លោក ម៉ាក ហ្សុកឃឺបឺក នាយកប្រតិបត្តិហ្វេសប៊ុក កំពុងស្ថិតនៅក្រោមការពិនិត្យពិច័យលើតួនាទីរបស់ក្រុមហ៊ុនប្រព័ន្ធផ្សព្វផ្សាយសង្គមក្នុងការផ្សព្វផ្សាយព័ត៌មានមិនត្រឹមត្រូវ និងការពិនិត្យមិនគ្រប់គ្រាន់លើមាតិកា។ ពេលនេះលោកក៏អំពាវនាវអោយនិយ័តករដើរតួយ៉ាងសកម្មក្នុងការបង្កើតច្បាប់សម្រាប់អ៊ីនធឺណិត។ លោក ហ្សុកឃឺបឺក បានអំពាវនាវឱ្យមានបទបញ្ជាតឹងតែងបន្ថែមលើ…
លោក ម៉ាក ហ្សុកឃឺបឺក នាយកប្រតិបត្តិហ្វេសប៊ុក កំពុងស្ថិតនៅក្រោមការពិនិត្យពិច័យលើតួនាទីរបស់ក្រុមហ៊ុនប្រព័ន្ធផ្សព្វផ្សាយសង្គមក្នុងការផ្សព្វផ្សាយព័ត៌មានមិនត្រឹមត្រូវ និងការពិនិត្យមិនគ្រប់គ្រាន់លើមាតិកា។ ពេលនេះលោកក៏អំពាវនាវអោយនិយ័តករដើរតួយ៉ាងសកម្មក្នុងការបង្កើតច្បាប់សម្រាប់អ៊ីនធឺណិត។
លោក ហ្សុកឃឺបឺក បានអំពាវនាវឱ្យមានបទបញ្ជាតឹងតែងបន្ថែមលើ «មាតិកាដែលមានគ្រោះថ្នាក់ ភាពត្រឹមត្រូវនៃការបោះឆ្នោត ភាពឯកជន និងទិន្នន័យដែលអាចយកទៅប្រើប្រាស់បាន»។ លោកសរសេរអត្ថបទនេះនៅថ្ងៃសៅរ៍ នៅវ៉ាស៊ីនតោនប៉ុស្តិ៍ ហើយបានផ្សព្វផ្សាយនៅលើគណនីហ្វេសប៊ុកផ្លូវការរបស់គាត់។
លោកបានសរសេរថា «ខ្ញុំជឿជាក់ថាយើងត្រូវការតួនាទីសកម្មជាងមុនសម្រាប់រដ្ឋាភិបាល និងនិយ័តករ។ ដោយការធ្វើបច្ចុប្បន្នភាពច្បាប់សម្រាប់អ៊ីនធឺណេត យើងអាចរក្សាអ្វីដែលល្អបំផុតអំពីអ៊ីនធឺណេត នោះគឺសេរីភាពរបស់មនុស្សដើម្បីបង្ហាញពីខ្លួនឯង និងសម្រាប់សហគ្រិនក្នុងការបង្កើតអ្វីថ្មីៗ ហើយរួមទាំងការពារសង្គមពីគ្រោះថ្នាក់ធំៗផងដែរ»។
អត្ថបទដែលលោក ហ្សុកឃឺបឺក សរសេរគឺជាអត្ថបទមួយដ៏ទូលំទូលាយជាងអ្វីដែលលោកធ្លាប់សរសេរលើបញ្ហាបទបញ្ជារបស់រដ្ឋាភិបាល។ ការអំពាវនាវរបស់គាត់បានធ្វើឡើងនៅពេលដែលគេរាយការណ៍ថា ព្រះរាជអាជ្ញាសហព័ន្ធសហរដ្ឋអាមេរិកកំពុងស៊ើបអង្កេតលើកិច្ចព្រមព្រៀងចែករំលែកទិន្នន័យរបស់ហ្វេសប៊ុកជាមួយក្រុមហ៊ុនបច្ចេកវិទ្យាធំៗមួយចំនួន។ ព័ត៌មានបានអោយដឹងថា គណៈកម្មការពាណិជ្ជកម្មសហព័ន្ធសហរដ្ឋអាមេរិច កំពុងចរចាជាមួយហ្វេសប៊ុកជុំវិញការធ្វើការពិន័យជាប្រាក់។ រីឯមន្ដ្រីអឺរ៉ុបកំពុងបន្តធ្វើការពិនិត្យពិច័យលើក្រុមហ៊ុនហ្វេសប៊ុក។
ហ្វេសប៊ុក ត្រូវបានគេថ្កោលទោសយ៉ាងខ្លាំងនៅក្នុងខែនេះ នៅពេលដែលហ្វេសប៊ុកទទួលបរាជ័យក្នុងការបញ្ឈប់ការផ្សាយបន្តផ្ទាល់ដោយជនសង្ស័យនៅក្នុងការវាយប្រហារភេរវកម្មនូវែលសេឡង់ ដែលបានសម្លាប់មនុស្ស៥០នាក់។ ប្រព័ន្ធផ្សព្វផ្សាយសង្គមមួយនេះ ក៏បានប្រឈមនឹងរឿងអាស្រូវជាច្រើន ដែលរាប់បញ្ចូលទាំងការនិយាយរើសអើងដោយការស្អប់ ដល់រឿងបញ្ហាភាពឯកជន ហើយនឹងការរិះគន់លើការផ្សាយព័ត៌មានក្លែងក្លាយ ជាពិសេសនៅក្នុងពេលបោះឆ្នោតថ្នាក់ជាតិ។
លោក ហ្សុកឃឺបឺក ក៏បានសរសេរបន្ថែមថា «ជារៀងរាល់ថ្ងៃ យើងធ្វើការសំរេចចិត្តលើពាក្យសម្ដីអ្វីដែលនាំភាពអន្តរាយ អ្វីដែលជាការផ្សាយពាណិជ្ជកម្មនយោបាយ ហើយនិងវិធីបង្ការកុំឱ្យមានការវាយប្រហារដ៏ស្មុគស្មាញលើអ៊ីនធឺណេត។ ទាំងនេះគឺសំខាន់ក្នុងការរក្សាអោយសហគមន៍យើងមានសុវត្ថិភាព។ ប៉ុន្តែប្រសិនបើយើងចាប់ផ្តើមតាំងពីដំបូងមក យើងនឹងមិនស្នើសុំឱ្យក្រុមហ៊ុនធ្វើការវិនិច្ឆ័យតែម្នាក់ឯងនោះទេ»។
នាយកប្រតិបត្តិហ្វេសប៊ុករូបនេះបានអំពាវនាវអោយនិយ័តករចាត់អោយក្រុមហ៊ុនអ៊ិនធឺណេតនានាអោយ «មានការទទួលខុសត្រូវចំពោះការអនុវត្តស្តង់ដាលើមាតិកាដែលបង្កគ្រោះថ្នាក់»។ នេះជាគំនិតមួយដែលបានក្លាយជាចំណុចនៃជម្លោះនៅក្នុងសហរដ្ឋអាមេរិក និងបណ្តាប្រទេសដទៃទៀត ដែលកន្លងមកប្រព័ន្ធផ្សព្វផ្សាយសង្គមបានរួចផុតពីការដាក់ទោសតាមច្បាប់ចំពោះបញ្ហាបែបនេះ។ គាត់ក៏បានលើកឡើងអំពីកិច្ចខិតខំប្រឹងប្រែងរបស់ហ្វេសប៊ុកដើម្បីល្បាតមាតិកានយោបាយ ដែលភាគច្រើនត្រូវបានធ្វើបន្ទាប់ពីហ្វេសប៊ុកត្រូវបានផ្សាភ្ជាប់ជាមួយនឹងការរីករាលដាលនៃព័ត៌មានមិនពិតមុនការបោះឆ្នោតប្រធានាធិបតីអាមេរិកឆ្នាំ២០១៦។
លោក ហ្សុកឃឺបឺក បានមានប្រសាសន៍ថា «ប្រព័ន្ធរបស់យើងនឹងកាន់តែមានប្រសិទ្ធភាព ប្រសិនបើបទប្បញ្ញត្តិបង្កើតស្តង់ដារួមសម្រាប់ការផ្ទៀងផ្ទាត់អ្នកនយោបាយ»។ ជាងនេះទៅទៀត គាត់ក៏បានអំពាវនាវអោយមាន«ក្របខ័ណ្ឌសកល» សម្រាប់បទបញ្ជាទាក់ទងនឹងទិន្នន័យឯកជន ដែលមានមូលដ្ឋានលើបទបញ្ជានៃការការពារទិន្នន័យទូទៅរបស់សហភាពអឺរ៉ុប។ ច្បាប់នោះដែលបានចូលជាធរមានកាលពីខែឧសភាឆ្នាំមុន ដែលគំរាមកំហែងផាកពិន័យចំពោះក្រុមហ៊ុនអ៊ីនធឺណេតដែលបានចែករំលែកទិន្នន័យមិនត្រឹមត្រូវរបស់អ្នកប្រើប្រាស់។
ការគាំទ្ររបស់លោកចំពោះបទបញ្ជានោះមានរយៈពេលមួយឆ្នាំ បន្ទាប់ពីព័ត៌មានលម្អិតអំពីក្រុមហ៊ុន Cambridge Analytica ដែលជាក្រុមហ៊ុនបិទទ្វារហើយនោះ ត្រូវបានចោទប្រកាន់ថា បានព្យាយាមជះឥទ្ធិពលដល់អ្នកបោះឆ្នោតអាមេរិកដោយប្រើប្រាស់ព័ត៌មានដែលប្រមូលពីអ្នកប្រើហ្វេសប៊ុកចំនួន៥០លាននាក់។
នាយកប្រតិបត្តិរូបនេះបាននិយាយថា ទិន្នន័យចល័តគួរតែត្រូវបានធានា ដែលក្នុងនោះគាត់បានពិពណ៌នាទិន្នន័យចល័តថា ជាសមត្ថភាពរបស់អ្នកប្រើប្រាស់ក្នុងការផ្ទេរទិន្នន័យរបស់ពួកគេរវាងប្រព័ន្ធផ្សព្វផ្សាយសង្គមនានា និងសេវាកម្មផ្សេងទៀត។ លោកបាននិយាយថា «ទិន្នន័យចល័តពិតប្រាកដគួរមានលក្ខណៈដូចជារបៀបដែលមនុស្សប្រើប្រាស់ប្រព័ន្ធផ្សព្វផ្សាយសង្គមរបស់យើង ដើម្បីចូលក្នុងកម្មវិធីមួយជាជាងវិធីចាស់ដែលអ្នកអាចទាញយកព័ត៌មានរបស់អ្នក។ ប៉ុន្តែនេះតម្រូវឱ្យមានច្បាប់ច្បាស់លាស់អំពីអ្នកដែលទទួលខុសត្រូវចំពោះការការពារព័ត៌មាននៅពេលវាផ្លាស់ប្តូររវាងសេវាកម្ម»។
នេះគឺជាអត្ថបទទី២ហើយ ដែលបានមកពីអ្នកគ្រប់គ្រងហ្វេសប៊ុកនៅចុងសប្តាហ៍នេះ។ លោកស្រី សឺរៀល សេនបឺក បានសរសេរនៅក្នុងកាសែត New Zealand Herald ថា ក្រុមហ៊ុនត្រូវតែមានភាពប្រសើរឡើងក្នុងការត្រួតពិនិត្យប្រព័ន្ធផ្សព្វផ្សាយសង្គមរបស់ខ្លួន។
សេនបឺក បាននិយាយថា ក្រុមហ៊ុនកំពុងពិចារណាដាក់កម្រិតថា តើនរណាអាចចាក់វីដេអូផ្សាយបន្តផ្ទាល់នៅលើហ្វេសប៊ុក បន្ទាប់ពីជនសង្ស័យនៅក្នុងការវាយប្រហារនៅនូវែលសេឡង់ បានផ្សាយបន្តផ្ទាល់នូវការសម្លាប់រង្គាលតាមហ្វេសប៊ុក។
ចែករំលែកព័តមាននេះ