ប្រទេសនីហ្សេ ៖ នៅប្រទេសនីហ្សេមនុស្ស៤៩នាក់ស្លាប់ដោយដាច់អាហារ ក្រោយពីរថយន្តកាមីញ៉ុងដែលពួកគេជិះខូចក្នុងតំបន់វាលខ្សាច់មួយ ។ នេះបើតាមសេចក្ដីរាយការណ៍របស់អាជ្ញាធរមូលដ្ឋាន កាលពីថ្ងៃទី៤ មិថុនា ។
អាជ្ញាធរតំបន់ AGADEZ រាយការណ៍ថា នោះជាសោកនាដកម្មដ៏ទារុណមួយ មនុស្សដល់ទៅ៤៩នាក់ស្លាប់ នៅតំបន់វាលខ្សាច់ជាប់ព្រំដែនរវាងនីហ្សេ អាល់ហ្សេរី និងម៉ាលី។ ជនរងគ្រោះទាំងនោះមកពីម៉ាលី ក្រោយទៅចូលរួមក្នុងបុណ្យអ៊ិស្លាម AID ហើយរថយន្តកាំមីញ៉ុងដែលពួកគេជិះខូច នៅតំបន់ដាច់ស្រយាលមួយ ស្ថិតនៅចម្ងាយជាង៨០គីឡូម៉ែត្រខាងលិចទីក្រុងអាស់សាម៉ាកា ។
តាមអាជ្ញាធរតំបន់ AGADEZ ថា មនុស្សទាំងនេះ ក្រោយពីរថយន្តខូចគ្មានមធ្យោបាយ បន្តដំណើរទៀតបាន។ ពួកគេត្រូវដាច់បាយដាច់ទឹកដោយរថយន្តមិនអាចជួសជុលបាន ក៏ទោះបីអ្នកបើកខិតខំបែបណាក៏ដោយ។ ពួកគេជាប់លើវាលខ្សាច់ ដែលមានធាតុអាកាសក្ដៅហែងហើយមិនអាចរកកន្លែងសម្រាប់ផ្គត់ផ្គង់បាន។ អាជ្ញាធរគូសបញ្ជាក់ថា សពមនុស្សទាំងនេះត្រូវបានកប់ក្នុងផ្នូររួម ។
មានមនុស្សតែ២នាក់ប៉ុណ្ណោះ ដែលអាចនៅរស់រានមានជីវិត។ អ្នកទាំង២នាក់នោះបានដើរក្នុងចម្ងាយផ្លូវជាង៥០គីឡូម៉ែត្រ ទើបជួបត្រពាំងទឹកមួយបន្ទាប់មកបន្តដើររហូតដល់ទីក្រុងអាស់សាម៉ាកា ទើបអាចរាយការណ៍ប្រាប់ដល់អាជ្ញាធរ។
ពេលលើកកម្លាំងទៅកាន់កន្លែងរថយន្តខូច គេក៏បានប្រទះរថយន្តកាមីញ៉ុងមួយគ្រឿងទៀតដែលខូចអាគុយត្រង់កន្លែងមួយស្ថិតនៅចម្ងាយ៦០គីឡូម៉ែត្រពីក្រុងអាស់សាម៉ាកា ជាមួយមនុស្សជាង៦០នាក់ជាប់នៅទីនោះ៣ថ្ងៃមកហើយ។ ដោយសារការជួយទើបរថយន្តនោះអាចបន្តដំណើរទៅមុខទៀតបាន៕
ចែករំលែកព័តមាននេះ