រាជធានីភ្នំពេញ ៖ តាមសេចក្តីរាយការណ៍បន្តឱ្យដឹងថា មកទល់រសៀលថ្ងៃទី២ មេសា ដដែលនេះ សមត្ថកិច្ចកងរាជអាវុធហត្ថលើផ្ទៃប្រទេស បាននិងកំពុងធ្វើការសាកសួរលោកផែង វណ្ណៈ នៅឡើយទេ ។ ហើយបើតាមព័ត៌មានឱ្យដឹងថា ក្រោយពីសាកសួរចប់ហើយ លោក ផែង វណ្ណៈ អាចនឹងបញ្ជូនទៅកាន់សាលាដំបូងរាជធានីភ្នំពេញក្នុងរសៀលថ្ងៃនេះតែម្តង ។
គួររំលឹកថា លោក ផែង វណ្ណៈ ត្រូវបានកម្លាំងកងរាជអាវុធហត្ថលើផ្ទៃប្រទេសចាប់ខ្លួន នៅថ្ងៃទី២ មេសា ហើយការដែលចាប់ខ្លួនលោក គឺសមត្ថកិច្ចអនុវត្តតាមដីកាបញ្ជាឱ្យចូលខ្លួនរបស់លោក អ៊ុំ សុភក្តិ ព្រះរាជអាជ្ញារងអមសាលាដំបូងរាជធានីភ្នំពេញ និងយោងតាមពាក្យបណ្តឹងរបស់លោក គី តិច មេធាវីតំណាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។
លោក អ៊ុំ សុភក្តិ ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី១ មេសា នោះ បានចេញដីកាបញ្ជាឱ្យចូលខ្លួន ដោយលោក ផែង វណ្ណៈ ត្រូវបង្ហាញខ្លួននៅអយ្យការអមសាលាដំបូងរាជធានីភ្នំពេញ ឱ្យបានមុនថ្ងៃទី៣០ មេសា ដេីម្បីសាកសួរពាក់ព័ន្ធករណីញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបរិហារកេរ្តិ៍ជាសាធារណៈ ប៉ុន្តែមិនដល់ថ្ងៃកំណត់ផង លោក ផែង វណ្ណៈ ក៏ត្រូវកម្លាំងកងរាជអាវុធហត្ថលើផ្ទៃប្រទេសចាប់ខ្លួន។
គួររំលឹកទៀតថា ៖ ប៉េអឹមចាប់ខ្លួនលោកផែង វណ្ណៈ បញ្ជូនទៅសាលាដំបូង
ចែករំលែកព័តមាននេះ