលមានជំនាញត្រឹមត្រូវ ឬទៅមណ្ឌលសុខភាពដែលជិតបំផុត ៕
ចែករំលែកព័តមាននេះ