សហរដ្ឋអាមេរិក-ចិន ៖ រដ្ឋមន្ត្រីរតនាគារអាមេរិក លោកSTEVEN MNUCHINគូសបញ្ជាក់កាលពីថ្ងៃទី២៩មីនាថា លោកបានពិភាក្សាប្រកបដោយផ្លែផ្កា ក្នុងឱកាសនៃទស្សនកិច្ចរបស់លោកនៅក្រុងប៉េកាំង ក្នុងក្របខណ្ឌនៃការចរចា សំដៅស្វែងរកច្រកចេញមួយចំពោះជម្លោះពាណិជ្ជកម្មរវាងអាមេរិកនិងចិន។
លោកSTEVEN MNUCHINនិងតំណាងពាណិជ្ជកម្មអាមេរិក លោកROBERT LIGHTHIZER បានជួបពិភាក្សាក្នុងរដ្ឋធានីចិនជាមួយឧបនាយករដ្ឋមន្ត្រីចិន លោកLIU HE សម្រាប់ការជួបទល់មុខគ្នាលើកដំបូង ចាប់តាំងពីច្រើនសប្ដាហ៍មកហើយ នៃការចរចាគ្នារវាងតំណាងនៃប្រទេសទាំង២។
ក្នុងសារមួយតាមTWITTERលោកSTEVEN MNUCHINថ្លែងថា យើងពិភាក្សាគ្នាខាងពាណិជកម្មប្រកបដោយផ្លែផ្កានៅក្រុងប៉េកាំង។ យើងរង់ចាំេជួបគ្នាទៀតជាមួយលោកLIU HEនៅក្រុងវ៉ាស៊ិនតោន នាសប្ដាហ៍ខាងមុខ។
ចំណែកលោកLARRY KUDLOWទីប្រឹក្សាសេដ្ឋកិច្ចរបស់សេតវិមាន អះអាងនាថ្ងៃទី២៨មីនាថា សហរដ្ឋអាមេរិកអាចលុបចោលច្បាប់ពន្ធគយមួយចំនួន លើបណ្ដាផលិតផលចិន ក្នុងក្របខណ្ឌនៃការសម្របសម្រួលគ្នាខាងពាណិជ្ជកម្ម៕
ចែករំលែកព័តមាននេះ