ទីក្រុងម៉ាឌ្រីត៖ ប្រទេសអេស្ប៉ាញបញ្ជាក់ថាខ្លួននឹងមិនចូលរួមនៅក្នុងក្រុមប្រឹក្សាសន្តិភាពដែលផ្ដួចផ្ដើមឡើងដោយលោកដូណាល់ត្រាំទេ។ ក្រុមប្រឹក្សានេះបង្កើតឡើងដើម្បីដោះស្រាយជម្លោះនៅទូទាំងសាកលលោក។ ប៉ុន្តែនៅក្នុងដំណាក់កាលដំបូង ក្រុមប្រឹក្សានេះផ្ដោតសំខាន់លើការដោះស្រាយបញ្ហានៅតំបន់ហ្កាហ្សា។ ពោលគឺអភិវឌ្ឍតំបន់នេះឡើងវិញ និងកាត់រំសាយអាវុធ។
នាយករដ្ឋមន្ត្រីអេស្ប៉ាញ លោកប៉េដ្រូ សាន់ឆេស (Pedro Sanchez) បញ្ជាក់អំពីជំហរដូចខាងលើនេះក្រោយពាក់កណ្ដាលអធ្រាត្រឆ្លងចូលព្រឹកថ្ងៃសុក្រ។ ពោលគឺបន្ទាប់ពីសហភាពអឺរ៉ុបកោះប្រជុំកំពូលនៅក្នុងស្ថានភាពបន្ទាន់នៅទីក្រុងប្រ៊ុចសែល ប្រទេសបែលហ្សិច។ លោកថ្លែងថាយើងវាយតម្លៃខ្ពស់ចំពោះការគោរពអញ្ជើញ (ឱ្យចូលរួមនៅក្នុងក្រុមប្រឹក្សាសន្តិភាព)។ ប៉ុន្តែយើងមិនចូលរួមទេ។ លោកថាក្រុមប្រឹក្សាសន្តិភាពនេះស្ថិតនៅក្រៅក្របខណ្ឌរបស់អង្គការសហប្រជាជាតិ ហើយគ្មានចំណែករបស់អាជ្ញាធរប៉ាឡេស្ទីនចូលរួមទៅទៀត។
អាមេរិកអះអាងថាស្ថាប័នមួយនេះនឹងជួយសម្រុះសម្រួលឱ្យមានបទឈប់បាញ់ ហើយនឹងឃ្លាំមើលការអនុវត្តបទឈប់បាញ់ ព្រមទាំងចាត់ចែងសន្តិសុខ និងកសាងឡើងវិញនូវអ្វីដែលខូចខាតដោយសារជម្លោះប្រដាប់អាវុធ។ គំនិតនេះផ្ដើមចេញពីផែនការសន្តិភាពនៅតំបន់ហ្កាហ្សាដែលជាសំណើរបស់លោកត្រាំ។ នៅពេលប្រកាសបង្កើតក្រុមប្រឹក្សានេះនៅទីក្រុងដាវ៉ូស ប្រទេសស្វីស កាលពីយប់មិញនោះ គេឃើញថាសម្ព័ន្ធមិត្តចាស់វស្សារបស់អាមេរិកដូចជាកាណាដា អង់គ្លេស និងរដ្ឋជាសមាជិកសហភាពអឺរ៉ុបស្ទើរតែទាំងអស់មិនបានចូលរួមទេ លើកលែងតែហុងគ្រី និងប៊ុលការីប៉ុណ្ណោះ។
លោកសាន់ឆេសពន្យល់ហេតុផលដែលលោកសម្រេចចិត្តមិនចូលរួមព្រោះគោលជំហររបស់រដ្ឋាភិបាលលោកតម្កល់ច្បាប់អន្តរជាតិ, អង្គការសហប្រជាជាតិ និងនយោបាយពហុនិយមជាធំ។ ប្រទេសដែលចូលរួមនៅក្នុងក្រុមប្រឹក្សានេះគឺអ៊ីស្រាអែល, បណ្ដាប្រទេសនៅមជ្ឈិមបូព៌ា, អាស៊ីកណ្ដាល និងអាស៊ីអាគ្នេយ៍។ ប្រទេសខ្លះទទួលបានលិខិតអញ្ជើញរួចហើយ ហើយប្រកាន់ជំហរផ្សេងៗគ្នា។ ប្រទេសខ្លះទទួលការអញ្ជើញរួចហើយ ហើយយល់ព្រមចូលរួម, ប្រទេសខ្លះមិនទាន់ឆ្លើយតបជាផ្លូវការ និងប្រទេសខ្លះមិនចូលរួម។ មានករណីប្រទេសខ្លះយល់ព្រមចូលរួម ប៉ុន្តែត្រូវបានលោកត្រាំលុបចោលការអញ្ជើញវិញ ឧទាហរណ៍ ដូចជាកាណាដាជាដើម៕ ប្រភព៖ រ៉យទ័រ (Reuters ) និងប្រភពដទៃទៀត
ចែករំលែកព័តមាននេះ