រាជធានីភ្នំពេញ ៖ គណៈកម្មាធិការជាតិអូឡាំពិកកម្ពុជា(NOCC)បានដាក់ចេញនូវផែនការយុទ្ធសាស្ត្រក្នុងការជំរុញ ពង្រឹង និងពង្រីកវិសាលភាពអំពីគុណតម្លៃអូឡាំពិកឱ្យកាន់តែទូលំទូលាយនៅតាមសាលារៀនដែលមានកុមារតូចៗទាំងអស់នៅទូទាំងប្រទេស ។ ជាពិសេសឆ្នាំនេះមានកម្មវិធីពិសេសដោយលើកយកកម្មវីធីអប់រំចលនាអូឡាំពិកទៅដល់ខេត្តជាយដែនដែលមានខេត្តឧត្តរមានជ័យ និងខេត្តព្រះវិហារ។
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជាបានមានប្រសាសន៍ថា នៅឆ្នាំ២០២៦នេះក្រោយពីមហាសន្និបាតបញ្ចប់អាណត្តិរបស់ខ្លួន គណៈកម្មាធិការជាតិអូឡាំពិកកម្ពុជា បានដាក់ចេញនូវផែនការយុទ្ធសាស្ត្រក្នុងការជំរុញ និងរៀបចំការបញ្ជ្រាបការយល់ដឹងការអប់រំអូឡាំពិក ឧត្តមគតិអូឡាំពិក ដែលជាអត្ថប្រយោជន៍នៃចលនាសកម្មភាពកីឡានៅក្នុងសង្គមជាតិ ឱ្យសិស្សានុសិស្សដែលជាកុមារតូចៗ ត្រូវមានចំណេះដឹងផ្នែកអប់រំអូឡាំពិកជាស្មារតីអូឡាំពិក ដើម្បីជាការទាក់ទាញការលើកកម្ពស់សុខុមាលភាព សុខភាពសិក្សា គោរពទៅតាមគោលការណ៍របស់គណៈកម្មាធិការជាតិអូឡាំពិកអន្តរជាតិ។
ឯកឧត្តមបានឱ្យដឹងទៀតថា តាមអនុសាសន៍ណែនាំរបស់ឯកឧត្តមបណ្ឌិតថោង ខុន ប្រធានគណៈកម្មាធិការជាតិអូឡាំពិកកម្ពុជា តែងតែជំរុញការផ្សព្វផ្សាយ និងការបង្កើតក្រុមការងាររៀបចំឯកសារផ្សព្វផ្សាយ និងមានមន្ត្រីល្អៗ មានជំនាញរបស់គណៈកម្មាធិការជាតិអូឡាំពិកកម្ពុជាទៅសិក្សារៀនសូត្រអំពីចលនាអូឡាំពិកនៅក្រៅប្រទេស ។ ការងារនេះស្របទៅតាមគោលនយោបាយនៃផែនការយុទ្ធសាស្ត្រកំណែទម្រង់របស់ក្រសួងអប់រំ យុវជន និងកីឡាផងដែរ។
ជារៀងរាល់ឆ្នាំ គណៈកម្មាធិការជាតិអូឡាំពិកកម្ពុជា តែងតែបានជំនួយគាំទ្រពីមន្ទីរ អប់រំយុវជននិងកីឡានៅទូទាំងប្រទេស ។ នៅឆ្នាំនេះ យើងមានកម្មវិធីពិសេសទៅតាមបណ្ដាខេត្តជាយដែនដែលរងផលប៉ះពាល់ពីការរំលោភបំពានកន្លងមក មានខេត្តឧត្តរមានជ័យ និងខេត្តព្រះវិហារ គឺយើងរៀបចំឱ្យមានទីលានហ្វឹក
ហាត់កីឡានៅតាមសាលារៀនដែលមានការខ្វះខាតសកម្មភាពកីឡា ដើម្បីកែលម្អជួសជុលឡើងវិញ ព្រមទាំងមានកម្មវិធីអប់រំដល់សិស្សានុសិស្សនិងលោកគ្រូអ្នកគ្រូ ឱ្យព្យាយាមធ្វើសកម្មភាពអប់រំកាយនិងកីឡា លេងកីឡា ដើម្បីឱ្យកុមារមានភាពរឹងមាំផ្នែកបញ្ញា ស្មារតី និងមានសុខភាពល្អលើផ្នែកសិក្សា ។ ក្នុងនោះក៏បានផ្ដោតការយកចិត្តទុកដាក់លើភាពចាំបាច់ទៅលើការធ្វើចលនារាងកាយប្រភេទកីឡាអូឡាំពិក ដែលនៅលើពិភពលោកនេះគេកំពុងជំរុញធ្វើសកម្មភាពកីឡាទោះស្ថិតនៅក្នុងការលំបាកយ៉ាងណាក៏ដោយ ៕
ចែករំលែកព័តមាននេះ