ទីក្រុងម៉ូស្គូ៖ ប្រទេសរុស្ស៊ីចាប់ផ្ដើមបញ្ចេញប្រតិកម្មតបជាបណ្ដើរៗទៅលោកត្រាំដែលបញ្ជាឱ្យក្រសួងការពារជាតិធ្វើតេស្តអាវុធនុយក្លេអ៊ែរឡើងវិញបន្ទាប់ពីខកខានធ្វើតេស្តរយៈពេល៣៣ឆ្នាំមកហើយ។ វិមានក្រឹមឡាំងបញ្ចេញប្រតិកម្មចំពោះបញ្ហានេះដោយប្រយ័ត្នប្រយែង។ ក្រឹមឡាំងថារដ្ឋាភិបាលរបស់ខ្លួនពិតជាមិននៅស្ងៀមទេ។ បើសិនអាមេរិកធ្វើតេស្តនុយក្លេអ៊ែរ រុស្ស៊ីនឹងធ្វើតេស្តនុយក្លេអ៊ែរដែរ។
ការថ្លែងដូច្នេះបន្ទាប់ពីលោកត្រាំប្រកាសតាមបណ្ដាញសង្គមថាលោកបញ្ជាឱ្យធ្វើតេស្តនុយក្លេអ៊ែរជាប្រញាប់ដើម្បីរត់ឱ្យទាន់សភាពការណ៍វិវត្តនាពេលបច្ចុប្បន្ន។ លោកអះអាងថាសព្វថ្ងៃនេះអាមេរិកមានអាវុធនុយក្លេអ៊ែរស្តុកទុកនៅក្នុងឃ្លាំងច្រើនលំដាប់ទី១, រុស្ស៊ីឈរនៅលំដាប់ទី២ និងចិនឈរនៅលំដាប់ទី៣។ លោកយល់ថាប្រទេសចិនមិនយូរទេនឹងមានអាវុធនុយក្លេអ៊ែរស្មើនឹងអាមេរិក និងរុស្ស៊ីនៅក្នុងរង្វង់៤ ឬ៥ឆ្នាំទៀត។
លោកត្រាំសរសេររៀបរាប់បន្តទៀតថាដោយសារប្រទេសមហាអំណាចនុយក្លេអ៊ែរដទៃទៀតមានផែនការធ្វើតេស្តនុយក្លេអ៊ែរ ដូច្នេះ អាមេរិកគ្រាន់តែចង់ធ្វើឱ្យប្រាកដថាកម្មវិធីនុយក្លេអ៊ែររបស់ខ្លួននៅតែប្រឡងប្រជែងជាមួយគេបាន។ អ្នកនាំពាក្យវិមានក្រឹមឡាំង លោកប៉េស្កូស កត់សម្គាល់ថាពាក្យសម្ដីរបស់លោកត្រាំត្រង់ចំណុចដែលថា «ប្រទេសដទៃកំពុងធ្វើតេស្តនុយក្លេអ៊ែរ»។ រហូតមកដល់ពេលនេះ លោក (ប៉េស្កូស) មិនទាន់ឃើញប្រទេសណាធ្វើតេស្តអាវុធនេះនៅឡើយទេ។
លោកប៉េស្កូសថ្លែងបន្តទៀតថារុស្ស៊ីមិនទាន់ទទួលបានការជូនដំណឹងពីអាមេរិកអំពីការផ្លាស់ប្ដូរគោលជំហររបស់ខ្លួននៅក្នុងការធ្វើតេស្តនុយក្លេអ៊ែរនៅឡើយទេ។ នៅពេលអ្នកសារព័ត៌មានសួរថាតើរុស្ស៊ីគិតថាការរត់ប្រណាំងខាងអាវុធនុយក្លេអ៊ែរអាចនឹងកើតមានជាថ្មីទេដោយសារការបញ្ចេញសារនយោបាយរបស់លោកត្រាំ? លោកប៉េស្កូសឆ្លើយតបថាមិនប្រាកដជាយ៉ាងដូច្នេះទេ។
លោកសូមបញ្ជាក់ថារុស្ស៊ីធ្វើតេស្តមីស៊ីលម៉ាកបុរេវេស្នីក (Burevestnik) កាលពីថ្ងៃទី២១ ខែតុលា និងក្រោយមកទៀតធ្វើតេស្តមីស៊ីលដែលដំណើរការដោយថាមពលនុយក្លេអ៊ែរម៉ាកផូសេដូន (Poseidon) កាលពីថ្ងៃទី២៨ ខែតុលានោះមែនទែនទៅមិនមែនជាការធ្វើតេស្តអាវុធនុយក្លេអ៊ែរទេ។ កាលពីពេលកន្លងមក លោកពូទីនដែលអះអាងថារុស្ស៊ីមានអាវុធនុយក្លេអ៊ែរស្តុកទុកនៅក្នុងឃ្លាំងច្រើនជាងគេនោះ លោកព្រមានថាបើប្រទេសដទៃធ្វើតេស្តនុយក្លេអ៊ែរ រុស្ស៊ីនឹងធ្វើតេស្តអាវុធនេះដែរ។
លោកប៉េស្កូសចង់រំលេចឱ្យឃើញពាក្យសម្ដីរបស់លោកពូទីនត្រង់ចំណុចនេះថាលុះត្រាតែប្រទេសដទៃធ្វើតេស្តនុយក្លេអ៊ែរជាមុនសិនទើបរុស្ស៊ីធ្វើតេស្តជាក្រោយ។ ចាប់តាំងពីការដួលរលំសហភាពសូវៀតមក ប្រទេសរុស្ស៊ីពុំដែលធ្វើតេស្តនុយក្លេអ៊ែរទេ។ សហភាពសូវៀតធ្វើតេស្តអាវុធនេះលើកចុងក្រោយកាលពីឆ្នាំ១៩៩០, អាមេរិកធ្វើតេស្តចុងក្រោយឆ្នាំ១៩៩២ និងប្រទេសចិនធ្វើតេស្តចុងក្រោយឆ្នាំ១៩៩៦។ ប្រទេសទាំងបីស្ថិតនៅក្នុងចំណោមនមហាអំណាចទាំង៥នៅក្នុងក្រុមប្រឹក្សាសន្តិសុខអង្គការសហប្រជាជាតិដែលមានសិទ្ធិផលិត រក្សាទុក ធ្វើតេស្ត និងប្រើប្រាស់អាវុធនុយក្លេអ៊ែរដោយស្របច្បាប់។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ