ករណីសិស្សប្រើហិ.ង្សានៅវិទ្យាល័យច្បារអំពៅ សមត្ថកិច្ចឃាត់ខ្លួនសិស្ស២នាក់ និងកំពុងស្រាវជ្រាវអ្នកពាក់ព័ន្ធផ្សេងទៀត
- ភ្នំពេញ
រាជធានីភ្នំពេញ ៖ ករណីហិង្សាសិស្សមួយក្រុមព្រួតវាយសិស្សម្នាក់នៅវិទ្យាល័យច្បារអំពៅ សមត្ថកិច្ចឃាត់ខ្លួនសិស្សបង្ក២នាក់យកមកសាកសួរនៅអធិការដ្ឋាននគរបាលខណ្ឌច្បារអំពៅ ។ ការឃាត់ខ្លួនសិស្ស២នាក់នេះ បន្ទាប់ពីមានការចែកចាយរូបភាពជាវីដេអូនូវសកម្មភាពសិស្សជាច្រើននាក់បានធ្វើសកម្មភាពវាយលើសិស្សម្នាក់ ធ្វើឱ្យដួលលើកដីនៅលើបណ្តាញសង្គមកាលពីថ្មីៗនេះ ។
យោងតាមក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគបាលរាជធានីភ្នំពេញបានឱ្យដឹងថា កាលពីថ្ងៃទី៤ មិថុនា ឆ្នាំ២០២៦ ម៉ោង១០:៣០នាទីព្រឹក នៅវិទ្យាល័យច្បារអំពៅ មានសិស្សមួយក្រុមព្រួតគ្នាវាយសិស្សម្នាក់ ដែលមានការផ្សព្វផ្សាយតាមបណ្តាញសង្គម ។
សមត្ថកិច្ចយោងពាក្យបណ្ដឹងរបស់សិស្សរងគ្រោះ ឈ្មោះសូនី ហេងលី ភេទប្រុស មុខរបរសិស្ស ស្នាក់នៅផ្ទះ៧៩ ផ្លូវ៣៦៩ ភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ។ នៅថ្ងៃទី៥ ខែមិថុនា ឆ្នាំ២០២៦ ម៉ោង០៩:០០នាទី សមត្ថកិច្ចនគរបាលខណ្ឌច្បារអំពៅ បានឃាត់ខ្លួនសិស្សបង្ក០២នាក់ ៖
១-ឈ្មោះ សុខ វិជ្ជា ភេទប្រុស មុខរបរសិស្ស ស្នាក់នៅភូមិដើមម៉ាក់ក្លឿ សង្កាត់ច្បារអំពៅ១ ខណ្ឌច្បារអំពៅ ។ ២-ឈ្មោះ តឹក សុវណ្ណរ័ត្នមុនី ភេទប្រុស មុខរបរសិស្ស ស្នាក់នៅផ្ទះជួល ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។
បើតាមសមត្ថកិច្ចឱ្យដឹងថា មូលហេតុរវាងសិស្សរងគ្រោះនិងបង្កនិយាយពាក្យសំដីឌឺដងដាក់គ្នា។ បច្ចុប្បន្ន សិស្សបង្កខាងលើ សមត្ថកិច្ចកំពុងធ្វើការសាកសួរ ដោយឡែក អ្នកពាក់ព័ន្ធមួយចំនូនទៀត សមត្ថកិច្ចកំពុងបន្តស្រាវជ្រាវយកមកអនុវត្តតាមនីតិវិធី ៕
ចែករំលែកព័តមាននេះ