រាជធានីភ្នំពេញ ៖ សួនច្បារផ្សារចាស់ផ្នែកខាងកើតក្រោយផ្សាររាត្រីផ្លូវលេខ១៣ ស្ថិតក្នុងសង្កាត់វត្តភ្នំ ខណ្ឌដូនពេញ ត្រូវបានឈ្មួញយកធ្វើកន្លែងផ្ញើម៉ូតូ និងរថយន្ត២៤ម៉ោងយ៉ាងរំភើយ មិនរំខានដល់អាជ្ញាធរខណ្ឌដូនពេញនោះទេ ។ បញ្ហានេះត្រូវប្រជាពលរដ្ឋនាំគ្នារិះគន់ ហើយសុំឱ្យសាលារាជធានីភ្នំពេញក្នុងអាណត្តិទី៥នេះពិនិត្យមើលផង។
រាជធានីភ្នំពេញ ៖ សួនច្បារផ្សារចាស់ផ្នែកខាងកើតក្រោយផ្សាររាត្រីផ្លូវលេខ១៣ ស្ថិតក្នុងសង្កាត់វត្តភ្នំ ខណ្ឌដូនពេញ ត្រូវបានឈ្មួញយកធ្វើកន្លែងផ្ញើម៉ូតូ និងរថយន្ត២៤ម៉ោងយ៉ាងរំភើយ មិនរំខានដល់អាជ្ញាធរខណ្ឌដូនពេញនោះទេ ។ បញ្ហានេះត្រូវប្រជាពលរដ្ឋនាំគ្នារិះគន់ ហើយសុំឱ្យសាលារាជធានីភ្នំពេញក្នុងអាណត្តិទី៥នេះពិនិត្យមើលផង។
ប្រជាពលរដ្ឋដែលមានលំនៅឋានជាប់នឹងផ្សារចាស់បាននាំគ្នានិយាយថា សួនច្បារផ្សារចាស់ត្រូវបានសាលារាជធានីភ្នំពេញចំណាយថវិការបស់រដ្ឋអស់ជាច្រើនដើម្បីកែលំអឱ្យមានសោភ័ណភាព និងទុកសម្រាប់ប្រជាពលរដ្ឋហាត់ប្រាណ តែឥឡូវនេះត្រូវឈ្មួញយកផ្នែកខាងកើតលើសួនច្បារផ្សារចាស់ក្រោយផ្សាររាត្រីធ្វើជាកន្លែងផ្ញើម៉ូតូ និងរថយន្ត២៤ម៉ោងយ៉ាងអនាធិបតេយ្យ។ ប្រជាពលរដ្ឋសួរថា តើសាលាខណ្ឌដូនពេញជាអ្នកអនុញ្ញាតឱ្យឈ្មួញយកសួនច្បារធ្វើកន្លែងផ្ញើម៉ូតូ និងរថយន្តឬ?
ទាក់ទិននឹងបញ្ហានេះ មន្ត្រីជំនាញសាលាខណ្ឌដូនពេញបានឱ្យដឹងថា សាលាខណ្ឌដូនពេញមិនមានសិទ្ធិណាមួយហ៊ានអារកាត់យកចិញ្ចើមសួនច្បារផ្សារចាស់ផ្នែកខាងកើតក្រោយផ្សាររាត្រីទៅឱ្យឈ្មួញធ្វើកន្លែងផ្ញើម៉ូតូ និងរថយន្តនោះទេ វាជាសិទ្ធិរបស់សាលារាជធានីភ្នំពេញកាលសម័យលោកកែប ជុតិមា ជាអភិបាល។ មន្ត្រីដដែលក៏បានរិះគន់ផងដែរថា វាពិតជាមិនសមទាល់តែសោះដែលគេអនុញ្ញាតឱ្យឈ្មួញធ្វើបែបនេះ ការអភិវឌ្ឍសួនច្បារគឺដើម្បីឱ្យប្រជាពលរដ្ឋក៏ដូចជាភ្ញៀវបរទេសដើរកម្សាន្ត និងទុកជាកន្លែងហាត់ប្រាណដើម្បីសុខភាព ដូច្នេះសាលារាជធានីភ្នំពេញគួរតែឱ្យមន្ទីរជំនាញពិនិត្យឯកសារឡើងវិញកុំឱ្យមានវប្បធម៌យកចិញ្ចើមសួនច្បារកណ្តាលក្រុងទៅធ្វើអាជីវកម្មបែបនេះ។
ជុំវិញបញ្ហានេះ កោះសន្តិភាពនៅមិនទាន់អាចទាក់ទងដើម្បីសុំការបំភ្លឺពីលោកអភិបាលខណ្ឌដូនពេញបាននៅឡើយទេ ដោយសារទូរស័ព្ទរបស់លោកមិនអាចទាក់ទងបាន៕
ចែករំលែកព័តមាននេះ