ខេត្តរតនគិរី ៖ ពិតជាឈាមស្រែកស្បែកហៅមែន ក្នុងរយៈពេលតែ៣ថ្ងៃសមត្ថកិច្ចបានឈានដល់ការវែកមុខឃាតករសម្លាប់ស្ត្រីម្នាក់ ពេលនាងទៅមុជទឹកអូរក្នុងចម្ការរបស់ខ្លួន ។ ទោះបីជាបែបណា ការសម្លាប់ដែលស្ថិតក្នុងបទសង្ស័យបំបិទមាត់ គឺពិតណាស់តែងបង្កឡើង ដោយមនុស្សស្គាល់គ្នាមែន តែអ្វីដែលគួរឱ្យភ្ញាក់ផ្អើលផងដែរនោះ គឺជនដែលសម្លាប់ស្ត្រីរងគ្រោះជាប្តីរបស់ខ្លួន ។
ក្រោយពីវាំងននខ្មៅត្រូវបើក គឺប្ដីសម្លាប់ប្រពន្ធដោយសារតែរឿងគ្រាប់ស្វាយចន្ទីចំនួន៩គីឡូក្រាម ដែលប្ដីឱ្យប្រពន្ធលក់ តែប្រពន្ធមិនព្រមលក់ ដោយទុករង់ចាំបានថ្លៃ៨ពាន់រៀលក្នុង១គីឡូក្រាម ទើបព្រមលក់ ។ ការដែលប្តីទទូចលក់នេះ មិនមែន១លើកទេ គឺច្រើនលើកច្រើនសាមកហើយ រហូតកើតជាជម្លោះនឹងគ្នារវាងប្ដីនិងប្រពន្ធជាញឹកញាប់ តាំងពីឆ្នាំ២០១៨មកម្ល៉េះ ។
នេះគឺជាការឆ្លើយសារភាពរបស់បុរសជាប្ដី បន្ទាប់ពីនគរបាលស្រាវជ្រាវរកឃើញ និងឈានដល់ការឃាត់ខ្លួនក្នុងករណីឃាតកម្មសម្លាប់ប្រពន្ធនៅស្រុកលំផាត់ ដែលបង្កឱ្យមានការភ្ញាក់ផ្អើលកាលពីវេលាម៉ោង៥ និង៣០នាទីល្ងាចថ្ងៃទី២៤ ខែមីនា កន្លងមកនេះ ។ កម្លាំងនគរបាលខេត្ត សហការជាមួយនគរបាលស្រុកលំផាត់ នាព្រឹកថ្ងៃទី២៧ ខែមីនា បានឃាត់ខ្លួនជនឈ្មោះ កិ ដិ ភេទប្រុស អាយុ៣៦ឆ្នាំ ជនជាតិទំពួន ជាប្ដីស្ត្រីរងគ្រោះ មានមុខរបរធ្វើចម្ការ និងមានទីលំនៅក្នុងភូមិអុលធំ ឃុំបាតាង ស្រុកលំផាត់ ។
ការឃាត់ខ្លួននេះ គឺពីបទជាប់ពាក់ព័ន្ធក្នុងករណីឃាតកម្ម កាលពីថ្ងៃទី២៤ ខែមីនា នៅចំណុចអូររ៉ាពឿង ក្នុងចម្ការស្វាយចន្ទីរបស់ខ្លួន ស្ថិតក្នុងភូមិអុលធំ ឃុំបាតាង ស្រុកលំផាត់ ។ សូមរំឭកថា ស្ត្រីឈ្មោះ កែ ញ៉ូន អាយុ៣៤ឆ្នាំ ជនជាតិទំពួន នាល្ងាចថ្ងៃទី២៤ ខែមីនា បានជិះម៉ូតូទៅងូតទឹកម្នាក់ឯងនៅអូរក្នុងចម្ការរបស់ខ្លួន ដែលមានចម្ងាយពីផ្ទះប្រហែល១គីឡូម៉ែត្រ ។
ពេលនោះបុរសជាប្តីបានធ្វើជាឆោឡោ ដើម្បីបំភ័ន្តបង្វែងដាន ក្នុងការតាមរកប្រពន្ធ ហើយរហូតដល់ម៉ោង១២ និង៣០នាទីរំលងអធ្រាត្រ ឈានចូលថ្ងៃទី២៥ ខែមីនា ទើបរកសពឃើញនៅចម្ងាយប្រមាណ៣០ម៉ែត្រពីកន្លែងមុជទឹក ក៏រាយការណ៍ជូននគរបាលមូលដ្ឋានត្រួតពិនិត្យ ។ លុះមកដល់ព្រឹកថ្ងៃទី២៧ ខែមីនា វាំងននខ្មៅបានបើក គឺជនសង្ស័យជាឃាតករជាប្តីរបស់ស្ត្រីរងគ្រោះ ។
ក្រោយពីត្រូវឃាត់ខ្លួន ជនសង្ស័យជាប្តីឆ្លើយសារភាពថា ខ្លួនពិតជាបានសម្លាប់ប្រពន្ធខ្លួនឯងប្រាកដមែន ដោយសារខឹងប្រពន្ធនិយាយមិនស្ដាប់ពីរឿងលក់គ្រាប់ស្វាយចន្ទីជាច្រើនលើក ។ នៅថ្ងៃទី២៧ មីនា បុរសជាប្តីត្រូវបានឃាត់ខ្លួននៅការិយាល័យនគរបាលព្រហ្មទណ្ឌធ្ងន់ខេត្ត ដើម្បីកសាងសំណុំរឿងបញ្ជូនទៅសាលាដំបូង ។
ចែករំលែកព័តមាននេះ