តាមប្រភពពីMetroបានឱ្យដឹងថា កីឡាករប្រដាល់ UFC Conor McGregor ត្រូវបានចាប់ខ្លួន ក្រោយពីយកទូរស័ព្ទពីអ្នកគាំទ្រទៅបោកចោល ខណៈពេលពួកគេព្យាយាមថតរូបរបស់ខ្លួន ។ កីឡាករ
ល្បីដែលធ្លាប់ឡើងវាយជាមួយនឹង Floyd Mayweather បានឆក់យកទូរស័ព្ទរបស់អ្នកគាំទ្រទៅបោកចោល ហើយជាន់ពីលើជាច្រើនដង កាលពីព្រឹកថ្ងៃទី១១ មីនា កន្លងមកនេះ។
ពេលរសៀល គេក៏ត្រូវបានចាប់ខ្លួននៅម្តុំឆ្នេរ Miami ក្នុងរដ្ឋផ្លរីដា ក្រោមការចោទប្រកាន់ពីបទ លួចឆក់ និងបំផ្លាញទ្រព្យសម្បត្តិអ្នកដទៃ។ មេធាវីម្នាក់របស់កីឡាកររូបនេះបានលើកឡើងថា ករណីនេះ គឺជាករណីតូចតាច ហើយ McGregor ក៏បានសហការជាមួយអាជ្ញាធរបានល្អដែរ ។ នៅពេលយប់ថ្ងៃដដែល ប៉ូលិសក៏ដោះលែង McGregor ឱ្យនៅក្រៅឃុំ ដោយមានប្រាក់តម្កល់១២៥០០ដុល្លារអាមេរិក ។
តាមសម្តីមេធាវីដដែលនេះ បានឱ្យដឹងថា McGregor សរសើរការអនុវត្តន៍ច្បាប់របស់ក្រុមមន្ត្រីអាជ្ញាធរ ហើយក៏អរគុណច្រើនសម្រាប់ការខិតខំធ្វើការ ។ គួរបញ្ជាក់ផងដែរថា កីឡាកររូបនេះ ត្រូវបានព្យួរពីការប្រកួត UFC រយៈពេល៦ខែ និងពិន័យជាប្រាក់៥ម៉ឺនដុល្លារអាមេរិក ក្រោយពីមានរឿងឈ្លោះគ្នាក្រោយការប្រកួតចាញ់ Khabib Nurmagomedov កាលពីខែតុលា ។
ចែករំលែកព័តមាននេះ