រាជធានីភ្នំពេញ ៖ តារាចម្រៀងអ្នកនាង ឱក សុគន្ធកញ្ញា ត្រូវបានប្រកាសឲ្យក្លាយជាទូតសុចន្ឆន្ទៈនៃកាយរីទ្ធិជាតិកម្ពុជា ដើម្បីចូលរួមផ្សព្វផ្សាយពីសកម្មភាពកាយរឹទិ្ធជាតិកម្ពុជា សំដៅលើកកម្ពស់ការអប់រំដល់យុវជនជំនាន់ក្រោយចូលរួមអភិវឌ្ឍសេដ្ឋកិច្ចសង្គមជាតិ ។ ពិធីបំពាក់កន្សែង…
រាជធានីភ្នំពេញ ៖ តារាចម្រៀងអ្នកនាង ឱក សុគន្ធកញ្ញា ត្រូវបានប្រកាសឲ្យក្លាយជាទូតសុចន្ឆន្ទៈនៃកាយរីទ្ធិជាតិកម្ពុជា ដើម្បីចូលរួមផ្សព្វផ្សាយពីសកម្មភាពកាយរឹទិ្ធជាតិកម្ពុជា សំដៅលើកកម្ពស់ការអប់រំដល់យុវជនជំនាន់ក្រោយចូលរួមអភិវឌ្ឍសេដ្ឋកិច្ចសង្គមជាតិ ។
ពិធីបំពាក់កន្សែង និងប្រកាសជាទូតសុច្ឆន្ទៈនៃកាយរឹទិ្ធជាតិកម្ពុជារបស់តារាចម្រៀងអ្នកនាងឱក សុគន្ធកញ្ញា បានធ្វើឡើងនាព្រឹកថ្ងៃទី១៩ ខែឧសភា ឆ្នាំ២០២៥ នៅទីស្តីការក្រសួង ក្រោមវត្តមានឯកឧត្ដមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានកាយរឹទិ្ធជាតិកម្ពុជា ។
ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានស្វាគមន៍យ៉ាងកក់ក្តៅដល់លោកស្រី ឱក សុគន្ធកញ្ញា និងសហការី ចំពោះការចូលរួមក្នុងមហាគ្រួសារកាយរឹទ្ធិជាតិកម្ពុជា និងបានលើកឡើងពីសាវតានៃចលនាកាយរឹទ្ធិពិភពលោក ក៏ដូចជាសកម្មភាពជាច្រើនរបស់កាយរឹទ្ធិជាតិកម្ពុជាកន្លងមក និងនាពេលខាងមុខ ។
ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ចំពោះ លោកស្រី ឱក សុគន្ធកញ្ញា បានស្ម័គ្រចិត្តទទួលយកភារកិច្ចជាទូតសុច្ឆន្ទៈនៃកាយរឹទិ្ធជាតិកម្ពុជា ដើម្បីផ្សព្វផ្សាយពីសកម្មភាពកាយរឹទិ្ធជាតិកម្ពុជា សំដៅលើកកម្ពស់ការអប់រំដល់យុវជនជំនាន់ក្រោយ តបតាមអនុសាសន៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលយកចិត្តទុកដាក់ជំរុញឱ្យយុវជនចូលរួមការងារសង្គម ដើម្បីបង្កើនភាពធន់ និងចំណេះដឹងប្រែក្លាយជាកម្លាំងចលករចូលរួមអភិវឌ្ឍសេដ្ឋកិច្ចសង្គមជាតិ ។
តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណចំពោះទឹកចិត្ត និងការប្តេជ្ញាចិត្តរបស់ លោកស្រី ឱក សុគន្ធកញ្ញា និងសហការីទាំងអស់ ដែលបានស្ម័គ្រចិត្តចូលជាសមាជិកកាយរឹទិ្ធជាតិកម្ពុជា ដើម្បីចូលរួមចំណែកផ្សព្វផ្សាយការងារអប់រំ កិច្ចការមនុស្សធម៌ និងអភិវឌ្ឍសហគមន៍នានា នៅក្នុងព្រះរាជាណាចក្រកម្ពុជា ។
ក្នុងនាម ជាទូតសុច្ឆន្ទៈ លោកស្រីនឹងបន្តជួយផ្សព្វផ្សាយរូបភាពកាយរឹទិ្ធជាតិកម្ពុជា និងការអប់រំនៅក្នុងព្រះរាជាណាចក្រកម្ពុជា ។ ជាការឆ្លើយតប លោកស្រី ឱក សុគន្ធកញ្ញា បានថ្លែងអំណរគុណយ៉ាងជ្រាលជ្រៅដល់ ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី ព្រមទាំងក្រុមការងារកាយរឹទ្ធិទាំងអស់ ដែលបានផ្តល់កិត្តិយស និងឱកាសឱ្យលោកស្រី និងសហការី បានចូលរួមបំពេញភារកិច្ចដ៏មានអត្ថន័យនេះ ដើម្បីបម្រើដល់សង្គមជាតិ ដោយគូសបញ្ជាក់ពីការប្តេជ្ញាចិត្តខ្ពស់ ក្នុងការរួមចំណែកឱ្យកាន់តែសកម្មដល់សកម្មភាពមនុស្សធម៌ សប្បុរសធម៌ ធ្វើជាគំរូបង្ហាញនូវទង្វើល្អក្នុងការរស់នៅ សច្ចធម៌ គុណធម៌ សន្តិភាពផ្លូវចិត្ត ជំរុញលើកទឹកចិត្តយុវជនជំនាន់ក្រោយឱ្យក្លាយជាកូនល្អ មិត្តល្អ សិស្សល្អ និងពលរដ្ឋល្អ ។
ចែករំលែកព័តមាននេះ