យោងតាមការស្រាវជ្រាវរបស់អាមេរិកបានបញ្ជាក់ថា ពិសាកាហ្វេច្រើនជាង៣ពែងក្នុងមួយថ្ងៃអាចបង្កើនអត្រាបាត់បង់ការមើលឃើញ និងឈានទៅរកការងងឹតភ្នែកមើលអ្វីមិនឃើញ ។ ការស្រាវជ្រាវបន្តថា បើទោះណា ពិសាក្នុងចំនួនមធ្យមក្តី ក៏អាចធ្វើឱ្យភ្នែកកើតជំងឺ Glaucoma(ប្រភេទជំងឺភ្នែកម្យ៉ាងដែលធ្វើឱ្យបុគ្គលម្នាក់ងងឹតបន្តិចម្តងៗរហូតមើលលែងឃើញ)បានដែរ ។
ដើម្បីកាត់បន្ថយឱកាសកើតជំងឺGlaucomaដូចបានបញ្ជាក់ខាងដើមនេះ ការសិក្សាដែលបានចុះផ្សាយនៅក្នុងព្រឹត្តិបត្រ Investigative Ophthalmology & Visual Scienceបានស្នើថា បណ្តាអ្នកនិយមកាហ្វេគួរតែកាត់បន្ថយការទទួលទាន ។
ក្រុមអ្នកស្រាវជ្រាវមកពីមន្ទីរពេទ្យ Brigham & Women’s Hospitalនៅបូស្តុនរដ្ឋម៉ាសាឈូសេត សហរដ្ឋអាមេរិកបានបញ្ជាក់ថា សមាសធាតុនៅក្នុងកាហ្វេបានបង្កើនសម្ពាធនៅក្នុងគ្រាប់ភ្នែក បង្កើតបានជាលក្ខខណ្ឌមួយដែលបំផ្លាញការមើលឃើញរបស់ភ្នែកហៅថា Exfoliation Glaucoma ។
លក្ខខណ្ឌនេះកើតមាននៅពេលសមាសធាតុក្នុងកាហ្វេប៉ះពាល់ទៅលើប្រស្រីនិងកែវភ្នែកទាំង២ដែលបន្ទាប់មកធ្វើឱ្យស្ទះប្រព័ន្ធបង្ហូរវត្ថុរាវរបស់គ្រាប់ភ្នែកជាហេតុនាំឱ្យសម្ពាធក្នុងភ្នែកកើនឡើង ។ ប៉ុន្តែចំពោះ ផលិតផលរបស់កាហ្វេពុំជាប់ទាក់ទងនឹងជំងឺងងឹតភ្នែកនេះទេ ។
ទោះជាយ៉ាងនេះក្តី យើងក៏មិនអាចនិយាយបានថា កាហ្វេគ្មានអត្ថប្រយោជន៍នោះបានដែរ។ យោងតាមការសិក្សាលើកមុនៗបានរកឃើញថា ទទួលទានកាហ្វេអាចជួយកាត់បន្ថយអត្រាគ្រោះថ្នាក់ដោយជំងឺបេះដូង ជំងឺដាច់សរសៃឈាមក្នុងខួរក្បាលព្រមទាំងជំងឺទឹកនោមផ្អែម…។ ប៉ុន្តែអ្វីដែលការសិក្សារបស់ប្រទេសនីមួយៗមិនចុះសម្រុងគ្នាគឺលើបរិមាណនៃការទទួលទាន ដោយខ្លះរកឃើញថា ទទួលទានច្រើនផ្តល់ផលល្អដល់សុខភាព ខណៈខ្លះទៀតថាមិនល្អបើទទួលទានច្រើនពេក ៕
ចែករំលែកព័តមាននេះ