ផ្សារស្អាត ក្រុងមានសោភ័ណភាព! អភិបាលខេត្តមណ្ឌលគិរី ចុះជួបអាជីវករផ្សារសែនមនោរម្យ ពង្រឹងការណែនាំសំខាន់ៗចំនួន ២ចំណុច
- មណ្ឌលគិរី
ខេត្តមណ្ឌលគិរី ៖ ការពង្រឹងសណ្តាប់ធ្នាប់សាធារណៈ និងការថែរក្សាអនាម័យបរិស្ថាននៅក្នុងទីផ្សារ គឺជាកត្តាចម្បងក្នុងការលើកកម្ពស់មុខមាត់ទីក្រុងទេសចរណ៍។ នេះជាការលើកឡើងរបស់ ឯកឧត្ដម គង់ គឹមនី អភិបាលខេត្តមណ្ឌលគិរី ដែលទើបឡើងកាន់តំណែងថ្មី ក្នុងឱកាសដឹកនាំក្រុមការងារ ចុះជួបសំណេះសំណាលផ្ទាល់ជាមួយអាជីវករ និងប្រជាពលរដ្ឋនៅក្នុងផ្សារសែនមនោរម្យ កាលពីព្រឹកថ្ងៃទី០៤ ខែមិថុនា ឆ្នាំ២០២៦ នេះ។
នៅក្នុងសកម្មភាពចុះពិនិត្យផ្ទាល់នោះ ឯកឧត្ដមអភិបាលខេត្ត បានដាក់ចេញនូវការណែនាំសំខាន់ៗចំនួន ២ ចំណុច ទៅកាន់បងប្អូនអាជីវករ រួមមាន ការគ្រប់គ្រងកាកសំណល់ និងអនាម័យ គឺអាជីវករទាំងអស់ត្រូវចូលរួមទុកដាក់កាកសំណល់ និងសំរាមឱ្យបានត្រឹមត្រូវតាមក្បួនខ្នាត ដើម្បីរក្សាបាននូវសោភ័ណភាពផ្សារ បរិស្ថានស្អាត និងការពារសុខភាពខ្យល់ដង្ហើមរបស់ទាំងអ្នកលក់ និងអ្នកទិញ។
ការរៀបចំសណ្តាប់ធ្នាប់ទំនិញ ត្រូវរៀបចំសម្ភារៈ និងទំនិញលក់ដូរឱ្យមានរបៀបរៀបរយ ដោយដាច់ខាតមិនត្រូវរំលោភលើផ្លូវដើរ ឬចំណីផ្លូវសាធារណៈឡើយ ដើម្បីបង្កលក្ខណៈងាយស្រួល ធំទូលាយ និងមានសុវត្ថិភាពខ្ពស់ដល់ប្រជាពលរដ្ឋដែលមកវៀចវេរទិញដូរ។
ឯកឧត្ដម គង់ គឹមនី មានប្រសាសន៍ថា ការរួមគ្នាថែរក្សាអនាម័យ និងសណ្តាប់ធ្នាប់នៅក្នុងផ្សារសែនមនោរម្យឱ្យបានល្អប្រសើរ មិនត្រឹមតែជួយឱ្យការលក់ដូររបស់បងប្អូនមានម៉ូយគាំទ្រច្រើនប៉ុណ្ណោះទេ ប៉ុន្តែក៏ជាការលើកកម្ពស់មុខមាត់ និងសោភ័ណភាពទីក្រុងទេសចរណ៍របស់ខេត្តយើងផងដែរ។
សកម្មភាពរបស់ថ្នាក់ដឹកនាំខេត្តមណ្ឌលគិរីនាពេលនេះ ទទួលបានការគាំទ្រពីសំណាក់បងប្អូនអាជីវករ និងប្រជាពលរដ្ឋ ដោយពួកគាត់បានសម្តែងការត្រេកអរ និងបានសន្យាថានឹងចូលរួមសហការជាមួយអាជ្ញាធរគ្រប់លំដាប់ថ្នាក់ ក្នុងការអនុវត្តតាមការណែនាំនេះ ដើម្បីធ្វើឱ្យផ្សារសែនមនោរម្យមានបរិស្ថានស្អាត និងសណ្តាប់ធ្នាប់ល្អជានិច្ច៕
ចែករំលែកព័តមាននេះ