ប្រទេសបារាំង ៖ មនុស្សច្រើនពាន់នាក់បានចេញដើរហែក្បួនបាតុកម្ម កាលពីថ្ងៃសៅរ៍ទី៣០ មីនា ក្នុងទីក្រុងជាច្រើនរបស់បារាំងពិសេសនៅក្រុងប៉ារីស ប័រដូ និងអាវីញ៉ុងក្នុងថ្ងៃទី២០នៃសកម្មភាពរបស់ពួកអាវកាក់លឿង។ អាជ្ញាធរបារាំងមានការបារម្ភ ចំពោះការប៉ះទង្គិចគ្នានិងអំពើហិង្សាដូចថ្ងៃសៅរ៍មុនៗ។…
ប្រទេសបារាំង ៖ មនុស្សច្រើនពាន់នាក់បានចេញដើរហែក្បួនបាតុកម្ម កាលពីថ្ងៃសៅរ៍ទី៣០ មីនា ក្នុងទីក្រុងជាច្រើនរបស់បារាំងពិសេសនៅក្រុងប៉ារីស ប័រដូ និងអាវីញ៉ុងក្នុងថ្ងៃទី២០នៃសកម្មភាពរបស់ពួកអាវកាក់លឿង។ អាជ្ញាធរបារាំងមានការបារម្ភ ចំពោះការប៉ះទង្គិចគ្នានិងអំពើហិង្សាដូចថ្ងៃសៅរ៍មុនៗ។
នាវេលាម៉ោង១៤ម៉ោងក្នុងស្រុក ក្រសួងមហាផ្ទៃបារាំងនិយាយថា មានបាតុករប្រមាណជា៥៦០០នាក់ក្នុងទូទាំងប្រទេស ក្នុងនោះ១៨០០នាក់នៅក្រុងប៉ារីសដែលនៅទីនោះក្បួនដង្ហែ២ ត្រូវបានអាជ្ញាធរអនុញ្ញាត។ កាលពីថ្ងៃសៅរ៍សប្ដាហ៍មុន នៅទីលានBEAUVAUក្នុងពេលម៉ោងដូចគ្នា មានបាតុករដល់ទៅ៨៣០០នាក់ ក្នុងនោះ៣១០០នាក់ក្នុងរដ្ឋធានី។
ប៉ូលិសក្រុងប៉ារីសនិយាយថានាវេលាម៉ោង១៧ មនុស្សសរុប៣២នាក់បានត្រូវចាប់ខ្លួនហើយមនុស្សជិត១២០០០នាក់ត្រូវតាមដានពិនិត្យជាការបង្ការ។ នៅក្រុងប៉ារីសពួកបាតុករបានលើកគ្នាចាកចេញពីសង្កាត់នៃស្ថានីយរថភ្លើងខាងកើត ព្រមទាំងពីទីលានCHATELET ដែលនៅទីនោះ មានការរៀបចំពិកនិកធំមួយដើម្បីបរិហារការគ្រប់គ្រងបែងចែកលំនៅឋានពុំបានល្អ។ ពួកគេបន្ទាប់មកលើកគ្នាដើរដោយ់ស្ងៀមស្ងាត់រហូតដល់TROCADEROទល់មុខTOUR EIFFEL។
ភាពតានតឹងកើតមានដែលតាមប៉ូលិសថាមកពី ពួកឆ្លៀតឱកាសជ្រៀតចូលដើម្បីបង្កចលាចល។ ប៉ូលិសបានស្នើដល់ពួកបាតុករឲ្យបំបែកជួរដោយស្ងប់ស្ងៀម ព្រោះមានវត្តមានរបស់ពួករ៉ាឌីកាល់។ គេបានហាមឃាត់មិនឲ្យមានបាតុកម្មនៅតាមមហាវិថី CHAMPS ELYSEES ជាកន្លែងដែលពួកអាវកាក់លឿងតាមធម្មតាយកវិថីនោះ សម្រាប់ហែក្បួនរាល់ចុងសប្ដាហ៍ ចាប់តាំងពីថ្ងៃទី១៧វិច្ឆិកាឆ្នាំ២០១៨មក។
ម្យ៉ាងទៀតប៉ូលិសបារាំងបានហាមឃាត់រាល់ការប្រមូលផ្ដុំមនុស្ស នៅកណ្ដាលក្រុងអាវីញ៉ុង។ ប៉ុន្តែពួកបាតុករនៅតែប្រមូលផ្ដុំគ្នានៅទីលានHORLOGE ដែលនៅទីនោះមានការប៉ះទង្គិចគ្នារវាងកងកម្លាំងប៉ូលិសដែលបានដាក់ពង្រាយដ៏ច្រើន។ ចំណែកពួកអាវកាក់លឿងច្រើនរយនាក់ បានស្ថិតនៅផ្លូវមួយនាជាយក្រុង ដោយនៅទីនោះក៏កើតមានការប៉ះទង្គិចគ្នាដែរ ដោយប៉ូលិសបានបាញ់ឧស្ម័នបង្ហូរទឹកភ្នែក។
នៅក្រុងប័រដូពួកអាវកាក់លឿងប្រមាណជាជាង៥០០០នាក់បានប្រមូលផ្ដុំគ្នា ហើយចាប់ដើរហែក្បួនពីដើមរសៀលទៅ។ ឧប្បត្តិហេតុនានាផ្ទុះឡើងរវាងពួកបាតុករនិងប៉ូលិស ជាមួយការលេចមុខរបស់ពួកអ្នកអុកឡុកមួយក្រុម ស្លៀកពាក់ពណ៌ខ្មៅ ដែលវាយបំបែកកញ្ចក់របស់ធនាគារមួយ មុនពេលទៅដល់តំបន់ហាមឃាត់។ ក្រោយមកនៅទីលានសាធារណរដ្ឋ មនុស្សមួយក្រុមបាននាំគ្នាដុតរបស់របរនានា ក្នុងការដ្ឋានមួយ មុនពេលប៉ូលិសបំបែក។
នៅក្រុងរ៉ែនបាតុករច្រើនរយនាក់ បានប៉ះគ្នាជាមួយប៉ូលិស។ មនុស្សប្រមាណ១០នាក់បានត្រូវចាប់ខ្លួន ហើយប៉ូលិស២នាក់រងរបួស។ ចាប់តាំងពីពាក់កណ្ដាលខែវិច្ឆិកាមក ពួកបាតុករអាវកាក់លឿងបានធ្វើសកម្មភាព ហើយធ្វើការទាមទារជាច្រើន ដូចជាឲ្យប្រធានាធិបតីលាលែងចេញពីតំណែង រៀបចំការបោះប្រជាមតិមួយឬប្រឆាំងនឹងទំនិញឡើងថ្លៃពិសេសប្រេងឥន្ធនៈ៕
ចែករំលែកព័តមាននេះ