ប្រទេសវេណេស៊ុយអេឡា ៖ រដ្ឋអំណាចវេណេស៊ុយអេឡាកាលពីថ្ងៃទី២៨មីនា បានដាក់ការគាបសង្កត់លើលោកJUAN GUAIDO ដែលទទួលស្គាល់ថាជាប្រធានាធិបតីស្ដីទី ដោយប្រទេសប្រមាណជា៥០ តាមរយៈការប្រកាសថា លោកមិនអាចជ្រើសតាំងកាន់តំណែងអ្វីបានរយៈពេលដល់ទៅ១៥ឆ្នាំ។ នោះជាទណ្ឌកម្មដែលមេដឹកនាំប្រឆាំងរូបនោះបដិសេធភ្លាមៗ។…
ប្រទេសវេណេស៊ុយអេឡា ៖ រដ្ឋអំណាចវេណេស៊ុយអេឡាកាលពីថ្ងៃទី២៨មីនា បានដាក់ការគាបសង្កត់លើលោកJUAN GUAIDO ដែលទទួលស្គាល់ថាជាប្រធានាធិបតីស្ដីទី ដោយប្រទេសប្រមាណជា៥០ តាមរយៈការប្រកាសថា លោកមិនអាចជ្រើសតាំងកាន់តំណែងអ្វីបានរយៈពេលដល់ទៅ១៥ឆ្នាំ។ នោះជាទណ្ឌកម្មដែលមេដឹកនាំប្រឆាំងរូបនោះបដិសេធភ្លាមៗ។
ការសម្រេចនេះបានបង្កើនថែមទៀតនូវភាពតានតឹងក្នុងប្រទេសផលិតប្រេងនោះ ដែលកំពុងជាប់គាំង ដោយសារការដាច់ភ្លើងធំថ្មីស្ទើរទូទាំងប្រទេស។ នៅលើឆាកអន្តរជាតិ ភាពតានតឹងក៏កើនឡើងដែររវាងក្រុងវ៉ាសិុនតោននិងក្រុងមូស្គូ លើវត្តមាននៃកងទាហានរុស្ស៊ីនៅវេណេស៊ុយអេឡា ដែលក្លាយជាចំណុចបន្ថែម នៃសង្គ្រាមត្រជាក់ថ្មីរវាងមហាអំណាចទាំង២។
នៅក្រុងការ៉ាកាស់អគ្គត្រួតពិនិត្យនៃសាធារណរដ្ឋ លោកELVIS AMOROSOទទួលបន្ទុកត្រួតពិនិត្យតម្លាភាពនៃរដ្ឋបាលនៅវេណេស៊ុយអេឡា បានសម្រេចកាលពីថ្ងៃទី២៨មីនា ហាមឃាត់មិនឲ្យលោកGUAIDO កាន់រាល់តំណែងជ្រើសតាំង សម្រាប់រយៈពេល១៥ឆ្នាំ យោងទៅតាមច្បាប់ទាក់ទិនរឿងពុករលួយ។
យោងតាមលោកELVIS AMOROSO ដែលស្និទ្ធនឹងរដ្ឋអំណាចថា លោកGUAIDO ពុំបានបំពេញក្នុងសេចក្ដីប្រកាស ទ្រព្យសម្បត្តិការចំណាយមួយចំនួនរបស់លោក នៅវេណេស៊ុយអេឡានិងនៅបរទេស ជាមួយមូលនិធិមួយចំនួនមកពីប្រទេសឯទៀតៗ។ លោកបានធ្វើដំណើរយ៉ាងតិច៩១លើក ទៅក្រៅប្រទេសជាមួយការចំណាយប្រាក់លើសពី៣១០លានបូលីវ៉ា ប្រមាណជា៩៤.០០០ដុល្លារដោយពុំបញ្ជាក់ពីប្រភពនៃមូលនិធិទាំងនោះ។
លោកJUAN GUAIDOបានបដិសេធទណ្ឌកម្មនោះ ក្នុងសុន្ទរកថាមួយដែលលោកថ្លែង នៅមុខពួកអ្នកគាំទ្រលោកខណៈលោកបង្ហាញផែនការរបស់លោកសម្រាប់វេណេស៊ុយអេឡា។ សហរដ្ឋអាមេរិកចាត់ទុកជារឿងអស់សំណើចការដាក់ទណ្ឌកម្មនោះ៕
ចែករំលែកព័តមាននេះ