រាជធានីភ្នំពេញ ៖ ថ្ងៃទី២៦ កញ្ញា ឆ្នាំ២០១៣ គឺជាពេលសម្រេចបាននូវជោគជ័យមួយជំហានសម្រាប់ក្រុមហ៊ុនវីង ខេមបូឌា និងរដ្ឋាករទឹកស្វយ័តក្រុងភ្នំពេញដែលបានចុះហត្ថលេខាលើកិច្ចព្រមព្រៀងជាផ្លូវការក្នុងការអនុញ្ញាតឱ្យអតិថិជនទាំងអស់របស់រដ្ឋាករទឹកភ្នំពេញ អាចបង់វិក្កយបត្រទឹករបស់ខ្លួនតាមរយៈវីង និងតាមបណ្ដាភ្នាក់ងារវីងខាសអិុចប្រេសទាំង១.០០០កន្លែងរបស់ក្រុមហ៊ុនវីង ។
វីងគឺជាក្រុមហ៊ុនទូទាត់ប្រាក់តាមរយៈទូរស័ព្ទដៃលំដាប់ថ្នាក់លេខ១នៅកម្ពុជា ដែលផ្ដល់ភាពងាយស្រួលដល់អតិថិជនទូទាំងប្រទេសលើសេវាកម្មជាច្រើនដូចជា ផ្ទេរប្រាក់ បញ្ជូលទឹកប្រាក់ទូរស័ព្ទ បើកប្រាក់ខែបុគ្គលិក ទូទាត់ប្រាក់ជាមួយកាតវីង ទូទាត់ប្រាក់តាមរយៈអីុនធើរណេត និងបង់វិក្កយបត្រផ្សេងៗ ។ បច្ចុប្បន្ននេះ អតិថិជនវីងអាចបង់វិក្កយបត្រផ្សេងៗជាច្រើន តាមរយៈទូរស័ព្ទដៃរបស់ខ្លួនដូចជា វិក្កយបត្រអគ្គិសនីកម្ពុជា (EDC) វិក្កយបត្រអីុនធើរណេតអីុហ្សុីខម (EZECOM) វិក្កយបត្រទូរទស្សន៍ឌីជីថលវ័នធីវី (OneTV) វិក្កយបត្រអីុនធើរណេត (DIGI) បង់រំលស់ជាមួយក្រុមហ៊ុនអីុអន (AEON) បង់រំលស់ជាមួយក្រុមហ៊ុនហ្វឺសហ្វាយនែន (First Finance) វិក្កយបត្រកាសែតភ្នំពេញប៉ុស្ដិ៍ (Phnom Penh Post) វិក្កយបត្រអីុនធើរណេត (Y5Net) និងវិក្កយបត្រផ្សេងៗ ។ល។ លើសពីនេះទៀត ទាំងអតិថិជនវីង និងអតិថិជនទូទៅក៏អាចបង់វិក្កយបត្ររបស់ខ្លួននៅតាមភ្នាក់ងារវីងខាសអិុចប្រេសណាមួយក៏បាន ។
កិច្ចព្រមព្រៀងនេះមិនត្រឹមតែបង្ហាញពីសមត្ថភាពរបស់ក្រុមហ៊ុនវីងក្នុងការបំពេញតម្រូវការរបស់អតិថិជនលើសេវាកម្មជាច្រើនខាងលើប៉ុណ្ណោះទេ ប៉ុន្ដែវាក៏បង្ហាញយ៉ាងច្បាស់ពីកិត្ដិនាម និងទំនុកចិត្ដរបស់ក្រុមហ៊ុនជូនដល់អតិថិជនរបស់ខ្លួន ព្រមទាំងស្ថាប័នរដ្ឋ និងស្ថាប័នឯកជននានា ។ មិនតែប៉ុណ្ណោះ ក្រុមហ៊ុនវីងប្ដេជ្ញានឹងពង្រីកសេវាកម្មដែលមានស្រាប់របស់ខ្លួនជូនដល់អតិថិជនឱ្យបានកាន់តែច្រើនថែមទៀត និងរក្សានូវភាពឈានមុខគេក្នុងចំណោមក្រុមហ៊ុនទូទាត់ប្រាក់តាមរយៈទូរស័ព្ទដៃដែលត្រូវបានគេស្គាល់នៅក្នុងមជ្ឈដ្ឋានអន្ដរជាតិ ៕
ចែករំលែកព័តមាននេះ