រាជធានី​ភ្នំពេញ ៖ ទិវា​រត់ប្រណាំង​ម៉ា​រ៉ា​តុងចក្រភព​អង្គរ ឬ​Angkor Empire Marathon ដ៏​ធំ​របស់​កម្ពុជា ត្រូវ​បាន​ទស្សនាវដ្ដី Forbes ដ៏​ល្បីល្បាញ​នៅ​លើ​ពិភពលោក​ជ្រើសរើស​ជាគោលដៅ​ដ៏​ទាក់ទាញ​បំផុត​ក្នុង​ចំណោម​ព្រឹត្តិការណ៍​ម៉ា​រ៉ា​តុង​អន្តរជាតិ​ធំ​ៗ និង​ក្លាយជា​គោលដៅ​ទី​១២​ទូ​ទាំង​ពិភពលោក​ក្នុង​ឆ្នាំ​២០២៦​។

ទស្សនាវដ្ដី Forbes ដែល​មាន​មូលដ្ឋាន​នៅ​សហរដ្ឋអាមេរិក​មួយ​នេះ​បាន​រៀបរាប់​ថា ទិវា​រត់ប្រណាំង​ម៉ា​រ៉ា​តុង​ចក្រភព​អង្គរ ជា​ព្រឹត្តិការណ៍​ដ៏​ល្អ​ឯក​ដែល​ប្រព្រឹត្ត​ទៅ​នៅ​តំបន់​អង្គរ​ដ៏​ល្បីល្បាញ​របស់​ខ្មែរ ដោយ​រត់​ឆ្លងកាត់​វាលស្រែ ភូមិឋាន​ប្រកបដោយ​សោភ័ណ​ភាព និង​ប្រាសាទបុរាណ​ដ៏​ស្រស់​ស្អាត​ចំនួន​៤០​។ អ្វី​ដែល​ពិសេស​ទៀត​នោះ​គឺ​ការ​ធ្វើ​ដំណើរ​កាត់​ប្រាសាទអង្គរវត្ត​ដ៏​អច្ឆរិយ និង​ជា​បេតិកភណ្ឌ​ពិភពលោក​។

ព្រឹត្តិការណ៍​ម៉ា​រ៉ា​តុង​លំដាប់​ពិភពលោក​ចំនួន​១១​ផ្សេង​ទៀត​ដែល​ត្រូវ​បាន​ទស្សនាវដ្ដី Forbes ជ្រើសរើស​ជា​គោលដៅ​ដ៏​ទាក់ទាញ​បំផុត​ប្រចាំឆ្នាំ​២០២៦​ដែរ​នោះ មាន​ដូច​ជា ៖
១-Boston Marathon រដ្ឋ Massachusetts (​សហរដ្ឋអាមេរិក​)
២-Big Sure International Marathon រដ្ឋ California (​សហរដ្ឋអាមេរិក​)
៣-TCS London Marathon (​ចក្រភព​អង់គ្លេស​)

៤-Great Wall Marathon (​ប្រទេស​ចិន​)
៥-the Big Five Marathon (​ប្រទេស​អាហ្វ្រិក​ខាងត្បូង​)
៦-Bank of America Chicago Marathon ក្រុង Chicago រដ្ឋ Illinois(​សហរដ្ឋអាមេរិក​)
៧-TCS New York Marathon នៅ​ក្រុង New York (​សហរដ្ឋអាមេរិក​)
៨-French Riviera Marathon Nice-Cannes (​ប្រទេស​បារាំង​)
៩-New Zealand Sotheby’s International Realty Queenstown Marathon (​ប្រទេស​នូ​វែ​ល​សេ​ឡង់​)
១០-Estra Firenze Marathon នៅ​ក្រុង Florence (​ប្រទេស​អុ​ី​តា​លី​) និង
១១-Walker Cayman Islands Marathon នៅ​ដែនដី Grand Cayman​។

ដូច្នេះ​ព្រឹត្តិការណ៍​រត់ប្រណាំង​ម៉ា​រ៉ា​តុង​ចក្រភព​អង្គរ Angkor Empier Marathon អាច​នឹង​ក្លាយជា​ជម្រើស​ទី​១២​របស់​Forbes​ក្នុង​ឆ្នាំ​២០២៦​។

ទាក់ទង​ទៅ​នឹង​ការ​ជាប់​ក្នុង​ជម្រើស​របស់Forbes នេះ​ដែរ ឯកឧត្ដម វ៉ា​ត់ ចំរើន អគ្គ​លេខាធិ​ការ​គណៈកម្មាធិការ​ជាតិ​អូ​ឡាំ​ពិ​ក​កម្ពុជា(NOCC)​បាន​ចាត់ទុកជា​មោទនភាព​មួយសម្រាប់​កម្ពុជា ហើយ NOCC ក៏​មាន​សេចក្ដី​សោមនស្ស​រីករាយ​ផង​ដែរ​ដែល Forbes បាន​ជ្រើសរើស​ទិវា​រត់ប្រណាំង​ម៉ា​រ៉ា​តុង​ចក្រភព​អង្គរ ជា​គោលដៅ​រត់ប្រណាំង​ដ៏​ល្អ​បំផុត​មួយ​លើ​លោក​ប្រចាំឆ្នាំ​២០២៦​។ ឯកឧត្ដម វ៉ា​ត់ ចំរើន សង្ឃឹមថា ការ​ចូលរួម​ផ្សព្វផ្សាយ​ពី​ទស្សនាវដ្ដី Forbes​ដ៏​ប្រជាប្រិយ​នេះ នឹង​រួមចំណែក​ស្រូប​ទាញ​បាន​អ្នកចូលរួម​រត់ប្រណាំង​កាន់តែ​ច្រើន​ថែម​ទៀត​ទូ​ទាំង​ពិភពលោក​មក​កាន់​តំបន់​អង្គរ​ដ៏​ល្បីល្បាញ​របស់​កម្ពុជា​។

គួរ​រំលឹក​ថា ទិវា​រត់ប្រណាំង​ម៉ា​រ៉ា​តុង​ចក្រភព​អង្គរ ត្រូវ​បាន​បង្កើត​ឡើង​ក្នុង​ឆ្នាំ​២០១៤ ដែល
ប្រព្រឹត្ត​ទៅ​ក្នុង​ខែសីហា រៀង​រាល់​ឆ្នាំ ។ កាល​ឆ្នាំ​២០២៥​កន្លង​ទៅ ព្រឹត្តិការណ៍​ដ៏​ធំ​មួយ​នេះ​របស់​កម្ពុជា​ទទួល​បាន​អ្នកចូលរួម​រត់​ទាំង​ជាតិ និង​អន្តរជាតិ​សរុប​ជាង​៤២០០​នាក់ ៕